Oǵan 150 turǵyn óz ótinishterin aıta keldi. 32 adamdy aımaq basshysy Qumar Aqsaqalov qabyldady.
Bereke aýdanynyń turǵyndary Severnaıa kóshesi jolynyń sapasyzdyǵy jáne Á.Dosmuhambetov kóshesindegi jaryq shamdarynyń joqtyǵy týraly aryzdandy. Qumar Irgebaıuly kóshege qıyrshyq tas tóseý, jaryqtandyrý aǵymdyq josparǵa engenin jetkizdi. О́z muńdaryn jetkize kelgen Sátpaev kóshesiniń turǵyndary aýlalardy jóndeýge jarty mıllıard teńge bólingenin, 60 aýla jóndeletinin, onyń ishinde ózderiniń de problemasy sheshim tabatynyn estip, jańalyqty bólisý úshin úılerine qaraı asyqty.
«Sensıtıv» bı ansambliniń jetekshisi Olga Rostovshıkova óńir basshysyna bı teatryn ashý usynysymen keldi. Osydan 13 jyl buryn mylqaý balalarǵa arnalǵan mektep-ınternat janynan qurylǵan sporttyq baldyq bı ujymy respýblıkada bireý ǵana. AQSh-tyń Kalıfornııa qalasynda ótetin álemdik chempıonatqa qatysý qurmetine ıe bolypty. Bastama birden qoldaý taýyp, qarjylyq jaıy da qanaǵattandyryldy.
Qoǵamdyq qabyldaý kórsetkendeı, jurtshylyqty abattandyrý, sý, jol, baspana máseleleri de az tolǵandyrmaıtyn bolyp shyqty. Máselen, 7 balanyń anasy Tatıana Pıpýs turyp jatqan baspana apattyq jaǵdaıda dep tanylypty. Bıyl qarǵyn sý shaıyp ketip, jaǵdaı tipti qıyndap ketken kórinedi. Páter kezeginde 3058 bolyp tur. Oǵan jaldamaly baspanaǵa qol jetkizgenshe qonaq úı túrindegi páterge kóshý usynyldy. Sóz arasynda tirkeýge alynǵan kópbalaly otbasylardyń úshten birin bıyl pátermen qamtamasyz etý úshin qarajat bólingenin aıta ketken jón.
Sol sııaqty Nadejda Hlopseva, Irına Gordeeva sekildi kóp balaly analar qala ákimi Bolat Jumabekovtiń qabyldaýynda bolyp, ózderin tolǵantqan áleýmettik máselelerdi ortaǵa saldy.
«Ashyq qoǵamdyq qabyldaý – halyqpen keri baılanys jasaýdyń birden-bir tıimdi joly. Biz turǵyndardyń jaǵdaılaryn sheshýmen qatar atqarylyp jatqan jumystar jaıly da habardar etemiz. Osy ýaqytta deıin barlyǵy 700-den asa adam qaıryldy. Men ózim 146 soltústikqazaqstandyqty qabyldadym. Mamlıýt aýdany Ledenevo selosynyń turǵyndary aýyldyń ishine sý taratý júıesin salýdy suraǵan edi. Bıyl 40 aýylǵa 400 kolonka qoıylady. Oblys ortalyǵyndaǵy Pervomaı kóshesinde 4 apatty úı súrilip, turǵyndarǵa baspana beriledi. Keıbir máseleler ýaqytty talap etedi», dedi Qumar Aqsaqalov BAQ ókilderine bergen suhbatynda.