Qaıran tilim qor boldy-aý!..

Eger kúnderdiń bir kúninde qate jazýdan kesirli konkýrs ótkizile qalsa, Kókshetaý báı­geni shappaı alatyn syńaıy bar. Qazaq tiliniń kirpigi ázer qımyldap turǵan qalada qate jazý bylaı tursyn, saı-súıegińdi syrqyratyp, qorlaý da bar. Sóz lámin mysalmen shegelegen durys. Shaǵyn qalany qaq jaryp ótetin Ýálıhanov kóshesiniń bo­ıyn­da býy burqyraǵan ashana tur. Tek ataýyna kóziń tússe, tábetiń tartpaı qalady. Ash ózegiń úzilip bara jatsa da, as ishe almas edińiz. О́ıtkeni, ashananyń ataýy «BeshBarmaq». Qasyq-shanyshqy ustap kórmegen jergilikti jurt aldyndaǵy asyn bes barmaǵymen jeıdi degen maǵynada. Asymyzdy iship, aıaǵymyzǵa túkirgen degen osy emes pe? Nıet túzý bolsa, ashanaǵa ataý bolýǵa jaraıtyn sóz tolyp jatqan joq pa?!

Jyljymaıtyn jarnamadaǵy jaı adam tózgisiz. Al qalyń el­di jaǵalap júrip, kózderine shuqyp kórsetetini de bar eken. Bul - avtobýs qabyrǵasyndaǵy aıaldamalardyń ataýy jazyl­ǵan shaǵyn taqtaısha. Bir baǵyt­taǵy 16 aıaldamanyń jarty­synan astamy qate tur. Máse­len, «Suńqar» – «Sunqar», «Áýelbekov» – «Aýelbekov», «Táshenov» – «Tashenov» bolyp jazylǵan.

Til týraly túıtkil búgin ǵana túıilip otyrǵan joq. О́tken jyly oblys ortalyǵynda qa­lalyq mádenıet jáne tilderdi damytý bóliminiń aralasýymen, halyq kóp júretin jerlerdegi jarnamalardan 800-den astam qate anyqtalyp, 352-si túzetilgen eken. Ústimizdegi jyldyń ekinshi toqsanynda 575 qate anyqtalyp, qazir saýatty qalypqa túsirilýde. 

– Bul soraqylyqtan latyn álipbıi qoldanysqa engizil­gennen keıin qutylamyz, – deıdi qala turǵyny Ramazan Abaev. – Latyn álipbıiniń sońǵy nusqasy bekitilgennen keıin ǵımarattardyń syrtyndaǵy, birqatar kóshedegi qazaq tilindegi jarnamalar latyn grafıkasymen jazyla bastady. Endigi arada osyǵan muqııat bol­saq, tilimizdiń kósegesi kógerip, qateden arylar edik.  Kókshetaý