Aqtóbe qalasy ákimdiginiń qoldaýymen 2019 jyldyń 10-14 shilde kúnderi oblys ortalyǵynyń 150 jyldyǵyna arnalǵan «Baqytty bala» II ashyq balalar vokaldyq festıval-baıqaýy ótedi. Konkýrsqa ótinimderdi qabyldaý 2019 jyldyń 31 mamyryna deıin jalǵasady.
Bul balalar báıgesi jańa esimderdi anyqtaýdy, olardyń, jetilýine tanylýyna jaǵdaı jasaýdy, sondaı-aq qatysýshylardyń oryndaýshylyq sheberligin shyńdaýdy, vokaldyq ónerdiń úzdik dástúrlerin damytýdy maqsat etedi.
«Baqytty bala» baıqaýyn jas talanttar fabrıkasy dep ataýǵa da bolady. «Baqytty bala - 2018» fınalısteri jyl boıy ózderiniń jastyǵyna qaramastan, tabysty ártister retinde kórsetti. Mysaly, "junior Eurovision" halyqaralyq án baıqaýynyń ulttyq irikteý sýperfınalıstteriniń jartysy – «Baqytty bala» I festıvaliniń qatysýshylary. Erjan Maksım bolsa, reseılik kópshilikke belgili «Golos. Detı» jobasynda - festıvaldiń eki Gran-prıiniń birin jeńip alyp, óziniń talantymen, darynymen Máskeý kórermenderin moıyndatty. Erjannyń anasy Gúlmıra Álibekovanyń aıtýynsha, Aqtóbedegi balalar baıqaýy ulynyń shyǵarmashylyǵy úshin tamasha tramplın bolǵan.
"О́tken jyly men Aqtóbe qalasynda ótken «Baqytty bala» baıqaýyna qatysyp, Gran-prı ıegeri atandym. Baıqaý joǵary deńgeıde ótti. Men sol kezde ózimniń ónerdegi kýmırym Dımash Qudaıbergenmen jeke tanystym. Ol qatysýshylarǵa festıval baǵdarlamasy aıasynda sheberlik saǵatyn ótkizdi. Baǵdarlama óte mazmundy boldy. «Baqytty bala» -dan men osy kúnge deıin jyly ushyrasatyn, tatýlyq qarym-qatynastardy qoldaıtyn shynaıy dostarymdy taptym.
«Baqytty bala» baıqaýy óz ataýyna sáıkes keledi. Bul baıqaý meniń jadymda ómirimdegi eń baqytty estelikterdiń biri retinde saqtalady. Men ádil konkýrsqa qatysyp, Gran-prı aldym jáne barlyq ónerli balalarǵa «Baqytty bala» festıval-baıqaýyna ótinim berýge keńes beremin. Sebebi, bul – Qazaqstandaǵy eń ádil baıqaý! «Baqytty Bala-2019» sahnasynda kezdeskenshe, dostarym!"- dedi Erjan Maksım.
Aıta ketý kerek, «Baqytty bala» baıqaýynyń fınalyna Fınlıandııa, AQSh, Germanııa, Malaızııa, Japonııa, Polsha, Fransııa, Reseı, Indonezııa, Ýkraına, Qytaı elderinen kelgen Dımashtyń jankúıerleri de kýá bolady. Máselen, Jańa Zelandııanyń turǵyny – Anıta Roı Ýord múgedek arbasyna tańylǵan aýyr naýqas. Solaı bola tura, ol óz kýmırin kórý úshin 15 myń shaqyrymdy baǵyndyryp, Qazaqstanǵa keldi.
Festıval-konkýrstyń jalpy júlde qory 2 500 000 teńgeni quraıdy. Festıval jas qatysýshylar men qazaqstandyq shoý-bıznestiń tanymal juldyzdary, sondaı-aq sheteldik qonaqtar qatysatyn jarqyn vokaldyq shoýmen aıaqtalady dep kútilýde. Shaqyrylǵan qonaqtar arasynda ótken jylǵy Gran-prı ıegeri Erjan Maksım de bar.
«Baqytty bala - 2019» óner dodasyna qatysýǵa nıet bildirýshilerdiń barlyǵy konkýrstyń resmı saıtynda ótinim berý joldarymen jáne erejesimen tanysa alady: www.baqyttybala.kz
Eske sala keteıik, byltyr maýsym aıynda Aqtóbede «Baqytty bala» I ashyq balalar vokaldyq festıval-baıqaýy ótken bolatyn. Ony "DımashAlı"shyǵarmashylyq ortalyǵynyń qoldaýymen oblys ákimdigi uıymdastyrdy. Elimizde teńdesi joq jobaǵa Qazaqstan, Reseı, О́zbekstan, Ýkraına, Gresııa elderiniń ókilderi qatysty. Halyqaralyq deńgeıdegi Dımash Qudaıbergen, Danelııa Tóleshova, Djordan Arakelıan, Vlad Sytnık, Jeńis Ysqaqova, Svetlana jáne Qanat Aıtbaevtar syndy ártister festıvaldiń tóreshileri men arnaıy qonaqtary boldy.