S.Aıtpaeva sapar barysynda oblys ákiminiń orynbasary, qala jáne aýdan ákimderi, jergilikti atqarýshy organ ókilderiniń qatysýymen kámeletke tolmaǵandardyń qaýipsizdigi máseleleri boıynsha otyrys ótkizdi.
S.Aıtpaeva sońǵy kezderi balalardyń zańdy quqyqtary men múddeleriniń buzylýy, onyń ishinde balalarǵa qatygezdikpen qaraý jáne ata-analardyń bala tárbıesine salǵyrt qaraý jaǵdaılarynyń oryn alǵanyn atap ótti.
«Otbasy máseleleri, áleýmettik jetimdiktiń, balalardyń qaraýsyz qalý jáne olardyń quqyqtarynyń buzylýynyń aldyn alý, balalar quqyqtarynyń saqtalýyn jáne osy saladaǵy bılik organdarynyń qyzmetin qadaǵalaýdyń tıimdi júıesin uıymdastyrý, áleýmettik áriptestikti damytý máseleleri birlesip sheshim qabyldaýdy qajet etetin ózekti taqyryp bolyp tabylady», - dep atap ótti ýákil.
S.Aıtpaeva óz sózinde 2019 jyldyń 1 sáýirinen bastap «Qazaqstan Respýblıkasynyń keıbir zańnamalyq aktilerine balanyń quqyqtaryn qorǵaý jónindegi fýnksııalardy júzege asyratyn uıymdardyń qyzmetimen baılanysty máseleler boıynsha ózgerister men tolyqtyrýlar engizý týraly» zań kúshine engenin atap ótti. Onda kámeletke tolmaǵandardyń isteri jáne olardyń quqyqtaryn qorǵaý jónindegi komıssııaǵa eleýli ról bólingen, ol memlekettik organdar men mekemelerdiń kámeletke tolmaǵandar arasyndaǵy quqyq buzýshylyqtardyń, qadaǵalaýsyz jáne panasyz qalýdyń aldyn alý salasyndaǵy qyzmetin úılestirýdi qamtamasyz etetin turaqty jumys isteıtin alqaly organ bolyp tabylady. Mundaı komıssııalardyń jergilikti jerlerdegi róli kúsheıtildi jáne olardyń qoǵam aldyndaǵy jaýapkershiligi arta túsedi.
Kezdesý qorytyndysy boıynsha ýákil otbasy tárbıesi, ata-analar men balalardyń quqyqtyq saýattylyǵyn arttyrý, ata-analardyń balalar úshin jaýapkershiligi (alıment, ajyrasý, turǵyn úı, jumysqa ornalasý, laıyqty bilim berý), aqparattyq qaýipsizdik máselelerine qatysýshylardyń nazaryn aýdardy. Ol qoǵamdy, barlyq memlekettik organdardyń ókilderin kelisilgen birlesken is-qımyldardy kúsheıtýge jáne balanyń ıgiligi jolynda belgilengen problemalardy joıý úshin belsendi sharalar qoldanýǵa shaqyrdy.