«Bıznestiń jol kartasy-2020» memlekettik baǵdarlamasynyń negizgi maqsattary – óńirlik kásipkerliktiń turaqty ári teńgerilimdi ósimin qamtamasyz etý, qazirgi jáne jańadan qurylatyn jumys oryndaryna qoldaý kórsetý.
Baǵdarlama iske asyrylǵan tórt jyldan beri respýblıkalyq bıýdjetten 210,5 mlrd teńge bólindi. Bul qarajat 13 myń ShOB sýbektisin qarjylandyrýǵa, orta eseppen jylyna 20 myń kásipkerdi oqytýǵa, 10 myń jumys ornyn qurýǵa, 3,3 trln teńge somasyna ónim shyǵarýǵa múmkindik berdi. Tólengen salyqtar somasy jyl saıyn 175 mlrd teńgeni qurady.
«Jalpy, baǵdarlama iske asyrylǵan tórt jylda respýblıkalyq jáne jergilikti bıýdjetterden 247,1 mlrd teńge kóleminde 13 380 jobaǵa qoldaý kórsetildi», — dep naqtylady ulttyq ekonomıka vıse-mınıstri.
Bólingen qarajattyń basym bóligi nesıeler boıynsha syıaqy mólsherlemesin sýbsıdııalaýǵa baǵyttaldy (126 mlrd teńgesi nemese barlyq somanyń 60,1%). 53 mlrd teńgesi nemese 25,2% fabrıkalarǵa, zaýyttarǵa jáne ShOB óndiristik nysandaryna jetkiliksiz ınfraqurylymdy júrgizýge baǵyttaldy. Qalǵan bóligi nesıelerdi kepildendirýge, granttar usynýǵa, kásipkerlerdi oqytýǵa jáne olarǵa keńes berý qyzmetterine jumsaldy. Baǵdarlama tetikterine suranys óte joǵary.
Jalpy sharalar nátıjesinde ShOB-tyń ekonomıkadaǵy mańyzy artty. Máselen, 2015 jyly JIО́-degi ShOB úlesi 24,9% qurasa, 2018 jyldyń qorytyndysy boıynsha 28,3% boldy. 2015 jylmen salystyrǵanda, shaǵyn jáne orta kásipkerlerdiń el ekonomıkasyna qatysýy 3,4 paıyzdyq pýnktke joǵarylady.
2018 jyldyń qorytyndysy boıynsha ShOB-tyń ónimder shyǵarý kólemi 26 trln teńgeden asty. Bul rette, ónim shyǵarý qurylymynyń besten bir bóligi ónerkásiptiń úlesine tıesili.
Jalpy, 2018 jyly elimizde óndiris ósimi 2015 jylǵy deńgeıden naqty máninde 114% (nemese 26,5 trln teńgeni) qurady.
Al 2019 jyly 1 qańtardaǵy málimetter boıynsha, shaǵyn jáne orta kásipkerlik sýbektileriniń sany 1,2 mln birlikti qurady. О́tken jyldyń osyndaı kezeńimen salystyrǵanda, bul kórsetkish 8,3%-ǵa artty.
Sonymen qatar Ulttyq ekonomıka vıse-mınıstri E. Alpysov 2019 j. I toqsandaǵy shaǵyn jáne orta kásipkerliktiń damý qorytyndylary týraly aqparattandyrdy. Bul kezeńde barlyǵy 715 jobaǵa qoldaý kórsetildi.
Jergilikti atqarýshy organdar konkýrstyq rásimder qorytyndysy boıynsha osy jyldyń ekinshi jartysynda granttar bere bastaıdy.
2019 jyly 15 ınfraqurylymdyq joba boıynsha 7,3 mlrd teńge qarastyrylǵan. Jobalar iske asyrylý satysynda.
«Bıznestiń jol kartasy-2020» baǵdarlamasynyń mańyzdy baǵyty kásipkerlik áleýetti nyǵaıtý bolyp tabylady. Bul baǵyt bıznes júrgizý negizderine oqytý boıynsha jobalar keshenin, shaǵyn jáne orta bıznes quzyretterin kóterýdi, áleýetti jáne óz isin bastaǵan kásipkerlerge qoldaý kórsetý úshin konsýltasııalyq keńes berýdi qamtıdy. Keńes berý kezinde bıznes-jospardy qalaı ázirleý, salyqtardy qalaı tóleý, deklarasııany qalaı tapsyrý, bankterge qalaı júginip, lısenzııany qalaı tapsyrý t.b. kerektigi túsindiriledi.
Osylaısha, jyl saıyn 20 myńǵa jýyq kásipker oqytylyp, quzyretteri arttyrylatyn bolady, orta eseppen alǵanda 154 myń kásipker jyl saıyn konsýltasııalyq (110 myń) jáne servıstik (44 myń) qyzmetter alatyn bolady.
Bıylǵy jyldyń I toqsanynyń qorytyndysy boıynsha 6 135 tyńdaýshy bıznes-mektepterde kásipkerlik negizderi boıynsha oqytýdan ótti. Kásipkerlerdi qoldaý ortalyqtarynda bıznesti memlekettik qoldaý sharalary boıynsha 19,5 myń klıentke 36 myńnan astam keńes berildi, 7 myń kásipkerge 8 myńǵa jýyq servıstik qyzmet kórsetildi.