Astana qalasy Bilim basqarmasy men №2 О́ner mektebi uıymdastyrýymen ótken mádenı is-shara sonymen qatar Jastar jyly men Halyqaralyq balalardy qorǵaý kúnine oraılastyryldy. Bul jobanyń eń basty ereksheligi – kóp balaly jáne az qamtylǵan otbasylarǵa balalar ónerin tegin tamashalaýǵa múmkindik týǵyzdy.
Búginde elorda brendi sanalatyn «Aınalaıyn» balalar hory Ilıa Averbýhtyń «Muz aıdyndaǵy shoý», VII qysqy Azıada oıyndarynyń ashylý saltanaty sııaqty memlekettik aýqymdy mádenı is-sharalardyń ótýine atsalysqan bedeldi de biregeı óner toby bolyp tabylady.
Tarıhy Qostanaı qalasynan bastaý alatyn «Aınalaıyn» balalar horynyń maqsatyna kelsek, olar negizinen qazaq tilindegi balalarǵa arnalǵan avtorlyq ánderdi oryndaıdy. Oǵan «Úzdik muǵalim-2006» baıqaýynyń bas júldegeri, Y.Altynsarın atyndaǵy, «Mádenıet salasynyń úzdigi» jáne «Adal tulǵa» medalderiniń ıegeri, №2 О́ner mektebiniń dırektory Gúlmıra Jangeldiqyzy jetekshilik etedi.
Kesh Prezıdenttiń estradalyq-sımfonııalyq orkestri súıemeldeýimen ótti. Aınalaıyndyqtar jandy daýysta án saldy. Kórermenderge ujym týraly 10 mınýttyq derekti fılm kórsetilip, 20 jyl burynǵy kezeńge sholý jasaldy. Reseılik «Golos. Detı» telejobasynyń jeńimpazy Erjan Maksım qonaq retinde qatysty. Sonymen qatar mereıtoımen arnaıy quttyqtap kelgen hordyń 2001 jáne 2015 jylǵy túlekteri án saldy. Konsertte jańa avtorlyq ánder oryndaldy, tanymal ánshiler óner kórsetti.
Byltyr Ispanııanyń Loret-de-Mar qalasynda uıymdastyrylǵan halyqaralyq «Fiestalonia – Mediterranean Legends» baıqaýynda jeti memleketten kelgen jetkinshekter arasynda ozyq óner kórsetip, birinshi oryndy ıelendi. Al bıyl Elbasy qatysýymen ótken Jastar jylyn jarııalaý saltanatynda olar estrada juldyzdarymen birge «Elim meniń» (N.Nazarbaev, B.Tileýhanov) ánin shyrqady. Búginde «Aınalaıyn» balalar horyna arnaıy jazylǵan ánder Qazaq radıosynyń «Altyn qoryna» enip, oryndalyp júr.
Qarshyǵa KÚLEN