«Jastardyń ózin ózi basqarý júıesin damytý» jobasy – Jastar jylyna oraı Aqparat jáne qoǵamdyq damý mınıstrligi men «Azamattyq bastamalardy qoldaý ortalyǵy» KEAQ qoldaýymen Qazaqstan stýdentteriniń Alıansy tarapynan júzege asyp jatqan jańa joba. Bul elimiz boıynsha joǵary oqý oryndary men kolledjderdegi jáne kásiporyndardaǵy Jastar isi jónindegi komıtetterdiń jumysyn bir júıege keltirý, sondaı-aq jastardyń azamattyq belsendiligin, ózin ózi basqarý júıesin damytý arqyly jergilikti deńgeıde azamattyq dıalogty qurý prosesine tartý maqsatynda qolǵa alynǵan. Bul kezdesý sol jobany júzege asyrýdaǵy jumystyń bir parasy ǵana. Basqosýǵa elordadaǵy 14 JOO men 35 kolledjdegi jastar isi komıtetteriniń basshylary qatysty.
«Biz tikeleı stýdenttermen jumys isteıtin uıym retinde Jastar isi jónindegi komıtetterdiń qyzmetin jańa deńgeıge shyǵarsaq deımiz. Jańa joba aıasynda jyldyń sońyna deıin saıt qurylatyn bolady. Onda stýdentterge arnalǵan barlyq zańdar, kerekti jańalyqtar jarııalanady. Jastar shaǵymdar men usynystaryn da sol saıt arqyly bere alady. Sondaı-aq stýdentterdiń bazasy, Jastar isi komıtetteriniń jumysy ornalastyrylady. Ashyqtyq retinde jyl saıyn ótetin úzdik JOO men stýdentti anyqtaýdy da saıt arqyly júzege asyrmaqpyz», dedi «Qazaqstan stýdentteriniń alıansy» QB prezıdenti Ilııas Tústikbaev.
Joba mádenıet, bilim, áleýmettik, jemqorlyqqa qarsy, sport sııaqty bes baǵytty qarastyrady. Qazaqstan stýdentteriniń alıansy stýdentterdiń áleýmettik jaǵdaıyn jaqsartý úshin 2005 jyldan beri «Qalaı turyp jatyrsyń?» aksııasyn ótkizip keledi. 2016-2018 jyldary alıans barlyq oblystardaǵy stýdentterge qansha oryn jetispeıtinin, jataqhanalardyń sapasyn anyqtaǵan bolatyn. Sol negizde Tuńǵysh Prezıdent – Elbasy 2022 jylǵa deıin 75 myń oryndyq stýdenttik jataqhana salýdy tapsyrǵan edi. Jańa jataqhanalardyń berilýi de osy qoǵamdyq uıymnyń baqylaýynda eken. «Biz jańa jataqhanalardyń berilýi boıynsha 28 mamyrda Almaty qalasynda QazITÝ-da alǵashqy kezdesýimizdi ótkizemiz. Onda jańadan salynǵan jataqhanada stýdentter memlekettik standarttarǵa sáıkes turyp jatyr ma degen máseleni anyqtaımyz. О́ıtkeni ár stýdentke 6 sharshy metr keńistik bolýy kerek. Sonymen qatar onda tek ýnıversıtettiń stýdentteri ǵana turyp jatqanyna, oryndar muǵalimderge nemese ózge kisilerge berilgen, berilmegenine kóz jetkizemiz. Osylaısha biz jańa jataqhanalardyń barlyǵyn tekserip shyǵatyn bolamyz. Al burynnan paıdalanýda bolǵan jataqhanalardyń jaǵdaıy da bizdiń nazarymyzda. Jyl saıyn eki ret, ıaǵnı mamyr-maýsym jáne qyrkúıek-qazan aılarynda respýblıka boıynsha aýqymdy aksııa ótetin bolady. Alǵashqysynda jataqhanalardyń jaǵdaıyn teksersek, kúzde sol máselelerdiń sheshimi qalaı bolǵanyn anyqtaımyz», deıdi Ilııas Tústikbaev.
Budan bólek stýdentter uıymy Bolon prosesi jáne akademııalyq utqyrlyq ortalyǵymen birlesip stýdentterdiń shetelde oqyp, tájirıbe alýyna da jol ashyp otyr. Aldaǵy ýaqytta birlestik bilim salasyna kúsh salyp, jastardy aqparattandyrýdy qolǵa almaq. Jıynda sóz alǵan Bolon prosesi jáne akademııalyq utqyrlyq ortalyǵy Halyqaralyq ister bóliminiń basshysy Ýnzeılıa Hasenova stýdentterdiń oqı júrip shetelge shyǵyp bilimin qalaı shyńdaýǵa bolatynyn egjeı-tegjeıli túsindirdi. Basqosý sońynda Nur-Sultan qalalyq jastar isi jónindegi basshylar keńesi quryldy.