Úmitkerler óz múmkindikterin tıimdi paıdalanýda

«Aq jol» demokratııalyq partııasynan prezıdenttikke kandıdat Danııa Espaeva respýblıkalyq qoǵamdyq shtaby­nyń ókilderimen birge Aqmola vagon jóndeý ujymymen kezdesti. Jıyn­­ǵa partııa tóraǵasy, shtab basshysy Azat Perýashev, Parlament Májilisi depý­tattary Berik Dúısembınov pen Keńes Absatırov, partııa fılıalynyń tóraǵasy Asqar Smaǵulov qatysty.

Prezıdenttikten úmitker tuńǵysh áıeldiń saılaýaldy shtab músheleri zaýyt jumysshylaryna D.Espaevanyń otan­­dyq kásiporyndardy qoldaýǵa baǵyt­­­talǵan usynystaryn jetkizdi. О́ner­­­kásip mamandary baspanamen qam­ta­­ma­syz etý jáne zeınet jasyna qatyst­y suraq­taryn qoıdy. Sondaı-aq jı­nal­ǵandardy Qazaqstandaǵy jemqorlyqqa qarsy kúres sharalary da qyzyqtyrdy.

Kezdesý barysynda úmitkerdiń qazaq­standyq kásiporyndarǵa arnal­ǵan salyq tólemi júıesi jáne qarjylandyrýǵa baı­lanysty bastamalary sóz boldy. «Mańyzdy qoldaý sharalarynyń biri – otandyq ónerkásip oryndaryna jeńil­dikter qarastyrý. Eýrazııalyq ekono­mıkalyq aımaq sheńberinde kóptegen memlekettik tapsyrys pen tenderlerdi sheteldikter alyp jatyr. Sheteldik munaı paıdalanýshylaryn otandyq óndirýshilerdiń taýary men qyzmetin paıdalanýǵa mindetteý kerek. Bizdiń úmitker D.Espaeva «Memlekettik tapsyrystar týraly» Zańǵa, «Samuryq-Qazyna» AQ jáne taǵy basqa ulttyq kompanııalardaǵy tapsyrys týraly erejege «otandyq óndirýshi», «qazaqstandyq taýar» sekildi uǵymdardy qaıta engizý qajet dep sanaıdy», dedi A.Perýashev.

Aqmola vagon jóndeý zaýyty 1941 jyly qurylǵan. Munda jylyna úsh myńdaı vagon jóndeledi. Búginde zaýyt­ta 400-deı adam eńbek etedi. Jalpy, Qazaqstanda jıyrma shaqty osyndaı zaýyt bar. «Aq jol» partııasynyń saılaýaldy úgit-nasıhat naýqany jalǵasyn taýyp, elimizdegi iri ónerkásipterde kezdesýler ótkizedi. *  *  *

«Aýyl» halyqtyq-demokratııalyq patrıottyq partııasynan prezıdenttikke kandıdat Tóleýtaı Raqymbekov Shyǵys Qazaqstan oblysyn aralap júr. Ol bul saparynyń maqsaty aýyl sharýashylyǵy máselelerimen jaqynnan tanysyp, turǵyndardyń suraqtaryna tikeleı jaýap berý ekenin aıtty.

Kandıdat aldymen taýarly sút fermasyna bardy. Fermada 3 myń bas mal bar. Onyń ishinde shamamen jartysy – saýyn sıyr. «Jylyna ortasha eseppen alǵanda 1 sıyrdan saýylǵan sút 8 myń metrden asady. Bul – Qazaqstandaǵy or­tasha kórsetkishten 3 ese kóp. Eger eli­miz kóleminde muny 3 esege arttyrsa, bú­gin­gi tańda 6 mln tonnaǵa qosymsha 12 mln tonna ónim shyǵaryp, daıyn ónim­di eksportqa jiberer edik», dedi T.Raqym­bekov.

Shyǵystaǵy sharýa qojalyǵynyń tabysqa jetýiniń bir syry – ǵylymı-zertteý ortalyǵynyń qyzmeti. Otandyq jas ǵalymdar Ýkraınadan shaqyrylǵan ǵylym doktorlary men ǵylym kandıdat­tary­nyń basshylyǵymen dándi jáne maıly daqyldardyń, onyń ishinde soıa sortynyń seleksııasymen aınalysady. Kandıdatty jergilikti ShQMÝ túlekteriniń sharýashylyqta jumys istep jatqandary qýantty. Onyń aıtýynsha, stýdentterdiń ýnıversıtetti bitirgennen keıin jumys izdep aýylǵa kelýge nıet bildirgeni – óte quptarlyq bastama.

«Sharýa qojalyǵy tek 2018 jyldyń ózinde ǵylymǵa 385 mln teńge salyp­ty, al bıýdjettiń úlesi – 15 mln teńge. Mine, ǵylymnyń, bilimniń jáne agroóndiristiń tyǵyz ıntegrasııasynyń jarqyn mysaly. Jáne ǵylymı zertteýlerge jeke ınvestısııa salýdyń paıdaly eken­diginiń naqty kórinisi. Árbir aýylda osylaı bolýy kerek. Sol kezde aýyl tur­ǵyn­darynyń bolashaqqa degen qul­shy­nysy artady. Men, prezıdent­tikten úmitker tulǵa retinde oǵan qalaı qol jetkizýge bolatynyn anyq bilemin», dedi T.Raqymbekov.

*  *  *

Kásipodaqtar federasııasynan pre­zı­denttikke kandıdat Amankeldi Tas­pıhovtyń senim bildirilgen adamdary úgit-nasıhat jumystarynyń aıasynda Batys Qazaqstan oblysyndaǵy Syrym aýdandyq bilim berý bólimi ǵımaratynda «Kásipodaq uıymy jáne onyń qoǵamdyq baqylaýdy júzege asyrýdyń róli» ta­qy­­ry­bynda dóńgelek ústel jıynyn ótkizdi. Otyrysqa oblystyq bilim berý qyzmetkerleri kásipodaq uıy­my­nyń tóraǵasy M.Daýpaev jáne óńir­lik shtab ókilderi G.Qurmanǵazıeva men G.Haır­lıeva qatysty. Aldymen sóz bas­­taǵan M.Daýpaev kandıdat A.Tas­pı­hovtyń saılaýaldy tuǵyrnamasynda kórsetilgen eńbek adamyna jan-jaqty qoldaý kórsetý, olardyń quqyqtary men múddelerin qorǵaý týraly aıtyp berdi. Syrym aýdany bilim salasynyń kásipodaq músheleri uıymnyń jumys barysy, «Eńbek shartyn jasa!» aksııa­synyń júrgizilýi jónindegi qazirgi máse­l­elerdi málimdep, sońynda saılaýǵa bel­sendi qatysatyndaryn, úmitkerdi qol­daıtyndaryn jetkizdi.

Sonymen qatar bul óńirde oblystyq shtab belsendileri Báıterek jáne Terekti aýdandaryna avtokerýen uıymdastyrdy. Jastar aýyldardy aralap, aqparat­tyq taqtalarǵa prezıdenttikten úmitker A.Tas­pıhovtyń úgit-nasıhat materıaldaryn ornalastyrdy.

Al kandıdattyń Aqtóbe oblysyndaǵy qoǵamdyq shtaby jumystaryn tarı­hı-ólketaný mýzeıinde jalǵastyrdy. Qazaq­standyq mádenıet, sport, týrızm jáne aqparat qyzmetkerleriniń kásiptik odaǵynyń tóraǵasy S.Imanqulova bas­taǵan top jádigerler ǵımaratyna ekskýr­sııa jasap, mýzeı ujymyna saılaýal­dy tuǵyrnamanyń basym baǵyttaryn tanys­tyrdy. Kezdesý sońynda mýzeı dırek­tory­nyń orynbasary A.Erjanov pen sol me­ke­medegi kásipodaq tóraıymy A.Sary­baı Mádenıet jáne sport mı­nıstr­­li­gi­niń Qurmet gramotasymen marapattaldy. *  *  * Qazaqstan Kommýnıstik halyq partııasy usynǵan prezıdenttikke kandıdat Jambyl Ahmetbekovtiń Shymkent qalasyndaǵy saılaýaldy qoǵamdyq shtabynyń ókilderi belsendi jastarmen kezdesti. Indýstrııalyq-tehnıkalyq kolledjde ótken jıynda qalalyq shtab jetekshisi N.Qadyrqulov stýdentterge partııa kandıdatynyń baǵdarlamasyn egjeı-tegjeıli túsindirdi. Ol marks­tik-lenındik ustanymdardyń mańyz­dy­lyǵyna toqtalyp, kommýnıstik tár­bıeniń negizgi tetikterin atap ótti. Son­daı-aq búgingi tańda jastardyń memlekettiń taǵdyryna alańdaýshylyǵy báseń ekenin, olardyń túrli oqıǵalarǵa beıjaı qaraýy beleń alyp bara jat­qanyn kóldeneń tartty.

Jıynda nasıhatshy top qazirgi jas­tardyń tárbıesine de toqtalyp, tek qomaqty tabysqa ǵana umtylys jas­tar­dy qulaqkesti qulǵa aınaldyryp jat­qanyna nazar aýdardy. Internettiń belgili bir kontenti jastar arasynda osyn­daı olqylyqtyń oryn alýyna sebep bolatynyn atap ótti.

«Joǵary oqý oryndarynyń túlek­teriniń dıplomdary kóbine eńbek nary­ǵynda kádege jaramaı, jumyssyzdyq máselesi týyndap otyr. Bul máselelerdi sheshý úshin jańa tásil qajet, qoǵamnyń zama­naýı talaptaryna súıený kerek. Jastardyń ózin ózi tanytýyna múm­kindik usyný – Kommýnıstik halyq partııa­synyń basty basymdyqtarynyń biri. Sol úshin kandıdat J.Ahmetbekov óziniń saılaýaldy baǵdarlamasynda jas­tar úshin alǵashqy kepildengen jumys ornyn engizýdi talap etetinin kórsetti. Biz, Qazaqstan kommýnısteri, ortaq is úshin jumys isteımiz! Bizdiń senimimiz bir­lik, meıirim jáne ósip-órkendeý sııaq­ty barshaǵa túsinikti uǵymdar aıasynda nyǵaıady», dedi qalalyq shtab jetekshisi.

Ortada kóterilgen taqyryptar jas­tar­dyń kóńilinen shyqty. Olar salamatty ómir saltyn qalyptastyrý, shákir­taqynyń kólemin ulǵaıtý, jastar­dyń bos ýaqytyn tıimdi uıymdastyrý týrasynda suraqtaryn qoıdy. *  *  * Nur Otan partııasynan prezıdenttikke kandıdat Qasym-Jomart Toqaevty qoldaýǵa arnalǵan is-sharalar Qyzyljar óńirinde de belsendi uıymdastyrylýda. Sonyń biri etnomádenı birlestikter ókilderiniń qatysýymen Dostyq úıinde ótken «Beıbitshilik, birlik, kelisim – rýhanı jańǵyrýdyń negizi» atty jıyn boldy.

«Tuńǵysh Prezıdent Nursultan Nazarbaev táýelsizdik jyldary berik ornyqtyrǵan, qamtamasyz etken tarıhı sabaqtastyqtardy odan ári jalǵas­tyrý mem­leketimizdiń irgetasyn, ustan­ǵan saıası baǵytyn baıandy ete túsedi. Nurotandyqtar tańdaýdan qate­les­pedi, Q.Toqaevqa zor senim bildi­rip otyr. Ol zańdy da. О́ıtkeni qazaqstan­dyq­tar onyń basshylyq laýazymdarda mol tájirıbe jınaqtaǵanyn, qıyn­dyq­tardy eńsere biletin zor talantty uıym­dastyrýshylyq qarym-qabi­let­ke ıe ekenin jaqsy biledi. Osy sebep­ti Elbasymyzdyń sara saıasatyn, jarqyn jolyn jalǵastyraryna, ult­ara­lyq kelisim qaǵıdattaryn kózdiń qarashyǵyndaı saqtaryna kámil senedi», dedi alqaly basqosýda Urpaq qazaq má­de­nı-aǵartý ortalyǵynyń tóraıymy Gúl­baqsha Musabaeva.

Qazaqstan halqy Assambleıasy ja­nyn­daǵy oblystyq aqsaqaldar keńesi­niń tóraǵasy Fanıs Lıtfýllın óz sózinde búgingi tańda qoǵamdyq qaýipsizdik, tıimdi memlekettik basqarý, jemqorlyqty túp-tamyrymen joıý, áleýmettik qorǵaýdyń tıimdi júıesin qalyptastyrý asa ózekti jaıt ekenine nazar aýdardy. Ol barsha sol­tús­tikqazaqstandyqtardy Q.Toqaev­tyń kan­dıdatýrasyn qoldaýǵa, saılaý ýchas­kelerine bir kisideı kelýge shaqyr­dy. Sonymen qatar Evreı máde­nı uıymynyń jetekshisi Rashbıl Evdaev, «Radzima» belorýs ortalyǵynyń tóraıy­my Marııa Tatarenko, oblystyq slavıan mádenı birlestiginiń basshysy Raısa Polıshýk, taǵy basqalary res­pýb­lıkalyq saıası uıym atynan usyny­lyp otyrǵan prezıdenttikke kandıdat eli­miz­diń ár azamatyna teń múmkindik týǵy­zatyn ádiletti, damyǵan qoǵam quraryna úlken senim bildirdi.

*  *  * «Ult taǵdyry» ulttyq-patrıottyq qozǵalysynan prezıdenttikke kandıdat bolyp tirkelgen Ámirjan Qosanov keshe Qostanaı óńirine taban tirep, oblystyq saılaýaldy shtabynyń belsendilerimen kezdesti. Is-sharada kandıdat saılaýaldy tuǵyrnamasynyń basym baǵyttaryn naqtylap, túrli ózekti qoǵamdyq másele­lerge qatysty óz ustanymyn keńinen túsindirip berdi. Shtab músheleri ózderin tol­ǵandyrǵan saýaldaryn qoıyp, óńir­lik jumys jóninde baıandady. Buǵan qosa shtabtyń konferens-zalynda qala turǵyndarymen de kezdesý ótti. Jınal­ǵan halyq Á.Qosanovtyń aldaǵy josparlaryn óz aýzynan estip, bastamalaryna qoldaý kórsetti.

Sonymen qatar kandıdat óziniń senim bildirilgen adamdarymen birge «Zarechnoe aýylsharýashylyq tájirıbe stansasy» JShS eńbek ujymymen kezdesti. Mekeme bıdaı, raps, suly, arpa jáne basqa da dándi daqyldardyń qundy tuqymdaryn ósirýmen aınalysady. Kásiporyn qyz­met­kerlerine Á.Qosanov saılaýaldy tuǵyr­namasynyń negizgi baǵyttary týraly aıtyp berdi. Jınalǵan qaýym saı­laýdaǵy baıqaýshylar taqyryby boıynsha suraq qoıyp, biraz málimetke qanyqty. Sondaı-aq túrli qoǵamdyq máseleler talqylanyp, saılaýshylar óz oı-pikirlerin ortaǵa saldy.

Al kandıdattyń Qaraǵandy oblys­tyq shtabynyń úgit-nasıhat toby Kenshiler mádenıet saraıy aldynda fleshmob ótkizdi. Onda belsendi paraqshalardy, úgit materıaldaryn taratyp, sol mańnan ótken shahar halqy­nyń suraqtaryna jaýap qaıtaryp, saılaý týraly málimet berdi. Sonymen qa­tar oblystyq shtab ornalasqan ǵıma­rat­ta azamattardy qabyldaý kúni ótti. Tur­ǵyn­dar kandıdattyń saılaýaldy tuǵyr­namasynda kórinis tapqan ba­ǵyt­­tarǵa qyzyǵýshylyq tanytyp, suraq­taryna jaýap aldy. Jáne bul qujat­ty tolyqtyra túsý úshin ózderiniń usynys­taryn da bildirdi.

*  *  * «Uly dala qyrandary» respýblıka­lyq qozǵalysy usynǵan prezıdenttikke kandıdat Sádibek Túgeldiń senim bil­diril­gen adamdary óńirlerde úgit-nası­hat jumystaryn qarqyndy júrgize bastady. Saıası naýqandy tek qazaq tilin­de ótkizip júrgen ultjandy aza­mat­tyń saılaýaldy baǵdarlamasy Jambyl oblysynda jalǵasyn tapty. Jambyl oblystyq qoǵamdyq shtaby­nyń ókilderi Taraz qalasynan bastap T.Rysqulov, Merki, Sarysý, Talas, Baızaq jáne Jýaly aýdandaryna baryp, turǵyndarmen kezdesti. Jergi­likti halyqqa S.Túgeldiń saılaýaldy tuǵyr­na­masy keńinen túsindirildi. 

Sondaı-aq nasıhatshylar Qordaı aýda­nynda bolyp, turǵyndardyń únine qulaq túrip, saılaýaldy baǵdarla­masy­men jiti tanystyrdy. «Árbir azamat ana tili men dilin, dinin, onyń túp-tamyry men tarıhyn, mádenıetin, ónerin, salt-dástúrin jáne rýhanı-mádenı mura­laryn, sondaı-aq ultyn ulyqtaǵan uly tulǵalardy bilip ári qasterlep ósýi qajet. Sebebi biz jastarymyzdy qalaı tárbıelesek, bolashaǵymyz da sondaı bolady. Sondyqtan ulttyq salt-dás­túr­di mektep tabaldyryǵynan bastap jastardyń boıyna sińirý kerek», dedi S.Túgeldiń senim bildirilgen adamdary.

Al kandıdattyń ózi úgit-nasıhat jumystarynyń aıasynda uıymdas­ty­ryl­ǵan Nur-Sultan qalasyndaǵy «Jeruıyq» saıabaǵynda ótken konsertke qatysty. S.Túgel konsert barysynda sóz alyp, kezinde atalǵan saıabaqtyń atyn qoıarda Elbasy Nursultan Nazarbaevqa «Jeruıyq» ataýyn usynǵanyn aıtty. Sondyqtan bul jerde ótken is-shara erekshe mánge ıe boldy. Konsertte máde­nıet qaıratkeri Qaırat Ahmetov jáne tanymal ánshi, Polshanyń mádenıet qaırat­keri Bıbigúl Iskakova týǵan jer týra­ly patrıottyq ánder shyrqady. Sony­men qatar belgili ıllıýzıonıst Kárim Mutyrǵanov, elordadaǵy Karate federa­sııa­synyń sportshylary óner kórsetti.

Daıyndaǵandar

О́mir ESQALI,

Orynbek О́TEMURAT,

«Egemen Qazaqstan»