Bıylǵy oqý jyly elordanyń bilim salasy úshin aıtarlyqtaı jetistikterge toly boldy. Nur-Sultan qalasynyń mektepterinde oqyp júrgen oqýshylar respýblıkada ǵana emes, halyqaralyq deńgeıdegi olımpıadalarda qazaqstandyq bilim salasynyń dárejesiniń bıiktigin kezekti ret búkil álemge dáleldedi. Mektep qabyrǵasynda oqyp júrgende-aq sheteldegi irgeli joǵary oqý oryndarynyń emtıhanynan súrinbeı ótip, oqýǵa qabyldanǵandary da barshylyq. Elordalyq oqýshylar jasap jatqan jobalar sheteldik kompanııalardyń da qyzyǵýshylyǵyn týdyrady. Búgingi shara barysynda oqýshylardyń ıntellektýaldyq jáne tehnıkalyq jobalary qala basshysynyń nazaryna usynyldy.
Solardyń biri - №73 fızıka-tehnıkalyq mektep-lıseıiniń oqýshysy Ámirjan Dýlattyń jobasy. Ol múmkindigi shekteýli adamdarǵa arnalǵan avtomattandyrylǵan ámbebap qurylǵysyn jasap shyqqan. Oqýshynyń arbasynyń quny qoljetimdi, satylymdaǵy baǵasy 80 myń teńgeni quraıdy. Baqyt Sultanov atalǵan arbany jasaǵan talantty jasqa rızashylyǵyn bildirip, onyń qurylǵysyn ındýstrııalyq parkte jasaýǵa qarastyratynyn jetkizdi. Bul elordadaǵy múmkindigi shekteýli jandardyń máselesin sheshýge septigin tıgizetin joba ekendigi aıtyldy.
Kezdesýge kelgen talantty oqýshylardyń biri - №6 gımnazııanyń oqýshysy Radomır Romanov. Radomır Reseıdiń Birinshi arnasynda kórsetiletin «Bárinen de kúshti» baǵdarlamasyna qatysyp, erekshe este saqtaý qabiletimen kórermenderdi tańǵaldyrǵan. Oqýshy álemge tanymal tulǵalardyń ómirbaıanyn múdirmeı jatqa aıtady. Abaı Qunanbaev, Shoqan Ýálıhanov, Jambyl Jabaevtan bastap Stıv Djobsqa deıin tarıhta esimi qalǵan kóptegen tulǵalardyń ómirjolyn este saqtap alǵan.
№20 mekteptiń oqýshysy, bloger Aqsulý Bektasova tikeleı efırde qala basshyna suraq qoıý múmkindigine ıe boldy.
«Búginde mende 3 myń jazylýshy bar. Sondyqtan sizge tikeleı efırde suraq qoıǵym kelip otyr. Elorda turǵyndarynyń ómir sapasyn jaqsartý úshin kóptegen baǵdarlamalar qolǵa alyndy. Jaqyn arada taǵy qandaı jaqsylyqtar bolady?», - dedi.
Kezdesýge shaqyrtý alǵan 120 balanyń árqaısysy elimizdiń órkendep ósýine ózindik úlesin qosýǵa atsalysatyn jáne jarqyn bolashaǵyna sátti qadam jasaǵan órkender. Olar B.Sultanovtan mektep qabyrǵasyndaǵy sátterden esteligimen bólisýdi surady.
B.Sultanov respýblıkalyq fızıka-matematıka mektebine emtıhan kezinde Arhımed zańyn umytyp, oqý ornyna túse almaı, kelesi synda ǵana ótip, qabyldanǵanyn eske aldy. Sonymen qatar bul bilim oshaǵynda tek matematıka men fızıkamen shektelmeıtinin, tarıh, bıologııa men basqa da gýmanıtarlyq pánderdiń tereńdetilip oqytylatynyn túsindirdi.
«Bıologııa pániniń muǵalimi birde «3» degen baǵa qoıdy. Sonda men «bizge bıologııanyń keregi ne, biz fız-matpyz ǵoı» dep qarsylyq bildirdim. Muǵalim meni tyńdap bolǵan soń «RFMM túlekteri barlyq pánnen úzdik bolýy kerek» degeni esimde. Sondyqtan RFMM jan-jaqty, barlyq pándi tereńdetip oqytatyn bilim ordasy ekenin bárimiz jadymyzda saqtap aldyq», - dedi B.Sultanov.
Qala ákimi ózi de bir kezderi dál búgingi oqýshylar sııaqty bolǵanyn tilge tıek etip, sender aldyńǵy tolqyn aǵalardan da asyp túsesińder, baǵyndyrar bıikteriń alda degen senimin jetkizdi. Sondyqtan erinbeı, jalyqpaı eńbektený, úzdiksiz bilim alý - basty shart deı kele, qazir adam kapıtalynyń quny ólsheýsiz ekenin eske saldy.
«Búgin astananyń mereıin asyryp júrgen sizdermen kezdesýim meni qýanyshqa bólep otyr. Elordalyq oqýshylar komandasy 13 jyl qatarynan mektep pánderi boıynsha respýblıkalyq olımpıada men ǵylymı jarystarda «Úzdik komanda» ataǵyn ıelenip keledi. Bizdiń balalardyń qorjynynda 412 medal bar. Bul – úlken jetistik. Aldaǵy tańda da osy bıikten kórinip, oqýda ozat, ómirde tabysty bolýlaryńyzǵa tilektespin», – dedi qala ákimi.
Kezdesýdiń resmı bóligi qorytyndylanǵan soń, oqýshylar qala basshysymen uzaq áńgimelesip, fotoǵa tústi.