О́ziniń adal eńbegimen, aqyl-parasatymen aty ańyzǵa aınalǵan Kámshat Baıǵazyqyzynyń ómirden ótkenine de eki jylǵa jýyqtady. Qostanaıdaǵy jańadan oryn tepken «Iýbıleınyı» shaǵyn turǵyn aýdanyndaǵy bir kóshe Kámshat apanyń atyna berilgen bolatyn. Ortalyqtaǵy Abaı dańǵylynyń boıyndaǵy toǵyz qabatty úıdiń qabyrǵasyna Kámshat apanyń sýreti salyndy. Endi mine, jaqynda ǵana paıdalanýǵa berilgen Jastar saraıynyń aldyna qazaqtyń dara qyzynyń eskertkishi ornatyldy. Onyń ashylý saltanatynda oblys ákimi Arhımed Muhambetov Kámshat apa esketkishiniń jastar kóp keletin orynda turýy zańdylyq, onyń ómiri men qyzmeti jas urpaqqa úlgi ekenin aıtty.
«Qazaq qyzynyń esimi tutas bir dáýirdiń ańyzyna aınaldy. Kámshat apamyz qazaq qyzdarynyń arasynan shyqqan, tehnıka tizgindegen alǵashqy mehanızator edi. Ol Sosıalıstik Eńbek Eri ataǵyna ıe boldy. Joldasy Temirbek Qabdoluy ekeýi tórt bala tárbıelep ósirdi. Mehanızator bola júrip, oshaǵynyń otyn óshirmedi, balalary úlgili azamat bolyp ósti. Kámshat apa jasy kele ımandylyq jolymen qajyǵa baryp, bes paryzynyń birin ótedi. Basynan aq jaýlyǵyn tastamaǵan apamyzdyń ár isi elge úlgi edi. Jaqynda Prezıdent Qasym-Jomart Toqaev kelgende Kámshat apaǵa eskertkish-músin qoıatynymyzdy aıtqanmyn. Sonda Prezıdent «Ol kisi dańqty adam, ol tek Qostanaıdyń ǵana emes, elimizdiń, halqymymyzdyń maqtanyshy, óte durys is eken» dedi. Mine, Jastar saraıynyń janyndaǵy eskertkish-músinge bolashaqta jastar kelip gúl qoıady, apamyzdyń ómiri men qyzmeti týraly bilip, ózderine úlgi etetin bolady» dedi Arhımed Begejanuly. Sonymen qatar eskertkish-músinniń ashylý saltanatynda Oblystyq ardagerler keńesiniń tóraǵasy Kenjebek Úkın, Qazaqstannyń Eńbek Eri Saıran Buqanov sóz sóılep, Kámshat Dónenbaevanyń jarqyn beınesin eske aldy. Onyń atynyń máńgi este qaldyrý jumystarynyń jalǵasa berýi jas urpaq úshin kerektigin de eske saldy. Kámshattyń uly Syrym sóz alyp, anasyna baılanysty atqarylǵan ıgi ister úshin oblys basshylyǵyna, ardagerler keńesine alǵysyn aıtty.