Aımaq basshysy, sondaı-aq «Aq Jaıyq» tabıǵı rezervatynyń jaǵdaıyna da nazar aýdardy. Qoryq aýmaǵynda týrızmdi damytý jáne qosymsha baqylaý qosyndaryn ornatý tóńireginde sharalar qolǵa alynady. Rezervatta sońǵy jyldary dala órti jıilep ketti. Osy olqylyqtyń ornyn toltyrý maqsatynda baqylaý qosyndaryn ashý josparlanyp otyr. Bul balyq saýdasynyń zańsyz aınalymyn boldyrmaý úshin qajet. «Shyǵyndy kóp talap etpeıtin osy qurylym rezervat qyzmetkerleriniń jumystaryn jeńildetedi, tıimdiligin arttyrady. Alys qashyqtyqty da qadaǵalaýǵa múmkindik beretin arnaıy drondar alý kerek, biraq bul sharalar qoryqtaǵy ań-qustarǵa kesirin keltirmeýi tıis», dep atap ótti N.Noǵaev.
«Aq Jaıyq» tabıǵı rezervatynyń basshysy Nurbolat Kárimov birneshe týrıstik baǵyt jasalyp jatqanynan habardar etti. «Qoryq aýmaǵynda arnaıy súrleý joldar saldyq. Týrıster qyzmetkerlerimizdiń kómegimen serýendep, motorly qaıyqtarmen Kaspıı teńizine shyǵa alady. Arnaıy belgilengen jerlerde salmaǵy bes kılodan aspaıtyn balyqty qarmaqpen aýlaýǵa ruqsat etiledi. Rezervattyń baı tabıǵatyna sheteldik týrısterdiń qyzyǵýshylyǵy joǵary, qazir ınfraqurylym jaǵyn qarastyrýdamyz», deıdi N.Kárimov.
Kezinde ataǵy alysqa jetken «Atyraý balyq» zaýytynyń ornynda qazir qańyraǵan bos ǵımarattar ǵana tur. Iesiz sısternalardan tógilgen janar-jaǵar maı topyraqty lastap, qorshaǵan ortaǵa zııanyn tıgizýde. Keleńsiz jaǵdaıdy kórgen oblys ákimi tabıǵatqa keltirilgen zalaldyń eleýli-eleýsiz bolmaıtynyn aıtyp, qaramaǵyndaǵylarǵa tapsyrma berdi. Atyraý qalasynyń ákimi Alımuhammed Quttumuratulynyń aıtýynsha, qazir balyq óńdeý zaýytynyń balanstyq qunyn anyqtaý sharalary júrip jatyr. Osy jumystar aıaqtalǵannan keıin zaýyttyń ornyna jańa shaǵyn aýdan salynady. ATYRAÝ