Qazaqstan Respýblıkasynyń Tuńǵysh Prezıdenti – Elbasy Nursultan Nazarbaev belgilegen Jastar jyly elimizdiń daryndy balalaryna qurmet kórsetýdiń alǵashqy saltanatyn ótkizýdiń tańdaýy Qostanaı qalasyna tústi. Bul qostanaılyqtar úshin zor mártebe, maqtanysh ekeni aıan. Muny oblys ákimi Arhımed Muhambetov respýblıkalyq bedeldi balalar syılyǵynyń alǵashqy laýreattaryn quttyqtaǵanda da atap ótti.
– Elimizdiń bolashaǵyna balaıtyn jas daryndarǵa arnalǵan bul syılyqty tuńǵysh tapsyrýdyń Tobyl-Torǵaı óńirinde ótýi beker emes dep bilemiz. О́ıtkeni Qostanaı – halqymyzdyń tuńǵyshtaryn bergen topyraǵy qunarly, qasıetti ólke. Qos ózenniń boıynda tuńǵysh ret tarhan ataǵyn alǵan batyr, mámileger Shaqshaq Jánibek, tuńǵysh ǵalym Shoqan, tuńǵysh aǵartýshy Ybyraı, tuńǵysh qazaq romanyn jazǵan Mirjaqyp, tuńǵysh kásibı dáriger Muhamedjan Qarabaev, tuńǵysh jýrnalıst Muhamedjan Seralın, taǵy basqa irilerimiz týyp, balalyq shaǵyn ótkizdi. Búgin top jaryp, syılyq alatyn jas órenderimiz erteń elimizdiń kók baıraǵyn jelbiretip, talaı halyqaralyq deńgeıdegi asýlardy asyp, bıikterdi baǵyndyratynyna biz senimdimiz. Jas daryndardy jetistikterimen quttyqtaı otyryp, sizderdiń izdenýlerińizge, eńbek etýlerińizge Elbasy Nursultan Nazarbaevtyń syndarly saıasaty arqasynda elimizde barlyq jaǵdaı jasalǵandyǵyn aıtqym keledi. Bizdiń oblysta da munyń jaqsy mysaldary bar, – dedi Arhımed Begejanuly.
«Jas órken» balalar syılyǵy 14 atalym boıynsha elimizdiń 8 oblysynan kelgen 28 jas darynǵa jáne munyń syrtynda qosymsha atalymdarmen balalar men jasóspirimder uıymdary men gazetter, balalar taqyrybyna arnalǵan jobalarǵa tapsyryldy. Syılyqqa ıe bolǵan jas daryndar ishinde qarymy qazirden kóringen qalamgerler, ánshiler, bıshiler, sheshender, aqyndar, blogerler, sportshylar, zertteýshiler, taǵy basqalar bar. Olardyń árqaısysy osy syılyqqa deıin ózderin respýblıkalyq, halyqaralyq baıqaýlarda moıyndatyp úlgergen. Ana súti aýzynan ketpegen bala bolsa da, olardyń buǵanasy qatpaı jatyp, shyǵarmashylyq joly, tyndyrǵan isi tańǵalarlyq. Al osy baıqaýdyń bas júldesi «Jyl tańdaýy» atalymy ánshi bala Erjan Maksımge berildi. Reseıdiń «Birinshi arnasynyń» «Golos. Detı» telejobasyna qatysqannan keıin Reseıdiń áıgili mamandarynyń joǵary baǵasyna ıe bolyp, talanty jarqyrap kóringen 12 jasar balanyń aty qazir alysqa ketip úlgerdi, Erjannyń esimi búginde eldiń aýzynan túspeıdi. Ol Qostanaıǵa qurqol kelmepti, saltanatty sharaǵa qatysqandar aldynda án shyrqap berdi. Oǵan oblys ákimi Arhımed Muhambetov «Jas órken» syılyǵynyń mazmunyn syıdyrǵan músinsheni, dıplom, aqshalaı syılyq sertıfıkatymen birge altynmen aptalǵan eksklıýzıvti uıaly telefon syılady.
«Bolar eldiń balasy on besinde baspyn der» degen ǵoı halqymyz. Erjan on ekige endi keldi. Oıyn balasy kezi, biraq ol oıyn emes, oıdyń jeteginde, aldyna qoıǵan maqsaty bıik. Jýrnalısterdiń qaýmalap, «balańyz úlken sahnaǵa tym erte shyqty, bul sizdi ana retinde qobaljytpaı ma? Alda qandaı josparlary bar?» degen suraqtaryna anasy Gúlmıra Álibek senimdi jaýap berdi.
– Erjan osyǵan deıin kóptegen baıqaýlarǵa qatysty, ózin sahnada erkin, senimdi ustaıdy. Oǵan meniń de senimim mol. Alǵa qoıǵan úlken josparlary bar, biraq ony aıtqym kelmeıdi, balam áli jas, – dedi Gúlmıra. Qazaqtyń qara domalaq balasynyń daýysyna berisi Reseı, arysy Eýropa elderi tánti boldy. Qazir bir jaǵynan mekteptegi sabaǵyna, ekinshiden baıqaýlarǵa daıyndyq, mýzykalyq bilimin ushtaý jumystaryna úlgerýi tıis Erjannyń ýaqyty da tyǵyz. Ol anasymen birge Qostanaıdaǵy shara bastalar aldynda 10 mınýt qana buryn ushyp kelip, baıqaý aıaqtalǵan soń «Golos. Detı» shýly jobanyń qaıta ótetin fınalyna qatysý úshin jolsoqty bolyp, Máskeýge júrip ketti.
«Jas órken» balalar syılyǵyn alǵan úzdikter qatarynda qostanaılyq bes talant tóbe kórsetti. Mysaly, solardyń arasynda «Jas zertteýshi» atalymynyń jeńimpazy Aldııar Ámirov ınformatıkany qyzyǵa zertteıdi. Respýblıkalyq, halyqaralyq baıqaýlardan júldesiz oralǵan emes. Ol mektepti bitirgen soń programmıst mamandyǵyn ıgerip, zertteýmen, ǵylymmen aınalysýdy maqsat tutady. Arqalyq qalasyndaǵy Elena Sventýh basqaratyn, jas urpaqqa elge, jerge degen patrıottyq tárbıe berýdegi jarqyn isterdiń úlgisin kórsetip júrgen «Jas ulan» balalar men jasóspirimder ortalyǵy da syılyqqa laıyq dep tabyldy.
Daryndy balalardyń eńbegin eleýdi, olardy nasıhattaýdy maqsat tutqan jobanyń uıymdastyrylýy da erekshe ekenin aıtqymyz keledi. Úzdikterdi irikteýge ýaqyt, zaman talabyna saı ınternet jelisi arqyly buqara kópshiliktiń ózi atsalysty.
– Bul «Halyq súıiktisi» ulttyq syılyǵy aıasyndaǵy balalarǵa arnalǵan alǵashqy joba. Baıqaýdyń sharttary Feısbýk jelisinde jarııalandy. Jelide jurtshylyq 14 atalym boıynsha óziniń súıiktisin usyný kerek bolatyn. 300-den asa pikirler men usynystar jazyldy. Senator Birǵanym Áıtimova basqaratyn quramyna qoǵam belsendileri, Parlament depýtattary kirgen qazylar alqasy jumys istedi. Baıqaýdyń ekinshi satysyna ár atalymnan 4 úmitkerdi alyp, olardyń arasynda daýys berý bastaldy. Bul jerde qazylar alqasy baıqaý tártibi júıesiniń buzylmaýyn ǵana qadaǵalap otyrdy, al daýys berip, kimniń qandaı orynǵa, Gran-prıge kimniń laıyqty ekenin áleýmettik jelide jurtshylyq ózi sheshti, – deıdi «Respýblıka-О́ńir-Damý» qoǵamdyq qorynyń atqarýshy dırektory Álibek Báıneshov.
Mine, «Jas órken» balalar syılyǵyn alǵan jas daryndar osyndaı júıemen anyqtaldy. Taıynda ozǵan darabozdardy halyq ózi kóredi eken.
QOSTANAI