Onyń aıtýynsha, 450-ge tarta shara iske asyrylady. Onyń 229-y kólik ınfraqurylymyna, 153-i áleýmettik ınfraqurylymǵa jáne 66-sy turǵyn úı-kommýnaldyq sharýashylyqqa tıesili.
«Jobany iske asyrýǵa 2019-2021 jyldary respýblıkalyq bıýdjetten 90 mlrd teńge qarastyrylyp, onyń ishinde, 2019 jyly 30 mlrd teńge bólindi. 4 662 jumys orny qurylyp, 73 mektep pen balabaqsha, 14 emhana, 47 mádenıet úıi men sport nysany jóndeýden ótkiziledi, 12 deneshynyqtyrý-saýyqtyrý kesheni salynyp, 12 abattandyrý jobasy iske asyrylatyn bolady», dedi vıse-mınıstr.
Sondaı-aq 516 shaqyrym jol, 35 shaqyrym sýmen jabdyqtaý jelisi, 229 shaqyrym elektrmen jabdyqtaý, 136 shaqyrym gazben jabdyqtaý, 7 jylýmen jabdyqtaý nysany jáne onyń 20 shaqyrymdyq jelisi salynyp, jóndeledi.
«Osy jyly 700 myńǵa jýyq adam turatyn 52 aýyldyq eldi meken irikteldi. Basty nazar iri aýyldyq eldi mekenderge, ıaǵnı halyq sany kóp aýdan ortalyqtaryna, sol jerdegi ótkir ınfraqurylymdyq problemalardy tez arada sheshýge aýdaryldy. 1 aýdan ortalyǵyn qarjylandyrýdyń kólemi orta eseppen 670 mln teńgeni quraıdy. Jergilikti bıýdjetten qosa qarjylandyrýǵa 4,5 mlrd teńge nemese jalpy somanyń 15,8%-y baǵyttaldy», dedi E.Alpysov.
Jergilikti bıýdjetter men basqa da kózderden bolatyn qosa qarjylandyrýdyń aıtarlyqtaı úlesi Atyraý (84%), Qaraǵandy (32%), Aqtóbe (20%), Almaty (16%) oblystarynda kózdelgen.
Budan basqa, aýmaqtarda júıe quraıtyn iri kásiporyndardyń bıznestiń áleýmettik jaýapkershiligi sheńberindegi bıýdjetten tys qarajattary aýyl ınfraqurylymdaryn jańǵyrtýǵa tartylmaq.
2025 jylǵa qaraı óńirlik standarttar júıesine sáıkes barlyq aýyl turǵyndarynyń 80%-yn qajetti ıgilikter men qyzmettermen qamtamasyz etý josparlanýda.
«Respýblıkanyń 6,5 myń aýyldyq eldi mekeninde 7,7 mln astam adam nemese eldiń barlyq halqynyń 42%-y turady. Sońǵy 7 jyldyń ishinde qalalardaǵy turǵyndar sany shamamen 1,5 mln adamǵa artyp, 10,7 mln adamǵa jetti, al aýyl halqynyń úlesi 3,5%-ǵa qysqardy», dedi vıse-mınıstr.
«Aýyl – el besigi» jobasyn 2025 jylǵa deıin iske asyrý damý áleýeti joǵary jáne búginde 5,5 mln adam turatyn 1,8 myńnan astam aýyldyq eldi mekenderdiń áleýmettik jáne ınjenerlik ınfraqurylymyn jańǵyrtýǵa múmkindik beredi. Bul sondaı-aq aýyl men qala arasyndaǵy, damý deńgeıi ártúrli aýyldyq eldi mekender arasyndaǵy kóshi-qon úderisine oń áser etedi», dep atap ótti ol.
Sóıtip aldaǵy 7 jyl ishinde aýyl halqyn «basqarylatyn ýrbanızasııa» úderisterimen qamtý jáne ondaǵy turǵyndar sanyn 600 myń adamǵa ulǵaıtyp, 2025 jyly 6,1 mln adamǵa jetetin tirek aýyldarda ómir súrýdiń neǵurlym qolaıly ortasyn qurý kózdelýde.