Senattyń Konstıtýsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysynda «Qazaqstan Respýblıkasy men Lıtva Respýblıkasy arasyndaǵy bas bostandyǵynan aıyrýǵa sottalǵan adamdardy jáne medısınalyq sıpattaǵy májbúrleý sharalary qoldanylǵan adamdardy berý týraly shartty ratıfıkasııalaý týraly» zańynyń jobasy qaraldy, dep habarlady Senattyń baspasóz qyzmeti.
Shart 2017 jylǵy 24 sáýirde Vılnıýste jasalǵan bolatyn. Sharttyń maqsaty – sottalǵan adamdardyń jáne medısınalyq sıpattaǵy májbúrleý sharalary qoldanylǵan adamdardyń ózderiniń azamattyǵy tıesili qoǵamǵa qaıta aralasýyna járdem kórsetý.
Shartqa sáıkes taraptar bir-birine bas bostandyǵynan aıyrýǵa sottalǵan nemese medısınalyq sıpattaǵy májbúrleý sharalary qoldanylǵan adamdardy budan ári jazasyn ne emdeýin ózderi azamaty bolyp tabylatyn memlekette óteý úshin berýge mindettenedi. Qazirgi ýaqytta Lıtvada Qazaqstannyń sottalǵan azamattary joq jáne Qazaqstanda da jazasyn ótep jatqan Latvııa azamattary joq. Osy Sharttyń ratıfıkasııasy aldyn alý sıpatyna ıe.
Shartta sottalǵan adamdardy jáne medısınalyq sıpattaǵy májbúrleý sharalary qoldanylǵan adamdardy berý men odan bas tartý úshin naqty negizder kózdelgen. Osy Shart boıynsha Qazaqstan Respýblıkasynan ortalyq memlekettik organ Bas prokýratýra bolyp tabylady. Zań jobasy Palata qaraýyna berildi.