Beısenbi, 6 maýsym 2013 2:10
dáýlesker kúıshiniń shákirti Rymhan Ábilhanulynyń yjdaǵattylyǵymen jeke dısk bolyp tyńdaýshylarǵa jol tartty
Beısenbi, 6 maýsym 2013 2:10
dáýlesker kúıshiniń shákirti Rymhan Ábilhanulynyń yjdaǵattylyǵymen jeke dısk bolyp tyńdaýshylarǵa jol tartty
Shertpe kúıdiń sheberi Tólegen Mombekov esimi ónerdi qasterleıtin jurtshylyqqa keńinen málim. Bıyl osy talant ıesiniń týǵanyna 95 jyl tolýyna oraı jer-jerde túrli shyǵarmashylyq is-sharalar ótip jatyr. Sonyń biri Astanadaǵy Qazaq ulttyq óner ýnıversıtetiniń «Shabyt» ǵımaratyndaǵy osy joǵary oqý ornynyń aǵa oqytýshysy Rymhan Ábilhanulynyń «Saltanat» kúı keshi der edik. Oǵan ataqty jazýshy Ábish Kekilbaıuly, aqyn apamyz Farıza Ońǵarsynova, Parlament Májilisiniń depýtattary Gúlnar Seıitmaǵambetova men Orazkúl Asanǵazy jáne basqa da óner súıer jurtshylyq ókilderi qatysyp, kúmbirlegen kúı únine qulaq tosty.
О́mir boıy Sozaq óńirinde turyp, sol jerde qaıtqan Tólegen Mombekov muralary izdeýsiz, suraýsyz emes. Ulttyq óner ýnıversıtetiniń professory Janǵalı Júzbaı onyń týyndylaryn notaǵa túsirip, birneshe oqýlyqqa engizse, Qazaq ulttyq konservatorııasynyń professory Bilál Ysqaqov kúıshi murasyn arnaıy zerttep, shyǵarmalaryn kitap etip bastyrǵan eken. Biraq halqymyzdyń asyl qazynasyna aınalǵan Tókeńniń kúıleri osy kezge deıin bastan-aıaq jınaqtalyp, jeke dıskide jaryq kórmegen. Endi bul olqylyqtyń da orny tolǵandaı. Kúıshiniń 95 jyldyǵyna oraı Qazaq ulttyq óner ýnıversıtetiniń aǵa oqytýshysy Rymhan Ábilhanuly Tólegen Mombekovtiń 29 kúıin oryndap, jeke dıskisin shyǵardy. Osylaısha, tyńdaýshylarǵa arnaıy tartý jasaýy Rekeńniń óner jalǵastyǵy ǵana emes, ustazyna degen zor qurmeti dep bilgenimiz jón.
Rymhan Ábilhanuly shertpe kúıdiń syryn sezinip, túbine boılaýǵa talpynyp júrgen jas kezinde Sozaqtaǵy Tókeń aýylyna arnaıy baryp, kúılerin úırenip, ómir tarıhynan habardar bolyp, kúıshi murasyna myqtap den qoıǵan eken. Tólegen Mombekovtiń ózi de shákirtiniń sheberligine, ónerge degen rııasyz yntyqtyǵyna rıza bolǵany shyǵar, 1992 jyly shildede Ońtústik Qazaqstan oblysynyń Sholaqqorǵan aýdandyq mádenıet úıinde «Otyrar sazy» orkestri múshelerimen kezdesken sátinde: «Qudaıǵa shúkir, kúılerimdi durys tartyp júrgen jastar bar. Olardyń ishinde Rymhan balama rızamyn», degen sózi de osy keshte eske alyndy.
«Búgingi tartylǵan kúıler zaldaǵy tárbıeli adamdardyń ózin tárbıeledi», dep kesh sońynda Memlekettik syılyqtyń laýreaty, belgili óner zertteýshisi Áshirbek Syǵaı aıtqan sóz osy keshke berilgen ádil baǵa boldy.
Jadyra ShAMURATOVA.
ASTANA.