«Qurmetti senator» mártebesi berildi

Otyrysty ashqan D.Nazarbaeva Memleket basshysy Qasym-Jomart Toqaevtyń Qazaqstan Prezıdenti laýazymyna kirisý kezinde Tuńǵysh Prezıdent – Elbasy N.Nazarbaevqa «Qurmetti senator» mártebesin berý jóninde usynys jasaǵanyn eske saldy.

«Memleket basshysynyń usynysyn qoldaı otyryp, Senat bıýrosynyń músheleri «Qurmetti senator» mártebesi týraly ereje bekitti. Erejege sáıkes «Qurmetti senator» mártebesin berý jónindegi sheshim Senat otyrysynda qaralady. Osy másele boıynsha qandaı pikirlerińiz bar?» dedi D.Nazarbaeva.

Alǵashqy bolyp sóz kezegin senator Talǵat Musabaev aldy. Ol Qazaqstan par­lamentarızmin damytý úderisi Qazaq­stan Respýblıkasy Tuńǵysh Prezı­dentiniń aqylǵa salynǵan saıası strategııasynyń nátıjesi bolyp tabylatynyn atap ótti. «Bıliktiń barlyq tarmaqtary arasynda tejemelik ári tepe-teńdik júıesin qurý arqyly el Parlamenti tek zań shyǵarý tetigine ǵana emes, memlekettiń ornyqty damýyna baǵyttalǵan maqsattaryna da jaýap beretin bedeldi memlekettik organ boldy», dedi T.Musabaev.

Vladımır Volkov egemendiktiń alǵashqy kúninen bastap Tuńǵysh Prezıdent Qazaqstanǵa joǵary sapaly zańdardy qabyldaýǵa qabiletti kásibı Parlament qajet dep málimdegenin atap ótti. «Sol jyldary saıası jáne qoǵam qaıratkerleriniń, ǵalymdardyń arasynda jańa Parlament úlgisine qatysty ortaq pikir bolǵan joq. Bireýleri eki palataly qurylym ıdeıasyn qoldady, ekinshisi Joǵarǵy Keńesti saqtaýdy talap etti. Sol qıyn kezeńde elimizdiń taǵdyry úshin jaýapkershiliktiń búkil júgin bizdiń Tuńǵysh Prezıdentimiz óz moınyna aldy», dedi V.Volkov. Ol qos palataly Parlament qazirgi zamanǵy tarıhynda Tuńǵysh Prezıdent júrgizip otyrǵan reformalarǵa zańnamalyq qoldaýdy qamtamasyz ete otyryp, ózine júktelgen joǵary mıssııany júzege asyryp kele jatqanyna toqtaldy.

Elimizdiń konstıtýsııalyq negizderin qalyptastyrýǵa, qos palataly Parla­ment­tiń qurylýyna, Qazaqstannyń shet­­elderdegi bet-beınesiniń qalypta­sýy­na, elimizdiń halyqaralyq arenadaǵy rólin arttyrýǵa qosqan Elbasynyń baǵa jetpes úlesi týraly aıta kelip, senator Álı Bektaev búgingi tańda Nursultan Nazarbaev – búkil álem moıyndaǵan qaı­rat­ker ekenin atap ótti. «Alpaýyt mem­­­le­ket­ter basshylarynyń bizdiń El­basy­ny alaqandaryna salyp, tóbesine kóterýi búkil qazaq halqyna, táýelsiz Qazaq­­stanǵa kórsetilgen qurmet dep esep­teýi­miz kerek», dedi ol. Senator Qytaı mem­le­ketiniń eń joǵary marapaty «Dostyq» or­deniniń; «Túrki tildes memle­ket­ter yn­ty­­maqtastyq keńesiniń ǵumyr boıǵy Qur­­­metti tóraǵasy» jáne «Joǵa­ry Eýra­zııa­­­lyq ekonomıkalyq keńes­­tiń Qur­metti tór­aǵasy» mártebesiniń N.Nazar­baevqa be­rilýi bizdiń elge, eli­mizdiń tuń­ǵysh bas­shy­­syna kórsetilgen zor qurmet ekenin aıtty.

Sonymen Parlament Senaty­nyń otyrysynda Qazaqstan Respýblıka­synyń Tuńǵysh Prezıdenti-Elbasy N.Á.Nazarbaevqa «Qurmetti senator» mártebesin berý jóninde Senat qaý­lysy qabyldandy. Qazaqstan memle­keti­niń negizin qalaýshy Qazaqstan Res­pýb­lıkasynyń Tuńǵysh Prezıdenti – Elba­syna «Qurmetti senator» mártebesin berý Konstıtýsııany, adam men azamattyń qu­qyq­t­ary men bostandyqtaryn qorǵaý­daǵy, el damýynyń strategııalyq baǵytyn aıqyndaýdaǵy, qoǵam birligin qamtamasyz etýdegi tarıhı eńbegin moıyndaýdyń kórinisi bolyp tabylady.

Qazaqstan Respýblıkasynyń demo­kra­­tııalyq, zaıyrly, quqyqtyq jáne áleý­mettik memleket retinde konstı­tý­sııa­­lyq-quqyqtyq negizderin qalyp­tas­­tyrýǵa, sondaı-aq otandyq parlamen­ta­rızm­­niń qalyptasýy men damýyna zor úles qos­qany úshin Qazaqstan Res­pýb­lıka­sy­nyń Tuńǵysh Prezıdenti – Elbasy­na «Qu­r­­met­ti senator» mártebesi berilip otyr.

Otyrys barysynda birinshi taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Qytaı Halyq Respýblıkasy arasyndaǵy saýda-ekonomıkalyq yntymaqtastyq týraly kelisim ratıfıkasııalandy.

Qujat saýdany retteý men yntymaq­tas­tyqtyń aýqymdy salalaryn: ishki na­ryqty qorǵaý sharalary, saýdadaǵy teh­nıkalyq kedergiler, sanıtarlyq jáne fı­tosanıtarlyq sharalar, kedender yn­ty­maqtastyǵy, zııatkerlik menshik, bá­se­ke­lestik, memlekettik satyp alý sa­la­­syn­daǵy yntymaqtastyq, salalyq yn­ty­maqt­astyq, elektrondy saýdany qamtıdy.

Senat basshysy kólik ınfraqury­lymyn damytýdaǵy birqatar ózekti máseleni, atap aıtqanda, vagon parkindegi tapshylyq pen júk tasymaly kezinde paıda bolatyn kezekterdi atap ótti. Sondaı-aq Darıǵa Nazarbaeva Qazaqstan – Qytaı shekarasyndaǵy kontrabanda máselesin taǵy da kóterdi.

Senatorlar Qazaqstan Respýblıkasy men Lıtva Respýblıkasy arasyndaǵy bas bostandyǵynan aıyrýǵa sottalǵan adamdardy jáne medısınalyq sıpattaǵy májbúrleý sharalary qoldanylǵan adamdardy berý týraly shartty ratıfıkasııalady. Shartqa sáıkes taraptar bas bostandyǵynan aıyrýǵa sottalǵan nemese medısınalyq sıpattaǵy májbúrleý sharalary qoldanylǵan adamdardy jazasyn odan ári óteýge nemese emdelýden ótý úshin azamattyǵy bar elge berýge mindettenedi. Sottalǵan adamdardy jáne medısınalyq sıpattaǵy májbúrleý sharalary qoldanylǵan adamdardy berý úshin jáne odan bas tartýǵa naqty negizder shartta kózdelgen.

Otyrys barysynda senatorlardyń depýtattyq saýaldary jarııa etildi. Onda Dýlat Qusdáýletovtiń zańnamalyq prosesti jetildirý máseleleri boıynsha, Rysqalı Ábdikerovtiń baý-baqsha jáne saıajaı sharýashylyǵyn damytý, Ǵumar Dúısembaevtyń «Muqyr – Qulsary» avtojolynyń ýchaskesin qaıta jańartýdy qarjylandyrý, Sáýle Aıtpaevanyń balalar eńbegi máseleleri, Ábdáli Nuralıevtiń aýyl sharýashylyǵy ónimderin qaıta óńdeý salasyndaǵy ǵylymı jobalardy qarjylandyrý, Birǵanym Áıtimovanyń UQK shekara qyzmetine arnalǵan kemelerdi satyp alýdy qarjylandyrý qajettigi, Serik Jaqsybekovtiń kedendik ákimshilik jáne kedendik statıstıkanyń obektıvtiligi, Talǵat Musabaevtyń radıotelestansalardy paıdalanýǵa berý merziminiń buzylý sebepteri jáne sıfrly telehabarlardy iske asyrý josparlary týraly saýaldary boldy.