Qala jurtshylyǵynyń, qoǵamdyq uıym ókilderiniń qatysýymen ótken ǵasyrdyń otyzynshy jyldary jazyqsyz japa shekkenderdiń qurmetine arnalǵan eskertkish monýmentke gúl shoqtary qoıyldy.
Qaraly mıtıngide aımaq basshysynyń orynbasary Rýslan Álishev, «Pamıat» qoǵamdyq qorynyń tóraǵasy Bolat Saǵyndyqov, «Barbýng» túrik etnomádenı birlestiginiń jetekshisi Rashıd Nadırov, taǵy basqalary sóılep, stalındik zulmat kezinde qyrshynynan qıylǵan, ıtjekkenge aıdalǵan, atý jazasy sekildi aýyr aıyptar taǵylǵan bozdaqtar jaıly tebirene áńgimeledi.
«1997 jyldan beri saıası qýǵyn-súrgin qurbandaryn eske alý kúni jyl saıyn atap ótiledi. Oblys boıynsha 7,6 myńǵa jýyq adam teperish kórse, 1500-deıi sheıit bolǵan. Olardyń qatarynda meniń ákem de atý jazasyna kesilgen. Súıeginiń qaıda qalǵany belgisiz», deıdi Bolat aǵa.
Jurtshylyq M. Jumabaevtyń eskertkishine de taǵzym etip, gúl shoqtaryn qoıdy.
Soltústik Qazaqstan memlekettik muraǵatynda «Máńgilik muń–sherli shemen" atty kórme uıymdastyryldy. Kórmege qatysýshylar jappaı saıası qýǵyn-súrginnen zardap shekken soltústikqazaqstandyqtardyń qıly taǵdyrynan muńly syr shertetin qujattarmen jan-jaqty tanysty. Máselen, M. Jumabaevtyń tólqujattary men jaýap hattary,obkom qyzmetkerleriniń tizimi, Qazaqstanǵa jer aýdarylǵan halyqtyń dıagrammasy sııaqty qundy qujattar qoıyldy.
Muraǵatshy Zámzágúl Zakırınanyń aıtýynsha, Máskeý muraǵatynan da qýǵyn-súrginge ushyraǵandardyń tarıhyna, ómirine, qyzmetine qatysty kóptegen qujattar ákelinipti.