Kelissóz barysynda Memleket basshysy Eýropalyq keńes tóraǵasynyń sapary Qazaqstan men Eýropalyq odaq arasyndaǵy baılanystardyń damýyna tyń serpin beretinin aıtty.
– Sizdiń bul saparyńyzdyń máni zor. Bizdiń ózara tıimdi yntymaqtastyǵymyz tek keńeıe beretinine senimdimin. Eki tarap ta kózdegen maqsatqa jetýge múddeli bolǵandyqtan, bizdiń qarym-qatynasymyzdyń bolashaǵy jarqyn, – dedi Qasym-Jomart Toqaev.
Donald Týsk Qazaqstanǵa saparmen kelýge shaqyrǵany úshin Memleket basshysyna rızashylyq bildirdi.
– Qonaqjaılyq tanytqandaryńyz úshin kóp rahmet. Bizdiń sizdermen tájirıbemiz ben ózara qarym-qatynastarymyzdyń tarıhy ortaq. Geografııalyq araqashyqtyqtyń úlken bolǵanyna qaramastan, Qazaqstan biz úshin óńirlik turǵydan ǵana emes, sondaı-aq jahandyq deńgeıde de mańyzdy ári turaqty seriktes sanalady, – dedi Eýropalyq keńes basshysy.
Áńgimelesý barysynda taraptar ártúrli saladaǵy Qazaqstan men Eýropalyq odaq yntymaqtastyǵynyń perspektıvalaryn talqylady. Árıne, bul kelisimder aldymen ózara senimge negizdelgen dostyq qarym-qatynastardy qamtıdy. Ortalyq Azııa óńirindegi kóshbasshy retinde Qazaqstan tarapy táýelsizdik jyldarynda Eýropanyń aýqymdy jobalaryn abyroımen júzege asyrǵan bolsa, ekinshi tarap ta qashannan Qazaqstannyń ótinishterin jerde qaldyrǵan emes. Aıtalyq, Eýropadaǵy qaýipsizdik jáne yntymaqtastyq uıymyna elimizdiń tabysty jetekshilik etýi – osynyń jarqyn kórinisteriniń biri.Kedergisiz kelissózder
Álemge belgili saıasatker D.Týsktiń ómirbaıanynda onyń úsh tildi – aǵylshyn, orys jáne polıak tilderin erkin biletindigi kórsetilgen. Al Qazaqstan Prezıdentiniń kemi bes tildi biletindigi anyq. Sondyqtan da týmysynan dıplomat Q.Toqaevtyń árbir kelissózi ústeldiń arǵy betindegi qonaǵymen ońaı órbıtini ras. Mine, kezekti tabysty kelissózderden keıin Memleket basshysy men Eýropalyq keńes tóraǵasy ekeýara aıtylǵan áńgimelerdiń mán-mazmunyna baılanysty buqaralyq aqparat quraldary ókilderi aldyna shyǵyp málimdeme de jasady.
Qasym-Jomart Toqaev málimdemesin tolyq memlekettik tilde jasap, sońǵy tujyrymdaryn aǵylshynsha qorytty.
Memleket basshysy áýeli Qazaqstanǵa resmı saparmen kelgeni úshin Eýropalyq keńes tóraǵasyna rızashylyq bildirip, sapardyń Saıası qýǵyn-súrgin jáne asharshylyq qurbandaryn eske alý kúnimen tuspa-tus kelgeniniń sımvoldyq máni baryn aıtty.
– Eýropalyq keńestiń qabyldaǵan jańa strategııasy men sizdiń saparyńyz Ortalyq Azııa elderiniń saıası-ekonomıkalyq ornyqty jáne qaýipsiz damýy úshin eýropalyq taraptyń múddeli ekeniniń dáleli, – dedi Qazaqstan Prezıdenti.
Qasym-Jomart Toqaev Donald Týsktiń sapary Nur-Sultan men Brıýssel arasyndaǵy dıalogqa tyń serpin beretinin atap ótti.
– Qazaqstan Ortalyq Azııa elderiniń ishinde Eýropalyq odaqpen «ekinshi býyn» kelisimine qol qoıǵan birinshi el boldy. Bul bizdiń baılanystarymyzdyń berik ekenin kórsetedi. Biz Eýropa elderiniń bárimen strategııalyq, seriktestik qatynastarymyzdy nyǵaıtýǵa belsendi atsalysamyz. Qazaqstannyń «Eýropaǵa jol» baǵdarlamasy men Eýropalyq odaqtyń Ortalyq Azııaǵa arnalǵan strategııasy ártúrli saladaǵy tabysty is-qımyldarymyzdyń úlgisi bolyp tabylady. Osy jetistikterdi eskere otyryp, Eýropalyq odaqpen yntymaqtastyǵymyzdyń keleshegi jaqsy bolatynyna senimdimiz, – dedi Memleket basshysy.
Dástúrli dıplomatııaǵa tán úderis boıynsha Donald Týsk te Qazaqstan Prezıdentine qonaqjaılyqpen qabyldaǵany jáne Nur-Sultanǵa resmı saparmen alǵash kelýge múmkindik týǵyzǵany úshin taǵy da rızashylyq bildirdi.
– Eýropalyq odaq Ortalyq Azııamen seriktestikti tereńdetý úshin óz strategııasyn aıqyndady. Qazaqstan – óńirdegi Eýropalyq odaqtyń negizgi seriktesi. Elderińiz Batys pen Shyǵystyń, Reseı men Ońtústik Azııanyń arasyndaǵy kópir bolyp sanalady. Eýropalyq odaq – Qazaqstannyń negizgi saýda jáne ınvestısııalyq seriktesi, – dedi D.Týsk.
Mártebeli meıman eń bastysy, Eýropalyq odaq elderi Qazaqstanmen seriktestikti jáne yntymaqtastyqty keńeıtý týraly kelisimdi jýyrda ratıfıkasııalaıtynyn jetkizdi. Brıfıng barysynda Qasym-Jomart Toqaev pen Donald Týsk jýrnalısterge kelissóz barysynda jahandyq jáne óńirlik máseleler jóninde, sondaı-aq energetıka, kólik jáne sıfrly kommýnıkasııa salalary boıynsha ekijaqty yntymaqtastyqty tereńdetý týraly keń kólemde jemisti pikir almasqandaryn aıtty.
Jalpy, bul sapardyń mańyzdylyǵy Eýropalyq odaqtyń áleýetimen de anyqtalatyny ras jáne ol álemdegi eń iri ekonomıkasy bar álemniń 80 el úshin basty saýda seriktesi ekeni de belgili. Aıtalyq, byltyr taýar aınalymy 37 mlrd AQSh dollaryn, sonyń ishinde Qazaqstannan eksport kólemi 31 mlrd dollardy qurasa, ımport 6,7 mlrd dollarǵa jetken. Bul 2017 jylǵy deńgeıden 23 paıyzǵa joǵary jáne elimizdiń syrtqy saýdasynyń jalpy kóleminiń 40,3 paıyzyna sáıkes keledi.
Qazaqstan Prezıdenti Qasym-Jomart Toqaev pen Eýropalyq keńestiń tóraǵasy Donald Týsk, sondaı-aq «ALJIR» memorıaldy-mýzeı keshenine bardy. Memleket basshysy Qasym-Jomart Toqaev pen Eýropalyq keńestiń tóraǵasy Donald Týsk qasiret qaqpasynyń aldynda bas ıip, saıası qýǵyn-súrgin qurbandarynyń rýhyna taǵzym etti.
Qazaqstan Prezıdenti men Eýropalyq keńes basshysy «ALJIR» memorıaldy-mýzeı keshenindegi eskertkish taqtaǵa gúl shoǵyn qoıyp, saıası qurbandardyń ómiri jaıly málimetter jınaqtalǵan mýzeı keshenin aralap kórdi.