Tarıhy el egemendigimen egiz jasasyp kele jatqan aıtýly baıqaý óziniń 28 jyldyq jylnamasynda jas ánshilerdiń tutas tolqynyn tárbıelep shyǵardy. Talaı talanttyń baǵyn ashyp, ónerdegi baǵytyn aıqyndady. «Jas qanattan» túlep ushqan Medeý Arynbaev, Erlan Kókeev, Nurlan Abdýllın, Baqyt Shadaeva, Janar Duǵalova, Mádına Sádýaqasova, Marjan Arapbaeva, Dımash Qudaıbergen bastaǵan talanttar shoǵyry búginde otandyq án óneriniń maqtanyshy.
Osy bir ádemi úrdisti úzbeı, jyl saıyn ónerli órender júregine úmit otyn jaǵyp kele jatqan juldyzdy jobanyń qanatyn keńge jaıyp, kásibı kelbet qalyptastyrýyna baıqaý prodıýseri Murat Erǵalıevtiń sińirgen eńbegi zor.
– «Jas qanat» ýaqyttyń synynan súrinbeı ótti, oǵan qatysýdyń ózi – jeńis. Baıqaý negizinen olımpıada júıesimen ótedi jáne sondaı qaǵıdany nasıhattaıdy. Bizde bastysy jeńis emes, qatysý. Sebebi, «Jas qanat» óz qatysýshylaryna elimizdiń eń iri sahnalarynyń birinde óner kórsetý múmkindigin ǵana syılap qoımaı, árbir ónerpazǵa ózine degen úlken senim de beredi. Sahna syrtynda ol úshin ýaıymdap, qoldaý kórsetetin naǵyz janashyr dostardyń baryn túsinip, ózi úshin mańyzdy shyǵarmashylyq orta qalyptastyra alady. Baıqaýdyń basty qundylyǵy da osynda, bizdińshe. Al bul jobadan tys ýaqytta da jas oryndaýshylarǵa ózderin kásibı turǵyda ary qaraı damýyna taptyrmas tájirıbe, deıdi prodıýser.
Elimizdegi erekshe tanymaldyqqa ıe aıtýly mýzykalyq joba Beıbitshilik jáne kelisim saraıynyń sahnasynda mamyrdyń 31-i men 2 maýsym aralyǵynda ótti. Bıyl «Jas qanatqa» respýblıkanyń túkpir-túkpirinen barlyǵy 14 úmitker iriktelip alyndy. Olardyń arasynda Nur-Sultan, Almaty, Shymkent, Qaraǵandy, Kókshetaý, О́skemen, Jambyl jáne Balqash qalalarynyń namysyn qorǵaıtyn ónerli órender bar. Atap aıtsaq, Dıdar Ábdihalyq (Shymkent), Baýbek Aıdarbekov (Jambyl oblysy), Ádil Baltabaev (Kókshetaý), Aıjan Dáýkenova (О́skemen), Aıbek Jeksen (Almaty), Aıym Imasheva (Semeı), Aqerke Kópjasarova (Nur-Sultan), О́rken Mırov (Qaraǵandy), Aleksandr Nam (Shyǵys Qazaqstan oblysy), Oljas Ospan (Semeı), Dárıǵa Satarova (Nur-Sultan), Serikbol Seıilhanov (Semeı), Janbolat Uzaqbaı (Nur-Sultan) jáne «Han» trıosy baıqaýdyń negizgi júldesi – «Altyn qanattyń» ıesi bolýǵa baryn salyp baqty. 3 saıystyq kezeń boıynsha óner kórsetken qatysýshylar kásibı mýzyka mamandarynyń baǵasymen qatar shyǵarmashylyq úlken tájirıbe mektebinen de qatar ótti.
«Jas qanattyń» jıyrma toǵyzynshy tolqyn jeńimpazyn anyqtaýǵa belgili mýzyka mamandary: professor Raısa Musahodjaeva, «Astana Opera» teatrynyń bas hormeısteri Erjan Dáýitov, kompozıtor Serik Erkimbekov, Kazakh-TV telearnasynyń halyqaralyq aqparat bóliminiń meńgerýshisi Lázzat Shataeva jáne «Jas qanat» juldyzyn jaqqan jobanyń tól perzentteri – Medeý Arynbaev, Marjan Arapbaeva, Qaırat Baekenov, Mádına Sádýaqasova bastaǵan ánshiler atsalysyp, tórelik etti.
Bıylǵy baıqaýdyń tek qatysýshylar úshin ǵana emes, qazylar úshin de asa jaýapty bolǵanyn mamandar jasyrmady. О́ıtkeni estrada aspanynda jańa juldyzdyń jaǵylyp, jas oryndaýshynyń úlken sahnadaǵy alǵashqy qadamyna tórelik aıtý – tarıhı hám jaýapty qadam. О́zderine júktelgen salmaǵy zil batpan senimdi abyroımen alyp shyǵýdy kózdegen sarapshylar barynsha ádiletti bolý úshin de baryn salypty.
Sóıtip, «Jas qanat» kýbogynyń ıesin anyqtaýǵa arnalǵan gala-konsertte aqtyq márge jetken 5 úmitkerdiń arasynan úzdik 3 jeńimpaz tańdaldy. «Júzden júırik, myńnan tulpar» shyqqan ónerpazdar kásibı oryndaý sheberligi men upaı sanyna baılanysty I, II jáne III oryndy ózara bólisti. Baıqaý qorytyndysy boıynsha, qazylar alqasynyń biraýyzdan qoldaýymen «Jas qanattyń» bas júldesi – «Altyn qanat» kýbogyna Shymkent qalasynan kelgen jas daryn Dıdar Ábdihalyq laıyq dep tanyldy. «Kúmis qanatty» elordalyq Janbolat Uzaqbaı enshilese, kókshetaýlyq Ádil Baltabaev «Qola qanattyń» ıegeri atandy. Al az ǵana upaı sanymen dostaryna jol bergen Oljas Ospan (Semeı) men Aqerke Kópjasarova baıqaýdyń dıplomanty atanyp, arnaıy dıplommen marapattaldy.
Sondaı-aq, bıylǵy baıqaýdyń burynǵylardan taǵy bir ereksheligi – marapattaý rásimine konkýrstan tys taǵy birneshe arnaıy atalym qosylypty. Ol – «Jas Qanat sultanyn» anyqtaý. «Mıss Qazaqstan» baıqaýynyń jeńimpaz arýlarynyń tańdaýymen, Balqash qalasynan kelgen «Han» trıosy úshinshi vıse-mıster atansa, Oljas Ospan men Janbolat Uzaqbaı birinshi jáne ekinshi vıse-mıster ataǵyn teńdeı bólisti. Al arýlardyń negizgi tańdaýy biraýyzdan Dıdar Ábdihalyqqa túsip, jas talant baıqaýdyń bas júldesimen qosa, «Mıster «Jas qanat» ataǵan da qatar enshiledi. «Jas Qanattyń» qatysýshylarǵa usynǵan tosynsyıy munymen taýsylmady. Jobanyń aqparattyq seriktesteri – «Astana» radıosy Janbolat Uzaqbaıdyń avtorlyq ánine bir jylǵa rotasııa syılasa, baıqaýdyń eń jas qatysýshysy Aqerke Kópjasarovaǵa ulttyq dástúrdi saqtaǵany úshin «Habar» agenttigi atanynan arnaıy júlde berildi. Al Nur–Sultan qalasy ákimi Baqyt Sultanovtyń arnaıy júldesine jartylaı fınalıst Aıym Imasheva ıe boldy. Mine, osylaısha ádemi notada máresine jetken baıqaý jas ánshilerdi óner áleminiń jańa bir belesine shaqyryp, armandaryna qanat baılaǵandaı. Jarys emes, dostyq saltanat qurǵan joba qatysýshylary qorytyndy keshti kóterińki kóńil kúıde «Jas qanattyń» ánuranymen támamdady.