Qaraǵandy oblysyndaǵy Jáırem kentinde «Kazsınk» kompanııasynyń demeýshiligimen jańa boks zaly ashyldy. Buǵan deıin balǵyn boksshylar jergilikti mádenıet úıiniń bir buryshynda jattyǵyp kelgen bolatyn.
Endi keń de jaryq, barlyq qajetti quraldarmen jabdyqtalǵan zalda boksshylar ǵana emes, balýandar men sporttyq oıyn túrimen shuǵyldanatyn áýesqoılar da ózderiniń súıikti isimen aınalysa alady.
Jańa zaldyń tusaýkeser rásimi saltanatty túrde ótkennen keıin, 2007-2008 jyldary týǵan balalar arasynda Jáırem kentiniń birinshiligi uıymdastyryldy.
Jalpy, Jáırem kentinde sporttyń boks túrine degen qyzyǵýshylyq joǵary. Mundaǵy Rymǵalı Muzdybaev syndy bapkerdiń qaramaǵynda 70-ten astam bala jattyǵady. Jáıremnen shyqqan belgili bylǵary qolǵap sheberleri de joq emes. Mysaly, el quramasynyń múshesi, halyqaralyq dárejedegi sport sheberi Vıoletta Knıazeva jergilikti boks úıirmesiniń túlegi.