- Forým – bizdiń jas muǵalimderdiń jeke bastamasy. Jas muǵalimniń motıvasııasyn arttyrý maqsatynda sonymen qatar Facebook, telegram sııaqty tanymal áleýmettik jelilerdi paıdalana otyra tájirıbe almasý platformasyn qurýdy kózdeımiz. Osylaısha, muǵalimder arasynda bilim almasý, árqaısymyzdyń tıimdiligin arttyrady, - deıdi Taldyqorǵan qalasyndaǵy Nazarbaev Zııatkerlik mektebi dırektorynyń oqý jónindegi orynbasary Vıktor Sosın forýmnyń maqsaty jaıynda.
Jas ustazdar pedagogıkalyq sheberhanalarǵa, kásibı turǵydan, jeke tulǵa retinde damýǵa arnalǵan ádistemelik, art sessııa, ártúrli komandalyq jáne kreatıvti damytýǵa arnalǵan trenıngterine qatysty. Zııatkerlik mekteptiń spıkerleri óz ádistemelerin jańa formatta usyndy.
- Bul forýmda bizge belgili ádis-tásilderdiń «Mozaıka», «Raft», «Únsiz kıno», «Venn dıagrammasy» qyr-syryn, maqsatyn naqty aıqyndap berdi. Kóptegen kreatıvti oılaýǵa ıtermeleıtin tapsyrmalar oryndadyq. Qalaı ustaz-bloger jáne salaýatty ómir saltyn ustanatyn tabysty maman bolýdyń joldaryn qarastyrdyq. Sondaı-aq mýzykalyq bilim de berdi, art-sessııa kezinde qolóner buıymdaryn jasap, biraz demalyp qaldyq. Fleshmob ta bıledik, án de saldyq. Jas ustazdar forýmynda bilim kókjıegim keńeıip, ózime úlken ádistemelik kómek aldym,- deıdi Tekeli qalasynyń №2 orta mektebiniń qazaq tili men ádebıeti pániniń muǵalimi Gúljazıra Ordenbek.
Jas muǵalimder forýmynyń arnaıy qonaǵy bolyp «Nazarbaev Zııatkerlik mektepteri» derbes bilim berý uıymy tóraǵasynyń orynbasary Aıdana Shılıbekova, OYLA atty tanymal ǵylymı basylymnyń redaktory Almas Ordabaev jáne Taldyqorǵan qalasynyń ákimi Ǵalymjan Ábdraımov shaqyryldy.
- Qazirgi tańda muǵalim jalǵyz aqparattyń kózi bolýdan qaldy. Naqty bilim ózektiligin joǵaltty. Endi aqparatpen jumys isteı bilý, ıaǵnı ony ómirde qoldaný múmkindigi áldeqaıda mańyzdy, sondyqtan muǵalimniń róli de ózgerip jatyr, - dep Almas Ordabaev óz pikirin bildirdi.
Oblystyq jas muǵalimder forýmy Nazarbaev Zııatkerlik mektep oqýshylarynyń merekelik konsertimen aıaqtaldy.