QR Premer-mınıstri Asqar Mamın Úkimet otyrysynda aýyldyq eldimekenderdi sýmen qamtamasyz etý kórsetkishi joǵary bolyp turǵan Almaty jáne Qyzylorda oblysy ákimdikteriniń tájirıbesin atap ótti.
Oblystyq energetıka jáne turǵyn úı-kommýnaldyq sharýashylyq basqarmasynyń basshysy Medet Ýsaınnyń Qyzylorda oblysynda ortalyqtandyrylǵan sýmen qamtamasyz etýde birqatar jetistikke qol jetkizgendigin aıtady.
"2017 jyldyń maýsym aıyna deıin Qyzylorda oblysynda oqshaý aýyz sý júıesin paıdalanatyn 10 mekeme jumys istedi. Alaıda, osy mekemeler tutynýshylardy aýyz sýmen úzdiksiz qamtamasyz ete almady. Sebebi, jergilikti jerde kásibı mamandardyń tapshylyǵy, materıaldyq-tehnıkalyq bazanyń álsizdigi, arnaıy tehnıkalarynyń bolmaýy, tómen jáne ár túrli tarıfpen sýmen jabdyqtaý júıesin durys paıdalanbaýǵa ákeldi. Sondyqtan oblystaǵy "QazSýShar" mekemesi "Aral" fılıalynyń materıaldyq-tehnıkalyq áleýetin paıdalaný úshin, aýdandardaǵy lokaldy sý berýshi mekemelerdi Fılıaldyń teńgerimine berip, respýblıkada alǵash bolyp óńirde Biryńǵaı operator quryldy", - dedi M.Ýsaın.
Biryńǵaı operator qurý nátıjesinde birqatar mańyzdy kórsetkishterge qol jetkizildi. Máselen, táýlik boıy sý alatyn aýyldyq eldimekender sany 88-den 145-ke deıin kóbeıdi, oqshaý sý paıdalanýshylarǵa biryńǵaı tarıf bekitildi.
Búginde Qyzylorda oblysynyń áleýmettik-ekonomıkalyq damýynyń 2019-2022 jyldarǵa arnalǵan Keshendi jospary bekitilgen. Keshendi josparǵa áleýmettik mańyzy bar jalpy quny 29 mlrd.teńgeni quraıtyn sýmen jabdyqtaý jáne sý burýdyń 14 jobasy engizildi. Osy jobalar iske asqan kezde 111 myń adam sapaly aýyz sýmen qamtylatyn bolady.
Qyzylorda oblysy