Túrme qyzmetkerleri men jazasyn óteýshiler «qylmysker» aıýdy erkeletip Katıa dep atap ketipti. О́z temir torynan eshqaıda shyqpaǵan ony kútip, baptaǵan da jazasyn óteýshiler eken.
Baıǵus ańnyń ne úshin túrmege qamalǵanyna toqtalar bolsaq, onyń basynan ótken shyrǵalań tarıhy on bes jyl buryn bastalǵan. 2004 jyly aty-jóni bizge beımálim bir sırk úıretýshisi týrıstik agenttikten qaryzǵa jarty mıllıon teńge aqsha alyp, aıýdy jergilikti «Belaıa ıýrta» lagerine kepil retinde qaldyryp ketken eken. Al jyrtqysh ań sol kezderi eki adamǵa shabýyl jasap úlgergen kórinedi. Alǵash ret Qostanaıǵa jarysqa kelgen 11 jasar Nursultan esimdi sportshynyń aıaǵyn tistep alǵan. Onyń bar «jazyǵy» – tamaq bermekke umtylǵan eken. Sondaı-aq ashy sýdan urttap alǵan 28 jasar Vıktor da Katıamen qol berip amandaspaqshy bolypty. Alaıda, mań dalada erkin ósken ańnyń temir torda jatyp júıkesi ábden juqarsa kerek, bul joly da ózin qyzyqtaýǵa kelgen jigitti aıamaǵan. Osy oqıǵalardan soń lager ákimshiligi Ekaterınanyń «názik jandy» emes ekenin túsinip, túrmege qamaýdy uıǵarypty.
Sóıtip, adamdarǵa arnalǵan kolonııada túz taǵysy 15 jyl qamaýda bolǵan. Túrme qyzmetkerleri aıýdyń qandaı zań normalary negizinde kolonııada bolǵandyǵy jaıly málimet bermedi. Mass-medıa "ómir boıy bas bostandyǵynan aıyrylǵan aıý" dep atap ketken haıýanǵa qandaı da bir jaza taǵaıyndaldy ma, joq pa, ol jaǵy da beımálim. Belgilisi, qonys kolonııasyndaǵy 750 adammen birge bolypty. Al bıylǵy sáýir aıynda brıtandyq The Sun tabloıdy álgi aıý týraly reportaj jasaǵan edi.
Aıtpaqshy, 2010 jyly Qostanaıda aıýdyń qurmetine eskertkish-bıýst ornatylǵan.
Endi, mine, qostanaılyq qonys kolonııa qyzmetkerleri men jazasyn óteýshilerdiń 15 jyl boıy dosyna aınalǵan «qylmysker» Katıa Petropavl qalasyna jol tartty.