«Aq jol» demokratııalyq partııasynan prezıdenttikke kandıdat Danııa Espaevanyń respýblıkalyq shtaby jetekshisi Azat Perýashev Jambyl oblysyna kelip, jergilikti saılaýshylarmen kezdesti. Saılaýaldy úgit toby áýeli Jambyl oblysy, Baızaq aýdanynyń ortalyǵy Sarykemer aýylynda bolyp, turǵyndarmen jáne kásipkerlermen kezdesti. 30 myńnan astam halqy bar Sarykemer aýylynyń ózinde memleket qoldaýynyń nátıjesinde kásipkerlikpen aınalysatyn azamattardyń qatary kún sanap artyp keledi. Kezdesý kezinde kásipkerler salaǵa baılanysty saýaldaryn qoıyp, kandıdattyń saılaýaldy baǵdarlamasymen de tanysty.
Budan keıin prezıdenttikten úmitker D.Espaevanyń respýblıkalyq shtaby músheleri Baızaq aýdanynyń Qostóbe aýylyna da bardy. Munda da saılaýaldy úgit toby aýyl turǵyndarymen jáne kásipkerlermen kezdesip, kásipkerliktiń damýy týraly ózara pikir almasty. Jıynda kandıdattyń baǵdarlamasynda kórsetilgen kásipkerlikti damytýǵa qatysty baǵyttar nazarǵa alyndy.
Sonymen qatar respýblıkalyq shtab jetekshisi Azat Perýashevtiń Jambyl oblysynyń saılaýshylarymen kezdesýi Taraz qalasynda jalǵasty. «Qoshmambetov ı K» ǵımaratynda ótken kezdesýge «Aq jol» partııasy ortalyq qyzmeti prezıdıýmynyń múshesi Bolat О́tepbaev, partııanyń Jambyl oblystyq fılıalynyń jetekshisi Asan Qoshmambetov jáne oblystyq partııa uıymynyń belsendileri men buqaralyq aqparat quraldarynyń ókilderi qatysty. Kezdesý barysynda prezıdenttikke kandıdat D.Espaevanyń saılaýaldy baǵdarlamasy tanystyrylyp, kásipkerlerge shaǵyn bıznesti yntalandyrý úshin salyqty tómendetý, salalar úshin qosymsha qun salyǵynyń mólsherlemesin azaıtý máselesi de túsindirildi. Sondaı-aq munda da kásipkerler shaǵyn jáne orta bıznes úshin banktegi nesıe mólsherlemesin tómendetýdiń durys ekenin jetkizdi.
* * *
«Aýyl» halyqtyq-demokratııalyq patrıottyq partııasy atynan saılaýǵa túsip jatqan Tóleýtaı Raqymbekov óziniń senim bildirilgen adamdarymen birge Almaty oblysyn aralap júr. Nasıhatshylar toby óńirdegi jaqynda ashylǵan agropark pen osy salaǵa qyzmet etetin avıasııa ókilderimen kezdesti.
2008 jyly Qarasaı aýdanynyń Kóldi aýylynda elimizdegi eń alǵashqy aýyl sharýashylyǵy boıynsha bilim taratý ortalyǵy ashylǵan edi. Sodan beri jergilikti sharýalar salaǵa qatysty bastamalarmen osynda tanysady. Jobalardy iske asyryp, ónimin eselegender de bar. Munda sharýalar óz máselesin aıtyp, mamandar onyń sheshimin izdep jatady. T.Raqymbekov endi osyndaı mekemelerdi elimizdiń barlyq aýdan ortalyǵynda ashý kerek dep esepteıdi.
Al «Ońtústik» agroparki ótken jyly ǵana jumysyn bastady. Bul aldyńǵy bilim taratý ortalyǵynyń tájirıbe alańy dese de bolady. Arnaıy aýmaqqa otandyq mamandar oılap tapqan ondaǵan tuqym egilip, nátıjesi sharýalarǵa tanystyrylyp jatyr. Prezıdenttikten úmitker T.Raqymbekov keshendi sharalar arqyly ǵana salanyń damýyna tyń serpin berip, álemdegi agrarly eldermen básekeles bola alamyz deıdi.
Buǵan qosa kandıdat arnaıy ushaqqa otyryp, avıasııa salasynyń mańyzy týraly da aıtyp berdi. «Ásirese myńdaǵan gektar aýmaqty baqylaýda ustap, qajetti sharalar qoldaný úshin osyndaı tehnıkalar kerek. Al shaǵyn egis alqaptaryna drondardy paıdalana bastaý qajet. Jalpy, zamanaýı jabdyqtardan qashpaý kerek, ony qoldanǵannan sharýanyń utary kóp», dedi T.Raqymbekov.
Aýyldyń gúldenýi, Qazaqstannyń gúldenýi dep sanaıtyn «Aýyl» partııasynyń kandıdaty óziniń saılaýaldy baǵdarlamasynda aýyldyń áleýetin kóterýdiń negizgi baǵyttaryn usynady. Sonyń ishinde jastar máselesin de qamtyp, aýylǵa qajet mamandardy daıarlaý týraly aıtylǵan.
* * *
Kásipodaqtar federasııasynan prezıdenttikke kandıdat Amangeldi Taspıhov respýblıkalyq qoǵamdyq shtabynda Olımpıada chempıony Danııar Eleýsinovpen kezdesti. Kezdesý barysynda úmitker men chempıon úlken sport týraly pikir almasyp, ómirlik ustanymdarymen, bolashaqqa arnalǵan josparlarymen bólisti. Olımpıada shyńyn baǵyndyrǵan D.Eleýsinov búginde kásipqoı boksqa aýysyp, eń tanymal álemdik arenalardyń tuǵyryn baǵyndyryp keledi. Boksshynyń qorjynynda jeti jekpe-jekten jeti jeńisi bar. Jeti jeńistiń tórteýine AQSh-ta, ekeýine Ulybrıtanııada, bireýine Monakoda qol jetkizdi.
Prezıdenttikten úmitker A.Taspıhov «Jeńgiń kelse, barlyq jeńisterdiń qajyrly eńbek arqyly keletinin umytpa» degen oıyn bildirdi. Al sportshy kandıdattyń saılaýaldy tuǵyrnamasynyń negizgi baǵyttarymen tanysyp, kásipodaqtyń kóptegen qundylyqtarynyń kásibı boksqa qatysy baryn, sonyń ishinde qaýipsizdik tehnıkasyn saqtaý, komanda múshelerimen ujymdyq eńbek shartyn jasaý sııaqty máselelerdiń mańyzdylyǵyn atap ótti. Kezdesý sońynda tulǵalar bir-birine sáttilik pen jeńis tiledi.
Sonymen qatar A.Taspıhovtyń senim bildirilgen adamdary Pavlodar qalasynda Tirek-qımyl músheleri buzylǵan balalarǵa arnaıy saýyqtyrý qyzmetterin kórsetý ortalyǵyna baryp, eńbek ujymymen kezdesti. Jıynda Pavlodar oblysynyń memlekettik, bank mekemeleri jáne qoǵamdyq qyzmet kórsetý uıymdary qyzmetkerleriniń jergilikti kásiptik odaǵynyń múshesi Jumabaı Muhametálın qatysýshylarǵa kandıdattyń eńbek joly týraly baıandap, saılaýaldy tuǵyrnamasynyń negizgi baǵyttaryn tanystyrdy. Jınalǵan qaýym kókeılerinde júrgen suraqtaryn qoıyp, jaqyndap qalǵan saılaý týraly jan-jaqty málimet aldy.
* * *
Qazaqstan Kommýnıstik halyq partııasynan prezıdenttikke kandıdat retinde usynylǵan Jambyl Ahmetbekovtiń senim bildirgen adamdary Nur-Sultan qalasynda Ardagerler keńesimen kezdesý ótkizdi. Is-shara barysynda shahmattan týrnır uıymdastyrylyp, qarııalar bir jasap qaldy.
Basqosýda prezıdenttikten úmitker J.Ahmetbekovtiń saılaýaldy tuǵyrnamasynyń negizgi tezısteri túsindirildi. Nur-Sultan qalasy saılaýaldy shtabynyń jetekshisi N.Orazhanov pen partııanyń qurmetti ardageri N.Batıýta uıymnyń jańa múshelerine saltanatty túrde partııalyq bıletter tapsyrdy. Munymen kandıdattyń ustanymdary qoldaý kórsetetin azamattardyń qatary tolyqty. N.Orazhanov partııanyń jańa músheleri úshin ómirdiń erekshe kezeńi bastalǵanyn aıtty. Olarǵa partııanyń úndeıtin ıdeıalary men qundylyqtaryn dáripteýdi jalǵastyrý mindeti júkteledi. Sonymen qatar ol elimizdiń árbir azamaty úshin partııanyń esigi ashyq ekenin jetkizdi. Bılet tabystaý rásiminen keıin shahmat týrnıri bastaldy. Týrnırde qalalyq komıtettiń jas belsendileri qala ardagerlerimen saıysqa tústi.
Sonymen qatar elordadaǵy nasıhatshylar toby belsendi jumys istep, óz kandıdattarynyń baǵdarlamasyn halyqqa barynsha jetkizýde. Olar jurtshylyqqa úgit paraqshalaryn jáne partııa jýrnaldaryn taratyp, áńgimelesip, saılaýaldy baǵdarlamanyń basym baǵyttary týraly málimet berdi. Qala turǵyndary da túsinistik tanytyp, kommýnısterdiń bastamasyn jyly qabyldap jatyr. Sondaı is-sharalardyń biri Memlekettik rámizder kúnine oraı uıymdastyrylǵan fleshmob boldy. Nasıhatshylar toby Nur-Sultan qalasyndaǵy eń bıik ornalasqan resmı nyshan – Qazaqstannyń Memlekettik Týynyń astyna jınaldy. Sol mańda belsendiler jurtqa kandıdattyń ustanymdary kórsetilgen úgit materıaldaryn úlestirdi.
* * *
Nur Otan partııasynan prezıdenttikke kandıdat Qasym-Jomart Toqaevtyń qoǵamdyq shtabynyń ókilderi Shymkent qalasynda birqatar nysanda kezdesý ótkizdi. Úgit-nasıhat toby aldymen qalalyq №3 emhanaǵa soǵyp, onyń qyzmetkerlerine Elbasy Nursultan Nazarbaevtyń el basqarýdaǵy kóregendigi, ishki turaqtylyqty saqtaı alǵan parasaty jaıly aıtty. Sonymen qatar respýblıkalyq qoǵamdyq shtab múshesi Darhan Myńbaı men kandıdattyń senim bildirilgen adamy Erǵalı Bólegenov jergilikti shaǵyn jáne orta bıznes ókilderimen kezdesti. Olardyń aıtýynsha, táýelsizdik jyldarynda Qazaqstanda 1250 iri kásiporyn ashyldy. Onda 500-ge tarta jańa ónim óndiriledi. Sonyń nátıjesinde Qazaqstanda jasalǵan taýarlar álemniń 110 eline eksporttalyp jatyr. Jıynda D.Myńbaı jınalǵan kópshilikke kandıdattyń saılaýaldy baǵdarlamasy týraly áńgimeledi. Al E.Bólegenov Q.Toqaevtyń syrtqy saıasatty damytýǵa qosqan eńbegin atap ótti.
Buǵan qosa, Shymkent qalalyq qoǵamdyq shtabynyń músheleri «Qazyǵurt» shaǵyn aýdany turǵyndarymen kezdesti. Jınalǵan qaýymǵa olar Nur Otan partııasy kandıdatynyń saılaýaldy baǵdarlamasynyń negizgi baǵyttaryn tanystyrdy. Partııanyń Shymkent qalalyq fılıaly tóraǵasynyń orynbasary Baýyrjan Qýanyshbekov kandıdattyń ómirbaıanyna, onyń ishki jáne syrtqy saıasattyń damýyna qosqan úlesine toqtalyp ótti.
Sondaı-aq Nur Otan partııasy janyndaǵy Jas Otan jastar qanatynyń Shymkent qalalyq fılıaly «Seniń daýysyń mańyzdy!» atty avtosherý ótkizdi. Avtosherýge 20-dan asa avtokólik qatysyp, 100-ge jýyq erikti jas pen jasotandyqtar atsalysty. Qazaqstan Týy men Jas Otan jastar qanatynyń jalaýyn jelbiretken sherý Shymkent qalasynyń ortalyǵyndaǵy D.Qonaev dańǵylynan bastalyp, Báıdibek bı dańǵylymen aınalma jol arqyly Báıdibek bı eskertkishine deıin júrip ótti.
* * *
«Ult taǵdyry» ulttyq-patrıottyq qozǵalysy atynan prezıdenttikke kandıdat bolyp tirkelgen Ámirjan Qosanovtyń Nur-Sultan qalasyndaǵy respýblıkalyq shtabyna Túrki tildes memleketter yntymaqtastyǵy keńesi, Islam Yntymaqtastyǵy Uıymy jáne Túrki tildes memleketterdiń Parlamenttik Assambleıasy delegasııalary keldi. Qazaqstandaǵy kezekten tys prezıdenttik saılaý prosesin baqylaý mıssııasy aıasynda uıym ókilderi shtabtyń jumysymen tanysty. Kezdesý barysynda kandıdat Á.Qosanov saılaýaldy tuǵyrnamasyndaǵy negizgi baǵyttar, óńirlerdegi jumys jáne jaqyn aradaǵy óz josparlary týraly aıtyp berdi. Taraptar saılaýaldy kezeńde jemisti yntymaqtastyqty odan ári jalǵastyrýǵa kelisti.
Sonymen qatar prezıdenttikten úmitkerdiń respýblıkalyq saılaýaldy shtabynyń músheleri elorda irgesindegi Qoıandy aýylyna kelip, jergilikti turǵyndarmen kezdesti. Shtab ókilderi halyqpen kezdesýde úmitkerdiń saılaýaldy tuǵyrnamasyndaǵy negizgi baǵyttaryn naqty kórsetip, turǵyndardy tolǵandyrǵan suraqtarǵa jaýap berdi.
Budan bir kún buryn Á.Qosanov Oral qalasynda Batys Qazaqstan oblystyq shtab múshelerimen kezdesti. Is-sharada kandıdattyń saılaýaldy tuǵyrnamasy naqtyraq talqylanyp, túrli ózekti qoǵamdyq máselelerge qatysty óz ustanymyn jetkizdi. Shtab músheleri ózderin mazalaǵan saýaldaryn qoıyp, óńirde atqarylyp jatqan úgit-nasıhat jumystary jóninde baıandap berdi. Jalpy, elimizdiń barlyq aımaǵynda júrgizilip jatqan túrli is-sharalardyń nátıjesinde jergilikti turǵyndar Á.Qosanovtyń ómir joly, kózqarastary týraly ájeptáýir habardar bolyp qaldy. Sondaı-aq halyqtyń kóbi saılaýaldy naýqan aıasynda ótip jatqan kezdesýlerge belsendi qatysyp, ózderiniń oı-pikirlerin jetkizip, mejeli kúni saılaýdan da qalys qalmaı, tańdaǵan kandıdattaryna daýys beretinderin aıtýda.
* * *
«Uly dala qyrandary» respýblıkalyq qozǵalysynan prezıdenttikke kandıdat Sádibek Túgel óziniń senim bildirilgen adamdarymen birge Batys Qazaqstan oblysynda júr. Nasıhatshylar toby óńirdegi kıeli oryndardy aralap, zııarat etip, turǵyndarǵa, shet aımaqtan kelgen jurtqa saılaýaldy baǵdarlamasyn túsindirýde. Negizgi ustanymdary ulttyq qundylyqtarǵa dáripteýge baǵyttalǵan kandıdattyń mundaı qasıetti jerlerge atbasyn burýy erekshe mańyzǵa ıe. «Jer – janymyz, til – tuǵyrymyz» dep urandatqan S.Túgel osy Túrkistan sekildi qasıetti jerimizdiń qadirin bilip, dál osy óńirdegi halyqtyń taza saqtalǵan tili men qaımaǵy buzylmaǵan dástúri búkil qazaqqa úlgi bolǵanyn qalaıdy.
Prezıdenttikten úmitker óziniń saılaýaldy baǵdarlamasynda kórinis tapqan negizgi baǵyttardy halyqpen kezdesýlerinde keńinen túsindirýde. Ol kıeli oryndarǵa jasaǵan saparlarynda ulttyq qundylyqtar, salt-dástúrimiz týraly sóz qozǵasa, perzenthanadaǵy kezdesýinde demografııaǵa kóńil bólýdiń mańyzyn túsindirdi. Sondaı-aq ulttyq oıyn túrlerinen túrli birinshilikter uıymdastyrýǵa bastamashy bolyp, memlekettik tildiń mártebesin kóterý jaıyn da umyt qaldyrǵan joq.
Sonymen qatar bolashaq urpaq tárbıesinde kókiregi qazynaǵa toly qarııalarǵa qamqorlyq jasaýdy da nazaryna aldy. Aqsaqaldardyń kóńilin aýlaǵan sharalardyń birinde «Qarııalarymyz kún ótken saıyn azaıyp bara jatyr dep aıtqanymyzben, sózimiz ben isimiz úılespeı jatady. Sonaý soǵys kezinde de balalary oralmaı jalǵyz qalǵan qarııalardy búkil aýyl bolyp qamqorlyǵyna alyp, qaraılasýshy edi ǵoı. Al qazir she? Ata-anasyn qartaıǵanda qaraýsyz qaldyryp, qarttar úıine aparyp ótkizip, bar jaýapkershilikti memleketke aýdara salatyn bezbúırek urpaq qaıdan shyqty, bul bizdiń urpaq tárbıesindegi olqylyqtarymyzdyń kesiri emes pe?» dep qazirgi jaǵdaıdy synaıdy.
Daıyndaǵan
Orynbek О́TEMURAT,
Hamıt ESAMAN,
«Egemen Qazaqstan»