Mundaǵy maqsat bir – DigiGirlz jańa tehnologııalarǵa beıimi bar qyz balalardyń qabiletin arttyryp, sheberligin shyńdaýdy kózdeıdi. Sol sekildi IT salasy jáne naqty ǵylymdardy tańdaýǵa júregi daýalamaı júrgen qarakózderimizdiń kózqarasyn ózgertip, genderlik teńsizdikti buzegýǵa baǵyttalǵan.
– Nur-Sultan shaharynda Qazaqstandaǵy alǵashqy DigiGirlz High Tech Camp chempıonatyn ótkizip otyrmyz. Bul baǵdarlama qyz balalardy Stem baǵytynda, ınjenerııada, synı oılaýda, sonymen qosa ujymmen jumys isteýge qoldaýǵa arnalǵan. Qatysýshylar Arduino-nyń negizinde túrli qural-jabdyqtardy paıdalana otyra jobalaryn jasaıdy. 14-18 jas aralyǵyndaǵy úlken top – eki kún boıy robottandyrylǵan qoldyń protezin qurastyrady, avtomattandyrylǵan qoldyń jadynda saraptamalyq málimetter jınaqtalady. Al 11-13 jastaǵy kishi toptyń aldynda – akýla robotyna qımyldaýǵa múmkindik beretin tetikti jáne basqarý qurylǵysyn oılap tabý mindeti tur, – deıdi Microsoft Qazaqstan bilim berý bóliminiń jetekshisi Nurlan Jánibek.
Synǵa túsken jumystardyń túgeli derlik eskerýsiz qalmaıtynyn naqtylady uıymdastyrýshylar. Al «Hewlett Packard Enterprise» kompanııasynyń Qazaqstan jáne Qyrǵyzstan boıynsha bas dırektory Dana Altybaeva eldegi árbir ekinshi áıel adam IT salany tańdaýǵa jasqanatynyn aıtady. Ol óz mysalynda bul baǵytta názik jandylardyń da tabysqa kenelýge bolatynyn keltirip, jastardy jańa baǵytta múmkindikterin pysyqtaýǵa shaqyrdy. Resmı statıstıka boıynsha sıfrly tehnologııalarmen óz keleshegin kóbinese ul balalar baılanystyrady eken. Qyz balalardyń úles salmaǵy tek – 10%. Bul jahandyq trend.
Jaqsylyq MURATQALI,
«Egemen Qazaqstan»