Oblystaǵy 35 myńnan astam kóp balaly analardyń 17 myńy – Batyr analar. Olardyń 8 myńǵa jýyǵy «Altyn alqa», 9 myńǵa jýyǵy «Kúmis alqa» ıegerleri.
A.Toqmaǵambetov atyndaǵy Mádenıet úıinde ótken baıqaý qorytyndysy boıynsha 10 otbasy júldeli orynǵa ıe boldy.
Baıqaýda Shıeli aýdanynan qatysqan Ábdijapparovtar áýleti «О́negeli otbasy», jańaqorǵandyq Sabyrhanovtar «Yntymaqty otbasy», Aral aýdanynan kelgen Tórehanovtar «Rýhty otbasy», syrdarııalyq Esqaraevtar «Ulaǵatty otbasy», jalaǵashtyq Sámenovter «Parasatty otbasy», al qyzylordalyq Janazarovtar «Zııaly otbasy» nomınasııalarymen marapattaldy. Qarmaqshy aýdanynan qatysqan Arıfovtar otbasy III oryn, jańaqorǵandyq Qarynbaevtar otbasy II oryn, Shıeli aýdanynan qatysqan Baıdenovter otbasy I oryndy jeńip aldy. Oblystyq baıqaýdyń bas júldesin Qııanbekovter áýleti ıelendi.
Qııanbekovter otbasy 10 balany ósirip, uıadan ushyrǵan. Búginde 43 nemere, 12 shóbereniń qyzyǵyna toımaı otyrǵan baqytty áýlettiń báıteregi Ámir ata Shıeli aýdanynyń qurmetti azamaty atanǵan. Otanasy Qalgúl apa men bir qyzy jáne kelini «Altyn alqa» ıesi bolsa, taǵy bir kelini «Kúmis alqamen» marapattalǵan.
«Mereıli otbasy-2019» oblystyq baıqaýynyń jeńimpazy Ámir qarııanyń jastarǵa aıtary kóp.
– «Baq, qaıda barasyń – yntymaqqa baramyn» degen sózde úlken oı jatyr, – deıdi ónegeli shańyraq ıesi. – Ár azamat óziniń otbasy aldyndaǵy jaýapkershiligin tereń túsinse, tálim-tárbıe isine jaýapkershilikpen qarasa baq ta, dáýlet te oraıymen keledi. Otasqandaryna shırek ǵasyrdan asqan shańyraq saıasy mol alyp báıterekke aınalǵan.
Aıtary joq, búginde jas shańyraqtar jıi shaıqalyp júr. Statıstıkalyq málimetter kóńil qulazytady. Keshe ǵana «súıdim-kúıdim» dep jandary qalmaı tabysqan jandardyń jyl aınalmaı jatyp joldarynyń ekige aıyrylýy qoǵam qasiretine aınalyp barady. Arada kózi jáýdirep júregi qan jylap qalǵan sábılerdiń qandaı jazyǵy bar edi?!
Babalarymyz otbasy qundylyqtaryna berik bolǵan. Ajyrasý neken-saıaq edi. Otaǵasy jazataıym ómirden ótse balalary aýyl bolyp qamqorlyqqa alyndy, jesirine jaǵdaı jasaldy, elden ketpedi. Olardy eshkim ózekten tepken joq. Jyl saıyn ótetin «Mereıli otbasy» baıqaýy ulttyq tárbıeniń túp-tamyryn ata-baba dástúrinen izdeıdi. Otaǵasy men otanasyna shańyraqtyń berekesi – ulttyq qundylyqtardan ajyramaýdy ańǵartady. Anasy myqty eldiń keregesi keń, shańyraǵy bıik, yrysy mol ekenin uqtyrady.
– Allaǵa shúkir, baqyttymyn, – deıdi Ámir Qııanbekov aqsaqal.
Bul otbasy endi Syr óńiriniń atynan respýblıkalyq «Mereıli otbasy» ulttyq baıqaýyna qatysady. Qyzylorda oblysy