Jamaǵat kótergen úndeýge oblystyq, aýdandyq máslıhattyń depýtattary, kásipkerler qoldaý kórsetip, árkim shama-sharqynsha aqsha aýdarǵan. Jınalǵan 10 mln. teńgege Áıteke bı kentinen bes otbasyǵa turǵyn úı salynǵan. Qarjydan bólek jekelegen azamattar qurylys materıaldaryn jetkizip bergen eken.
Aýdandyq ákimdik tarapynan elektr júıesi, aýyz sý, gaz jáne káriz júıelerin júrgizýge kómek berilgen.
Osynaý qýanyshty bólisýge kelgen aýdan ákimi Murat Ergeshbaev saýapty iske muryndyq bolǵan «Asyl Iman Ihsan» qaıyrymdylyq qorynyń bastaýyndaǵy azamattarǵa kópshilik atynan rahmetin aıtty.
– Biz erteden-aq kómekke muqtaj adamǵa qoldaý kórsetip, qaıyrymdylyq jasaǵan, jetimi men jesirin jylatpaǵan halyqpyz. Qazir de ata-baba dástúrinen aınymaı, aýdan kólemindegi turmysy tómen otbasylarǵa, jetim-jesirler men múmkindigi shekteýli jandarǵa qaıyrymdylyq kómekter kórsetilip keledi. Máselen, aýdanda jyl basynan beri turmystyq jaǵdaıy tómen 2300-ge jýyq otbasyǵa 6 mln 873,2 myń teńgeniń kómegi kórsetildi. Sondaı-aq, janashyr jandardyń qoldaýymen birqatar otbasylarǵa azyq-túlik pen kıim-keshekter alyp berildi, – dedi ol.
Al, Qazaqstan musylmandar Dinı basqarmasynyń Qyzylorda oblysy boıynsha ókili Bolatbek Ulasqan da qaıyrymdylyq sharasyna qatysyp, kóptiń batasyn alǵan azamattarǵa rızashylyǵyn bildirdi.
Qaırymdylyq halqymyzdyń boıyna bitken asyl qasıet. Keı jerlerde barlyq jumysty Úkimettiń moınyna artyp qoıyp, ketpenniń sabynan qaraýyl qaraıtyndar jetip artylady. Aýyzdyǵa sóz, attylyǵa tizgin bermeıtin ondaılar bar kináni memleketten izdep, jurtty dúrliktirip júredi. Úkimettiń osy baǵytta qolǵa alǵan baǵdarlamalaryn kózge ilgisi kelmeıdi. Bul, árıne, durys emes. О́z memleketiń, óz Otanyńnyń shamasy jetpeı jatqan júginiń bir jaǵyn teńdeý, qolynan kelgenshe kómektesý ár qazaqstandyqtyń azamattyq boryshy. Qazalylyq azamattardyń Ramazan aıynan keıingi saýapty tiregi ózge de óńirlerge úlgi bolsa eken dep tiledik.
Kóp balaly úı-elimizdiń keleshegi, demografııalyq ahýalymyzdy jaqsartýǵa tikeleı úles qosyp otyrǵan otandastarymyz. «Uıada ne kórseń, ushqanda sony ilesiń» degen qanatty sóz bar. Kúni erteń osy otbasylardan qanattanyp ushqan tastúlekter aýyldastary kórsetken qamqorlyqty esh umytpaıtyny anyq. О́zderi de qaıyrymdylyq qanyna sińgen azamattar bolyp ósedi.
Sondyqtan, olarǵa salynyp jatqan ınvestısııa Qazaqstan kelesheginiń kemeldigine jumys isteıdi dep senimmen aıtýǵa bolady.