Seısenbi, 12 aqpan 2013 7:13
Sodyrlar partızandyq soǵys tásiline kóshýde
Sodyrlar Malıde soǵys qımyldaryn júrgizýdiń partızandyq tásiline kóship, Gao qalasyn óz baqylaýyna alýdyń az-aq aldynda qalǵan. Malıdiń úkimettik áskerleri fransýzdardyń kómegimen ǵana shabýyldyń betin qaıtarǵan kórinedi.
Seısenbi, 12 aqpan 2013 7:13
Sodyrlar partızandyq soǵys tásiline kóshýde
Sodyrlar Malıde soǵys qımyldaryn júrgizýdiń partızandyq tásiline kóship, Gao qalasyn óz baqylaýyna alýdyń az-aq aldynda qalǵan. Malıdiń úkimettik áskerleri fransýzdardyń kómegimen ǵana shabýyldyń betin qaıtarǵan kórinedi.
Kýágerlerdiń aıtýlaryna qaraǵanda, atys qalada jeksenbiniń ekinshi jartysynda bastalǵan. Avtomattardan, iri kalıbrli pýlemetter men granatometterden oq jaýdyrylǵan kezde jergilikti turǵyndar úılerine tyǵylýǵa májbúr bolǵan. Sol kezde malılik áskerıler jaqyn jerde ornalasqan fransýz áskerlerinen kómek suraǵan. Sarapshylar Malıdegi oqıǵa jańa satyǵa kóship otyr dep sanaıdy. Sodyrlar jaqsy qarýlanǵan fransýz áskerimen betpe-bet kelýden ádeıi jaltaryp, partızandyq tásilmen urys júrgizýge kóshken. Olar jergilikti turǵyndar arasynda sińip ketip, áskerıler úshin ońaılyqpen qolǵa túspeıtin kúshke aınalýda.
Vokzaldaǵy qaıǵyly oqıǵa
Úndistannyń Allahabad qalasyndaǵy vokzalda halyqtyń syǵylysyp, bir-birin taptap ketýi saldarynan otyz alty adam qaza tapqan. Olar ındýısterdiń Kýmba-mela atty meıramyna bara jatqandar kórinedi.
Zardap shekken ondaǵan adam túrli dene jaraqattarymen aýrýhanalarǵa jetkizilgen. Qaıǵyly oqıǵa oryn alǵan sátte temir jol vokzalynda barlyǵy 4 mıllıonnan astam adam bolǵan kórinedi. Aldyn ala alynǵan aqparat boıynsha, stansada jer asty jolynyń tóbesi opyrylyp túsken. Onyń syrtynda polısııanyń adamdardy syrtqa shyǵarmaı vokzalda uzaq ýaqyt boıy ustaýy da jaǵdaıdy ýshyqtyryp jibergen. Shtattyń úkimeti oqıǵa sebepterin anyqtaýǵa kiristi. О́kimettiń esebine qaraǵanda, bıyl Kýmbaha-mela meıramyna 30 mıllıonnan astam adam jınalǵan kórinedi.
Obama qarýsyzdaný jolyn tańdaıdy
AQSh prezıdenti Barak Obama ıadrolyq arsenaldy aıtarlyqtaı qysqartý jóninde usynys jasamaq nıette, dep jazady «Nıý-Iork taıms» gazeti.
12 aqpanda Obama kongreske «Eldegi jaǵdaı týraly» óziniń jyl saıynǵa joldaýyn joldamaq. Usynylatyn qysqartýlardyń naqty sanynyń aıtylýy ekitalaı, degenmen Aq úıde ıadrolyq oqtumsyqtardyń sanyn bir myńnan azaıtý múmkindikteri qarastyrylýda kórinedi. Qazirgi ýaqytta AQSh-ta 1700 ıadrolyq zarıadtar bar. Reseımen aradaǵy kelisim-shart boıynsha 2018 jylǵa qaraı olardyń sany 1550-ge deıin qysqarýǵa tıis. Amerıkalyq BAQ-tar AQSh-tyń oqtumsyqtardy 1000-1100 birlikke deıin qysqartý týraly Reseımen kelissózderge barýǵa daıyn ekendigin habarlap otyr.
Aýǵanstandaǵy áskerdi jańa qolbasshy basqarady
NATO bas hatshysy Andres Rasmýssen keshe AQSh áýe kúshteri generaly Djozef Danfordtyń Aýǵanstandaǵy qaýipsizdikke yqpal etý jónindegi halyqaralyq kúshterdiń komandashysy qyzmetine kiriskenin habarlady.
Sonymen birge, ol NATO-nyń Aýǵanstandaǵy kúshteriniń burynǵy qolbasshysy, budan bylaı NATO-nyń Eýropadaǵy kúshterine basshylyq jasaıtyn Djon Alenge alǵys aıtqan. Ol tamasha basshylyq úlgisin kórsetti, AQSh senaty onyń kandıdatýrasyn bekitken kezde onyń NATO-nyń Eýropadaǵy birlesken kúshteriniń bas qolbasshysy retinde de óz isin dál sondaı berilgendikpen atqaratynyna meniń senimim mol, dep atap ótken Soltústikatlantıkalyq alıanstyń bas hatshysy.
Ulybrıtanııa quramynan shyqpaýǵa shaqyrdy
Ulybrıtanııa úkimeti Shotlandııanyń táýelsizdigi týraly daıyndalyp jatqan referendýmǵa qatysty eger daýys berý oń sheshiler bolsa, Shotlandııany ekonomıkalyq apattar kútip tur, dep úreılendirýde.
Aıta ketý kerek, Shotlandııanyń táýelsizdigi týraly referendým 2014 jylǵa belgilengen bolatyn. Ulybrıtanııa premer-mınıstri Devıd Kemeron Shotlandııa halqyna Ulybrıtanııa quramynan shyqpaý jóninde úndeý tastady. Eger qarapaıym aqylǵa salar bolsaq, Brıtanııa jumys isteýde jáne jaqsy jumys isteýde, ony kúıretýdiń qajeti qansha, dep atap kórsetken úkimet basshysy óz úndeýinde. Sonymen birge, Kemeron óńirlik bıliktiń ókilettigin burynǵydan da góri keńeıte túsýge daıyn ekenin de málimdep otyr.
Oppozısııa Asadpen únqatysýǵa daıyn
Sırııalyq oppozısııa el prezıdenti Bashar Asadtyń rejimimen únqatysýǵa daıyn ekendigin habarlady. Bul týraly Sırııa ulttyq koalısııasynyń ókili Mýaz Ál-Hatıb málimdegen.
Resmı málimdemede Ál-Hatıb kezdesý úshin eldiń soltústigindegi kóterilisshiler basyp alǵan jerdiń belgilenip otyrǵanyn habarlaǵan. Onda B.Asadtyń úlken qantógiske barmaı bılikti óz erkimen berý jospary talqylanbaq. Biraq oǵan B.Asad kelise me, álde kelispeı me, eń mańyzdy másele osy, dep atap kórsetken M.Ál-Hatıb. Aıta ketý kerek, buǵan deıin de oppozısııalyq uıymdardyń Sırııa úkimetin kelissózderge shaqyrǵan jaǵdaılary bolǵan. Biraq olardyń bir de biri másele retinde naqty qaralǵan emes.
Brazılııada karnaval bastaldy
Brazılııada 8 aqpanda bastalǵan karnaval bes kúnge sozylmaq. Ol eldiń tek iri qalalarynda ǵana emes, sonymen birge shaǵyn eldi mekenderde de ótetin bolady.
Karnaval Rıo-de-Janeırodaǵy saltanatty rásimnen bastaý aldy. Rıo qalasynyń prefekti Edýardo Paes karnavaldyń kósh bastaýshysy – «Momo koroline» qala kiltin tapsyra otyryp, karnavaldyq sherýdiń bastalǵanyn jetkizgen. Mereke kúnderi Rıo qalasynyń ortalyǵymen 492 karnavaldyq arba ótpek. Rıodaǵy merekege alty mıllıondaı adam keledi dep kútilýde. Ol ótken jylǵydan 700 myń adamǵa kóp. Munyń Rıo-de-Janeıro úshin jańa rekord bolýy da múmkin. Kórermender qaýipsizdigin 14,5 myń polıseı qadaǵalaıtyn bolady.
Internet materıaldary negizinde ázirlendi.