«Biraq biz osy saılaýdyń aıasynda múmkindiginshe belsendi áreket etýge tyrystyq. Eń basty nátıje osy saılaýdyń saıası prosess retindegi sharyqtaǵan shyńy - daýystardy esepteý jáne protokoldardy toltyrý. Qazaqstandyqtar tek qana saılaý quqyǵyn ǵana paıdalanǵysy kelmeıdi, olar baqylaý quqyǵyn da paıdalanǵysy keledi. Qazir kóptegen táýelsiz baqylaýshylardyń jelisi qurylyp jatyr. Olardyń bizge eshqandaı qatysy joq. Biz shtabtarymyzdyń atynan ǵana aıta alamyz. Biraq baǵany beretin táýelsiz baqylaýshylar», dedi Á.Qosanov.
Budan ári kandıdat Qazaqstanda tranzıttik bılik bastalǵanyn aıtty.
«Qazaqstanda tranzıt bastaldy. Tuńǵysh Prezıdent-Elbasy Nursultan Nazarbaev formaldy túrde Prezıdent ornynan ketti. Odan soń, ekinshi adam keldi. Al bul saılaýda kelesi kim bolatyny sheshilip jatyr. Bul jandy, tabıǵı prosess dep oılaımyn. Halyq osyǵan aralasýy kerek. Kez kelgen azamat óz kandıdatyn qoldaı alady. Búgingi keshki 20:00- ge deıin ýaqyt bar. Saılaýshylardy qalaǵan kandıdatyna daýys berýge shaqyramyn», dedi Ámirjan Qosanov.
№57 saılaý ýchaskesiniń xatshysy Sandýǵash Májıtovanyń aıtýynsha, atalǵan ýchaske boıynsha 4503 adam tirkelgen. Sonyń ishinde alǵash ret daýys berýshiler de bar. Olarǵa ýchaskede arnaıy syılyqtar berildi.
Eske sala keteıik, búgin Qazaqstan Prezıdentin kezekten tys saılaý bastaldy. Atalǵan saılaýda el ishinde jáne shet elderde 9 968 daýys berý ýchaskesi jumys isteıdi. Saılaý týraly Konstıtýsııalyq zańǵa sáıkes, daýys berý ýaqyty standartty (saǵat 7.00-20.00 aralyǵy) bolady.