Aýmaqta 663 saılaý ýchaskesi qurylsa, 93-i oblys ortalyǵynda ornalasqan. Tańǵy saǵat jetide Nursultan Nazarbaev kóshesi boıynda qatar ornalasqan úsh saılaý ýchaskesi óz esikterin aıqara ashyp, jas saılaýshylarǵa, týǵan kún ıelerine syı-sııapattaryn usyndy. Olardyń arasynda eńbek ardagerleri de, jastar da boldy.
"Birde-bir saılaýdan qalyp kórgen emespin. Qazaqstannyń keleshegi, nemerelerimniń bolashaǵy ózgeler sekildi meni de beıjaı qaldyrmaıdy. Bir shańyraq astynda tatý-tátti ómir súrip jatqan ulttar men ulystardyń dostyǵy, birligi úshin daýys berdim" deıdi seksennen assa da saıası erik-jigeri muqalmaǵan Marııa Vasıleva. № 23 mektepte qurylǵan № 637 jáne №638 saılaý ýchaskeleri boıynsha úsh myńǵa jýyq saılaýshy tirkelip, óz quqyqtaryn paıdalanyp qalýǵa asyqqany olardyń qalyń qarasynan birden ańǵarylady. Biz osy jerde «Amanat» azamattyq platformasynyń ókili Rústem Armanovty, Jalpyhalyqtyq sosıal-demokratııalyq partııa atynan baıqaýshy retinde kelgen Lıýdmıla Rızovany jolyqtyrdy. Olar belsendiliktiń joǵary ekenin, saılaý zań talaptary sheńberinde ótip jatqanyn jetkizdi. Biz Ulttyq ulan áskerı ınstıtýtyna kelgende № 946 saılaý ýchaskesinde tirkelgen 946 saılaýshynyń úshten biri óz tańdaýlaryn jasaǵan eken. О́zin Baýyrjan Ráshev degen tanystyrǵan jas jigit ákesi ekeýi «Ult taǵdyry» qozǵalysy atynan ókildik alǵandaryn, uıymdastyrý sharalary qanaǵattandyratynyn, ázirge zań buzýshylyq oryn almaǵanyn jetkizdi.
Balalar shyǵarmashylyǵy ortalyǵynda ornalasqan № 595 saılaý ýchaskesinde aımaq basshysy Qumar Aqsaqalov pen 73-shi Kann kınofestıvalinde «Úzdik áıel róli» atalymynyń jeńimpazy, belgili aktrısa Samal Eslıamova daýys berdi. Bul saılaý ýchaskesinde 1416 adam tirkelse, bireýi soǵys ardageri, 20-y – tyl eńbekkeri. 56 adam birinshi ret daýys bermek. Múmkindigi shekteýli 4 adamǵa arnaıy kabına jabdyqtalǵan. Qumar Irgebaıuly jýrnalısterge bergen suhbatynda Prezıdent saılaýy azamattyq ustanymdy bildirýdiń, bolashaqqa tańdaý jasaýdyń aıqyn joly ekenin atap kórsetti. "Elimiz damýdyń jańa kezeńine ótti. Biz tańdaǵan konstıtýsııalyq reforma, ekonomıkalyq jáne qoǵamdyq sanany jańǵyrtý baǵdarlamalary aıqyn. Memlekettiń, atqarýshy bıliktiń halyq aldyndaǵy eseptiligi, ashyqtyǵy sekildi úderisterge turǵyndar belsendililikpen atsalysyp, shet qalmaýy tıis. El bolyp birikkende ǵana úlken jetistikterge jete alamyz", - dedi óz sózinde.
Oblystyq Saılaý komıssııasynyń tóraǵasy Erbolat Bekshenov respýblıkalyq, aımaqtyq BAQ ókilderimen ótkizgen brıfıngte saılaýshylarǵa barlyq jaǵdaı jasalǵanyn, saılaý barysyn qadaǵalaýǵa Reseıden - 48, TMD-dan - 25, OBSE tarapynan 16 baıqaýshynyń kelgenin, úsh saǵat ishinde 402 myń saılaýshynyń 14,2 prosenti óz tańdaýlaryn jasaǵanyn málimdedi. Saılaý ótetin oryndar múmkindigi shekteýli jandarǵa yńǵaıly bolý úshin pandýstarmen jáne arnaıy daýys beretin kabınalarmen jabdyqtalǵan. Aldyn ala tapsyrystarmen ınvataksı jumys isteıdi. Áskerı jáne medısınalyq mekemelerde 12 jabyq saılaý ýchaskesi qurylǵan. Ol «Biz birgemiz» qoǵamdyq birlestiginiń jetekshisi, birinshi toptaǵy múgedek Sergeı Sapkonyń buǵan deıin úıinde daýys berip kelse, bul joly saılaý ýchaskesine ózi kelip, tańdaýyn aıqyndaǵanyn mysalǵa keltirdi.
Shal aqyn aýdandyq saılaý komıssııasynyń tóraǵasy Janat Ámirjanovpen habarlasqanymyzda, Túmen oblysy qazaqtary mádenı avtonomııasynyń jetekshisi Esenǵalı Ibraev bastaǵan baıqaýshylar toby eldi mekenderdi aralap júrgenin aıtty.
Biz Reseıden kelgen tájirıbeli halyqaralyq baıqaýshy Igor Halınmen telefon arqyly tildeskenimizde saılaý prosesine kózqarasyn bylaı bildirdi.
– Qazaqstan halqy Prezıdent, Parlament saılaýlarynda árdaıym joǵary uıymshyldyq pen birliktiń úlgisin kórsetip júr. Búgin de respýblıka jurtshylyǵynynyń joǵary deńgeıde qatysatynyna, saıası naýqannyń ádil ótetinine senimdimin.
Oblystyq Saılaý komıssııasy bergen aqparat boıynsha saǵat 12-de barlyq saılaýshylardyń úshten biri óz tańdaýlaryn jasady.