Nur-Sultan qalasynyń perzenthanalarynda júkti jáne bosanǵan áıelderge arnaıy saılaý ýchaskileri uıymdastyryldy. Tańerteń atalǵan oryndarda 344 áıel daýys berdi, - dep habarlaıdy elorda ákimdiginiń saıty.
№ 208 jabyq saılaý ýchaskesi tóraǵasynyń orynbasary Larısa Pavlovestiń aıtýy boıynsha, medısına mekemesinde saılaý qalypty ótip jatyr. Jańa týǵan sábıdiń anasy Aıda Shoraevanyń aıtýynsha, daýys berý arqyly el bolashaǵyna ózgeris engize alady.
«Saılaý men úshin óte mańyzdy. Meniń daýysymnan elimniń bolashaǵy baılanysty. Elimiz odan ári gúldenip damı bersin», - dedi Aıda Shoraeva.
Nur-Sultan qalasy Qoǵamdyq densaýlyq saqtaý basqarmasynyń habarlaýynsha, saǵat 14.00 ýaqyty boıynsha astananyń perzenthanalarynda 30 bala dúnıege keldi, onyń ishinde 15 ul, 15 qyz bala.