«Qazaqstan» qonaqúıinde jýrnalıstermen baspasóz máslıhatyn ótkizgen Polshadan kelgen baıqaýshy Vıoletta Porovskanyń sózinshe, memleket tarıhyndaǵy taǵdyrsheshti oqıǵa barlyq talaptarǵa saı ótti.
«Qazaqstan saılaýǵa joǵary deńgeıde daıyndalǵan. Halyqaralyq baıqaýshylardyń jumysyna eshqandaı shekteý qoıylǵan joq. Biz bir-birimizben erkin pikir almasyp, barlyq prosesti baqylap otyrdyq. Men bir ýchaskede 47-shi baıqaýshy bolyp qatystym. Bul degenińiz saılaýdy kóptegen eldiń baıqaýshylary baqylap otyrdy degen sóz. Saılaý ádil ári ashyq ótip jatyr dep aıta alamyn. Múmkindigi shekteýli azamattardyń tarıhı oqıǵadan tys qalmaýy eskerilgeni qýantady», deıdi Vıoletta Porovska.
Rýmyn elinen kelgen qos birdeı baıqaýshy Trıf Raresh pen Iýrkan Jonash Florısh te osy pikirge toqaılasty. Almatydaǵy 10 saılaý ýchaskesine baryp, prosesti óz kózderimen baqylaǵan sarapshylar eshqandaı zańbuzýshylyq áreketin baıqamaǵandaryn jetkizdi.
«Maǵan Qazaqstandaǵy saılaý prosesin baqylaý óte qyzyq boldy. Saılaýǵa jastardyń belsendi túrde qatysqanyn anyq baıqadym. Bul – jas býynnyń el erteńine nemquraıly qaramaıtynyn ańǵartsa kerek. Túske deıin saılaýshylardyń 20 paıyzy daýys berýge keldi. Bul – óte joǵary kórsetkish», deıdi Iýrkan Jonash Florısh.
«Eshqandaı zańǵa qaıshy jaǵdaıdy baıqaǵan joqpyn. Tek bir áıel azamat ózin daýys berýshiler tiziminen tappady. Ondaı jaǵdaılar jıi bolyp turady. Saılaýshylardyń arasynda stýdentterdiń kezekte turǵanyn baqyladyq. Bul – azamattyq qoǵamdaǵy demokratııanyń saltanat qurǵanyn kórsetedi», dedi Halyqaralyq Adam quqyqtaryn qorǵaý uıymynyń keńesshisi Raresh Trıf.
№40 mektepte ornalasqan saılaý ýchaskesine otbasymen kelip tańdaý jasaǵan qala ákimi Baýyrjan Baıbek bolashaǵymyzdy aıqyndaıtyn sátte elim degen árbir azamat saılaýdan qalys qalmaý qajet deıdi. Budan bólek Altynbek Qorazbaev, Roza Rymbaeva syndy óner maıtalmandary barsha qala jurtshylyǵyn belsendi bolýǵa shaqyrdy. №54 saılaý ýchaskesinde daýys bergen elimizdegi «100 jańa esim» jobasynyń jeńimpazy, pıanıst Rahat-Bı Ábdisaǵyn eldiń jarqyn bolashaǵy úshin saılaýǵa Italııadan arnaıy ushyp kelgenin aıtty.
Taǵy bir aıta keterligi, aıtýly kúni qaladaǵy barlyq qoǵamdyq kólikter jolaýshylarǵa tegin qyzmet kórsetti.
Arman OKTIаBR, Ǵalym SÚLEIMEN, «Egemen Qazaqstan» ALMATY