Eki kún ishinde Almaty turǵyndary men qonaqtary búrkitshilerdiń, shabandozdardyń, kókparshylardyń, sadaq atýshylardyń sheberlikterine tánti bolyp, batyrlardyń jekpe-jegin, jeldeı esken at ústinen jerden tıyn alǵandardyń eptiligin, ulttyq oıyndardy tamashalady, ulttyq as mázirinen dám tatty. «Uly dala – kóshpendiler álemi» qazaqtar men túrki halyqtarynyń baı murasymen keńinen tanysýǵa múmkindik berdi.
«Festıvalde iri etnomýzykanttar men sportshylar, búrkitshiler men qoldanbaly óner sheberleri ózderiniń talanttaryn pash etti. Etnomádenıet festıvaliniń basty maqsaty – kóshpeli halyqtyń erte tarıhyn jańǵyrtý, óskeleń urpaqqa ár ulttyq ózara uqsastyǵyn túsindirý», - dedi qalalyq Mádenıet basqarmasynyń basshysy Nurlan Sydyqov.
Shara barysynda Qazaqstannyń jeti dúrkin, álemniń eki dúrkin chempıony, Gınesstiń rekordtar kitabyna eki ret engen Sergeı Syrýlnıkovtyń basqarýymen alyptar shoýy boldy. Olar kúresedi, shegeni qoldarymen qaǵady, temirdi maıystyrady, gır kóteredi. Alyp kúsh ıesi Sergeı Syrýlnıkov sheberlik synyptaryn ótkizedi jáne kórermender úshin arnaıy jarystar uıymdastyrdy. Budan ózge, Androsh Bıronyń basqarýymen Majarstannan kelgen qonaqtar áskerı at oıyndaryna qatysady, býrıattyq shaman Velıgto Badmaev ystyq tastar arqyly kóz tııýden qorǵaıdy. Bashqurtstannan kelgen sadaqshylar jaıaý jáne at ústinde turyp «Mergen ýksy» mergendik ónerlerin kórsetti. Qyrǵyzdyń «Salbýýrýn» komandasy búrkitpen jáne tazy ıtpen ań aýlaý sheberligin usynady.
Almaty ákimi Baýyrjan Baıbek Boraldaı qorǵandary aýmaǵynda Saq mádenıeti ortalyǵy qurylysynyń jobasymen tanysty. Qazirdiń ózinde onyń jobalyq-smetalyq qujattary jasalyp, memlekettik saraptamaǵa jiberildi. Qala basshysy óziniń sózinde mundaı ortalyqtyń paıda bolýy Almatynyń týrıstik áleýetin, el tarhıyna degen qyzyǵýshylyqty arttyratynyn, qundy arheologııalyq parkti qorǵaýǵa, bolashaq óskeleń urpaq úshin tarıhı-mádenı mura jaýharyn kózdiń qarashyǵyndaı saqtaýǵa múmkindik beretinin aıtty.
Elbasynyń «Uly dalanyń jeti qyry» baǵdarlamalyq maqalasy aıasynda Almatyda Raıymbek batyrdyń mavzoleıi rekonstrýksııalanady. Osynaý kıeli orynda memorıaldy mýzeı kesheni ashylady. Bulardan ózge, «Etnolend» etnomádenı keshen salý josparlanyp otyr.
Festıval aıasynda birqatar zamanaýı ulttyq óner kórmeleri uıymdastyryl ıdy, «Turan», «HasSak» etno-folklorlyq ansamblderi, Túrkııadan, Monǵolııadan, Altaı men Tyvadan, Chývashııa men Qyrǵyzstannan jáne basqa elderden kelgen tanymal artıster óz ónerlerin kórsetti.
Nıet bildirýshilerdiń barlyǵy túrli jarystar men vıktorınalarǵa qatysyp, baǵaly syılyqtar jáne ustalyq, zergerlik ónerdiń qupııasyna boılap, ulttyq as mázirinen dáris aldy, qolónershiler men basqa da qoldanbaly zattardy jasaýshylardyń sabaqtaryna qatysty, shaǵyn kıiz úıdi qurý men jınaýdy úırendi.
Saparbaı PARMANQUL,
«Egemen Qazaqstan»