Byltyr Aqshı aýylynda 3 jańa turǵyn úı salynypty. Uzynbulaqtaǵy dárigerlik pýnktke 2,5 mıllıon teńgege kúrdeli jóndeý jumystary júrgizilgen. Búginde E.Bekmahanov atyndaǵy orta mektepte 112 oqýshy bilim alady. Mektep janyndaǵy «Balbóbek» shaǵyn ortalyǵynda 40 bala tárbıelenýde. Synyptarǵa mýltımedııalyq quraldar ornatylǵan.
Aldaǵy ýaqytta Uzynbulaqtaǵy Mádenıet úıiniń qas betine, elektr qýaty júıelerine jóndeý júrgizip, mekteptiń barlyq esik-terezelerin zamanaýı túrde jańalap, eden taqtaılary aýystyrylmaq.
Aýyldyń ishki kóshelerine, zırattarǵa, mal jaıylymyn ulǵaıtýǵa jer telimderin rásimdeý, Teńdik – Uzynbulaq, Uzynbulaq – Aqshı aýyldarynyń avtokólik joldaryna aǵymdaǵy jóndeý jumystary júrgiziledi.
Al «Aýylym – altyn besigim» merekesi aıasynda jyldaǵydaı dástúrli Ulttyq sport oıyndary ótti. Qaraǵandy oblysynyń da atbegileri asyǵa jetipti. Kúmbirlegen kúı, áýelegen áýenderdi shyrqaǵan aýyl ónerpazdary, «Ájeler» ansambli, kishkentaılar merekelik kóńil kúı syılady. Konsertti aýyldyq mádenıet úıiniń meńgerýshisi Samat Abjanov pen E.Bekmahanov atyndaǵy mekteptiń oqýshysy Jansaıa Ǵınaıat júrgizdi.
«Teńge alý» oıynynda Nurzat Taıtóleý, Danııal Oral alǵashqy oryndardy jeńip alsa, kórshiles Tórtkól aýylynan kelgen Tólegen Serǵazıev úshinshi oryndy ıelendi. Al «Aýdaryspaq» synynda Uzynbulaq aýylynyń balýany Álibek Taıtóleý barlyq qarsylasynan basym tústi. Jańaqala aýylynan kelgen balýan Narıman Qasenov ekinshi, Uzynbulaq aýylynyń balýany Arystan Aqylbekov úshinshi oryndy jeńip aldy. Sáıgúlikter «Taı jarys», «Toq báıge» jáne 30 shaqyrymdyq «Alaman báıgege» shyqty. Ár báıgede máre syzyǵyna buryn jetken 6 sáıgúlikke júlde berildi. Báıgede jalpy sany 40-tan asa júırik jarys jolyna tústi. Taı jarysta kórshiles Rodnıkovskıı aýylynyń atbegisi Lenıa Spırıdonovtyń aty ozyp keldi. Buqar jyraý aýylynyń atbegi Nurjan Ermekovtiń taıy ekinshi, Aqshı aýylynyń atbegi Baqyt Jámınovtyń taıy úshinshi orynǵa ıe boldy. Toq báıgede Musa Shorman aýylynyń atbegi Serik Áýtaevtiń tulpary máre syzyǵyn birinshi bolyp kesip ótti.
Aýyl ákimi Asqar Muratulynyń aıtýynsha, shalǵaıdaǵy aýyl umyt qalǵan joq, mal-jan aman. Dastarqan toq. Salt-dástúrin saqtaǵan el ishi osyndaı merekeleri arqyly balalar men jastarǵa tanymdyq, ulttyq tárbıe qaldyrary sózsiz.
Pavlodar oblysy, Baıanaýyl aýdany