Ulyqtaý rásimin Konstıtýsııalyq Keńes Tóraǵasy Qaırat Mámı bastady. Ol Qasym-Jomart Toqaevtyń Prezıdent qyzmetine Konstıtýsııanyń 42-babyna sáıkes Qazaqstan halqyna ant bergennen keıin kirisetinin habarlady.
Qazaqstan Respýblıkasynyń Zańyna sáıkes, Qasym-Jomart Toqaev Konstıtýsııaǵa qolyn qoıyp: «Qazaqstan halqyna adal qyzmet etýge, Qazaqstan Respýblıkasynyń Konstıtýsııasy men zańdaryn qatań saqtaýǵa, azamattardyń quqyqtary men bostandyqtaryna kepildik berýge, júktelgen mártebeli mindetti adal atqarýǵa saltanatty túrde ant etemin!» - dep halyqqa ant berdi.
Mine, osy sátten bastap Prezıdent resmı qyzmetine kirisken bolyp sanalady.
Ant berý saltanatty jaǵdaıda Parlament depýtattarynyń, Konstıtýsııalyq Keńes músheleriniń, Joǵarǵy Sot sýdıalarynyń, sondaı-aq, basqa da memlekettik organdar ókilderiniń qatysýymen ótkizildi.
Ant berilgennen keıin Qazaqstan Respýblıkasynyń Memlekettik Gımni oryndaldy.
Ortalyq saılaý komıssııasynyń tóraǵasy Berik Imashev Prezıdent kýáligin tabystady. Qasym-Jomart Toqaev Qazaqstan Respýblıkasynyń Prezıdenti qyzmetine kiristi.