Beısenbi, 28 naýryz 2013 1:29
Fransýzdar eki úndini atyp óltirdi
Fransýzdyq áskerı qyzmetshiler jaqynda bılikke kóterilisshiler toby kelgen Ortalyq Afrıka Respýblıkasynda Úndistannyń eki azamatyn atyp óltirdi. Bulardan basqa alty adam jaralanǵan. Olardyń arasynda Chad respýblıkasynyń, Kamerýnnyń azamattary da bar delinip otyr.
Beısenbi, 28 naýryz 2013 1:29
Fransýzdar eki úndini atyp óltirdi
Fransýzdyq áskerı qyzmetshiler jaqynda bılikke kóterilisshiler toby kelgen Ortalyq Afrıka Respýblıkasynda Úndistannyń eki azamatyn atyp óltirdi. Bulardan basqa alty adam jaralanǵan. Olardyń arasynda Chad respýblıkasynyń, Kamerýnnyń azamattary da bar delinip otyr.
Fransýz jaǵy qarý kezdeısoq qoldanylǵan degendi kóldeneń tartady. Fransııa prezıdenti Fransýa Olland Úndistan premer-mınıstri Manmohan Sınghke oryn alǵan ókinishti oqıǵaǵa oraı keshirim suraǵan hat joldady. Hatta oqıǵanyń jaı-japsary egjeı-tegjeıli tekseriletini de atap kórsetiledi. Al oqıǵa fransýzdardyń baqylaý-kúzetindegi Bangı áýejaıynda bolǵan.
Qupııa qyzmet basshysyn tańdady
AQSh prezıdenti Barak Obama memleket basshysynyń kúzetimen aınalysatyn qupııa qyzmettiń basshysy laýazymyna agent Djýlııa Pırsondy tańdady. Ol buǵan deıin qupııa qyzmette shtab bastyǵy bolyp jumys istepti. Endi Pırson osy laýazymǵa taǵaıyndalǵan alǵashqy áıel bolyp otyr.
Atap kórsetetin jáıt – Pırsondy bekitý úshin Kongrestiń maquldaýy qajet etilmeıdi. Qupııa qyzmettiń burynǵy basshysy Mark Sallıvan aqpan aıynyń basynda otstavkaǵa ketken bolatyn. Onyń ártúrli sebepteri bar ekeni týraly da boljamdar kóp. Jalpy, AQSh-tyń qupııa qyzmeti prezıdentti jáne onyń otbasyn, sondaı-aq eldiń burynǵy basshylaryn kúzetedi. AQSh valıýtasy men memlekettik oblıgasııalardy qoldan jasaý úderisterimen kúresý de osy qyzmettiń mindetine jatady.
Teńiz baılyǵyna kóz tigýshiler kóp
Vetnam Qytaı tarapyn balyq aýlaıtyn qaıyǵyn atqylady dep aıyptady. Oqıǵa Ońtústik-Qytaı teńizindegi eki eldiń de talaby bar Parasel araldaryna jaqyn jerde tirkelgen. Kıkiljiń 20 naýryzda oryn alǵanymen, Vetnam basshylyǵy bul týraly tek endi ǵana málimdep otyr.
Oq atýdan zardap shekkender bar ma, joq pa ol jaǵy belgisiz. Vetnam jaǵy oqıǵa týraly naqty aqpar taratýdan bas tartýda. Biraq resmı Hanoı oqıǵaǵa úlken mán bergendikten, Qytaı elshisine shaǵym túsirgen. Qytaı tarapynyń da jaýaby daıyn: vetnamdyqtar Qytaıdyń aýmaqtyq sýlarynda zańsyz balyq aýlaǵan, deıdi. Al Ońtústik-Qytaı teńizinde tabıǵı gazdyń mol qory bar. Odan Qytaı men Vetnam ǵana emes, sondaı-aq Fılıppın, Malaızııa, Taıvan jáne Brýneı úmitti.
Italııalyq mınıstr otstavkaǵa ketti
Italııa Syrtqy ister mınıstri Djýlıo Tersı keshe óziniń otstavkaǵa ketetinin málimdedi. Ol óz ustanymyn úndistandyq balyqshylardy óltirdi dep aıyptalyp otyrǵan eki ıtalııalyq teńizshini Úndistan bıligine berý týraly sheshimmen kelispeıtindigimen túsindirdi.
Men ári qaraı bul úkimettiń bir bólshegi bola almaımyn. Meniń áskerı teńizshilerdi berý múldem qısynsyz degen ýájimdi eshkimniń tyńdaǵysy da kelmedi, deıdi Tersı. Mınıstr Marıo Montı úkimetiniń sheshimine narazylyǵyn osylaısha bildirdi. Al oqıǵa byltyr Úndi muhıtynda oryn alǵan edi. Italııanyń tankerin kúzetken teńizshiler ózderine jaqyndaǵan shhýnany pırattardyki dep qalyp oq atsa kerek.
AQSh-tyń eń qymbat eks-prezıdenti
Amerıkalyq qazyna byltyr kishi Djordj Býsh úshin 1,3 mıllıon dollar shyǵyndapty. Sóıtip, ol qazirgi kózi tiri eń qymbat burynǵy prezıdent atanyp otyr. Bul soma onyń jyl saıynǵy 200 myń dollarlyq zeınetaqysynan, onyń apparatyn ustaý úshin bólinetin 100 myń dollardan, sondaı-aq onyń júrip-turýy (ushýlary da bar), ofıs, poshta jáne basqa da qyzmetterine jumsalatyn qarjydan jınaqtalady.
Tizimde ekinshi orynda Bıll Klınton tur. Amerıkalyqtar oǵan byltyr shamamen 1 mıllıon dollar shyǵyndapty. Bul burynǵy prezıdenttiń negizgi qarjysynyń jartysyna jýyǵyn Nıý-Iorktegi ofısin jalǵa alǵany úshin tólegen 442 myń dollary jalmaǵan. Al úlken Býsh salyq tóleýshilerdiń qaltasyna 850 myń dollar kóleminde qol salsa, Djımmı Karterdiki 500 myń dollar eken.
Urlyqshylyǵy úshin – 6 jyl túrme
Qytaı azamaty Sısın Lıý otandastaryna amerıkalyq áskerı tehnologııalardy zańsyz bergeni úshin 6 jylǵa bas bostandyǵynan aıyryldy. Pentagonda jumys isteıtin 49 jastaǵy qytaılyq ushqyshsyz ushatyn ushaqtarǵa nysanalardy spýtnıktermen baılanyssyz joıýǵa múmkindik beretin qurylǵy týraly málimetterdi berse kerek.
Osylaısha Lıý otanyna oralǵan soń jaqsy jumysqa ornalasýdan dámelenipti. Al tehnologııalardy urlaýdan kelgen shyǵyn AQSh-tyń qorǵanys vedomstvosy úshin júzdegen mıllıon dollardy quraýy múmkin delinip otyr. Jalpy, sońǵy 4 jylda AQSh-ta Qytaıdyń paıdasyna shpıondyqpen aınalysqan 100 shaqty adam tutqyndalypty. Kóptegen urlyq, tehnologııalar asa qupııa bolǵandyqtan, aıtylmaıdy da eken.
Qysqa qaıyryp aıtqanda:
Nıger deltasyn azat etý úshin qozǵalysynyń serkesi Genrı Oka 24 jylǵa sottaldy. Mundaı sheshimdi Ońtústik Afrıka Respýblıkasynyń soty qabyldady. Okaǵa lańkestikpen aınalysty degen aıyp taǵylǵan bolatyn. Bul onyń alǵashqy sottalýy emes.
Avstrııada qalyń qar jaýdy. Osynyń saldarynan el astanasy Venanyń batysyndaǵy kúre jolda 100 máshıne soqtyǵysqan jol-kólik oqıǵasy tirkeldi. Kem degende bir adam kóz jumǵan. Qar sondaı-aq Serbııa, Vengrııa, Horvatııa jáne Rýmynııa aýmaqtaryna da qalyń túsken. Keı óńirlerde avtomobıl baılanysy toqtaǵan.
Taıvanda magnıtýdasy 6,3 balldyq jer silkinisi tirkeldi. Negizgi dúmpý el astanasynan 250 shaqyrym jerdegi Nantoý ýezinde bolǵan. Zardap shekkender týraly aqparat joq. Jalpy, Taıvan – tektonıkalyq qaýipti aımaqta ornalasqan el.
Internet materıaldary negizinde ázirlendi.