Arbadaǵy bıden el birinshiligi men bı sportynan «Eýrazııa-2019» halyqaralyq týrnırine 26 jup qatysty. Elimizdiń túkpir-túkpirinen Jaıyq jaǵasyna jınalǵan ónerpazdardyń múmkindikteri shekteýli bolǵanymen, sahnaǵa shyqqandaǵy shabytty shaqtary kórermenge aıryqsha áser etti.
Erekshe dodaǵa arnaıy kelgen qonaqtar qatarynda qostanaılyq Arýna Jaqsyǵulova da boldy. «Úmit-Nadejda» qoǵamdyq qoryn quryp, elimizde alǵashqylardyń biri bolyp «Arbadaǵy bı» jobasyn bastaǵan Arýna Jaqsyǵulova qamkóńil jandarǵa bı óneriniń qyr-syryn úıretip júr. «Ártúrli taǵdyrdy bastan keshken bizdi biriktiretin bir nárse bar, ol – arbadaǵy ómir. Árıne pandýstardyń talapqa saı emestigi, arbanyń qymbattyǵy sekildi máseleler az emes. Biraq bizge odan da zor áser etetini – kóńil, qorshaǵan ortanyń nazary. Qoǵamdaǵy belsendiligimizdi arttyrǵymyz keledi. Osy rette bıdiń mańyzy erekshe, adamdarmen aralasamyz, kópshiliktiń ortasynda bolǵan kezde kóńil kúıimiz de kóteriledi», deıdi A.Jaqsyǵulova.
Atyraýda ótken aıryqsha sharany «Aelıta» bı klýby uıymdastyrdy. Onyń negizin qalaýshylar – oblystyq sporttyq bıler federasııasynyń jetekshileri Lıdııa, Nurlan Muqanovtar. Eki kúnge sozylǵan baıqaýdyń júldegerleri qatarynda Esbolat Balbaev pen Aısultan Qaıyrlynyń esimderi ataldy. Sondaı-aq Sábına Qasymova, Malıka Muqtarova, Mıhaıl Bychkovskıı, Vladıslav Sahno, Danııal Syhler, Aleksandr Chashın, Roman Lıtvınov, Eset Dáribaev, Talǵat Amanbekov, Asylbek Qaparbaev, Oksana Lım, Maqsat Sársenbaevtar júldeli oryndardy enshilep, joǵary nátıje kórsetti.
Al «Eýrazııa-2019» halyqaralyq sporttyq bı týrnırinde Nıkıta Boos, Sanjar Izdibaev, Almas Tuqpatýllın, Artýr Shatov, Darııa Qabyl, Tolqyn Izdibaeva, Asılıa Eleýsin, Mıhaıl Fadın, Mıras Jańatalap, Saltanat О́teshqalı, Eskendir Gohgalter jeńimpaz bolyp tanyldy.– Osyndaı sharalar arqyly erekshe qajettilikteri bar adamdardy ońaltýǵa, qoǵamǵa beıimdeýge bolady. Elbasy bastamasymen qolǵa alynǵan «Kedergisiz keleshek» baǵdarlamasynyń mańyzy zor, – deıdi uıymdastyrýshy Lıdııa Muqanova.
ATYRAÝ