Komıtet basshysynyń orynbasary atap ótkendeı, dári-dármekterdi QR-kodpen tańbalaý týraly sheshim pılottyq jobanyń qorytyndysy boıynsha qabyldanatyn bolady.
«Dári-dármekterdi tańbalaý boıynsha Eýroodaq aıasynda bul týraly kelisimge qol qoıylǵan. Biz osy saladaǵy qaýymdastyqtarmen, «Atameken» UKP-men keńese otyryp, dárilik zattardy mundaı tańbalaýdyń qajettiligin maquldap otyrmyz. Biz qazir pılottyq jobany iske asyra bastadyq. Sol jobanyń qorytyndysynan keıin ǵana biz sheshim qabyldaıtyn bolamyz», — dedi N. Asylbekov.
Dári-dármekterdi QR-kodpen tańbalaýdy Reseı 2020 jyly engizýdi josparlap otyr, onda mundaı pılottyq joba úsh jyl boıy júrgizilgen. Al Qazaqstanda ázirge ony iske asyrýda týyndap otyrǵan birqatar máseleler bar.
«Ondaı máselelerdiń qataryna dári-dármekterdiń qymbattaýyn, otandyq dári-dármek óndirýshilerdiń tańbalaıtyn jabdyqtardy satyp alý qajettigin jatqyzýǵa bolady. Sondyqtan biz aldymen pılottyq jobany iske qostyq. Sol jobanyń qorytyndysy boıynsha ǵana biz bul máselege qatysty sheshim qabyldaıtyn bolamyz. Biz qazir munyń bári birden iske asady dep aıta almaımyz», — dep naqtylady komıtet tóraǵasynyń orynbasary.
Dárilik zatqa QR-kod tirkelgennen keıin, onyń óndirýshiden dıstrıbıýtorǵa, odan dárihanaǵa deıin jetkizilýin qadaǵalap otyrýǵa múmkindik týady.
«Jalǵan dáriler jasaý, kontrfaktilik oqıǵalar, dári-dármekterdi esepke alý – bul jumystardyń barlyǵyn osy arqyly qamtıtyn bolamyz. Qoımadaǵy kepildik kómek arqyly beriletin tegin dárilerdiń qansha kólemi bar ekenin, ony bir aýmaqtan ekinshi aýmaqqa jiberilýin de dárilerdi tańbalaýdyń kómegimen qadaǵalaıtyn bolamyz», — dedi Nurlybek Asylbekov.
Onyń aıtýynsha, dárilerdi tańbalaý, eń bastysy, jalǵan dári jasaýdy boldyrmaıdy jáne dárilerdiń sapasy men tıimdiligin arttyrýǵa múmkindik beredi.
Sonymen qatar sala ókili dári-dármekterdiń reseptisiz bosatylýynyń aldyn alýǵa qatysty qabyldanyp jatqan sharalarǵa da toqtaldy. Densaýlyq saqtaý mınıstrliginiń Taýarlar men kórsetiletin qyzmetterdiń sapasy men qaýipsizdigin baqylaý komıteti tarapynan tekserýler profılaktıkalyq maqsatta jáne azamattardan shaǵym túsken jaǵdaıda júrgiziledi.
«Osyndaı jaǵdaıǵa qatysty komıtet 2017 jyly 50 faktini tirkedi, oǵan ákimshilik-quqyqtyq kodeks arqyly shara qoldanyldy. 2018 jyly mundaı faktiler eki esege deıin artyp, 90-ǵa jetti. Olarǵa 20 mln teńgege jýyq kólemde aıyppul salyndy», — dedi spıker.
N. Asylbekov bul rette dárilerdi orynsyz qoldanýdyń zııandyǵyn da atap aıtty. Qazir antıbıotıkterge qarsy tózimdilik paıda bolǵandyqtan, em qonbaı, syrqatynan aıyǵa almaǵan naýqastar bar.
«Ol týraly dúnıejúzilik densaýlyq saqtaý uıymynyń bizge bergen usynymdary bar. Sondyqtan sozylmaly aýrýlary bar azamattar emdeý mekemelerine aldyn ala habarlasqany durys», — dedi ol.