Alqaly jıynǵa QHA Tóraǵasynyń orynbasary – hatshylyq meńgerýshisi Janseıit Túımebaev, QHA Tóraǵasynyń orynbasary Iýsýp Kelıgov, Sherzod Pýlatov jáne Parlament Májilisi Tóraǵasynyń orynbasary Vladımır Bojko, sondaı-aq Parlament Májilisiniń depýtattary men QHA Keńesiniń músheleri, qoǵam qaıratkerleri, zııaly qaýym ókilderi qatysty.
Basqosýda aldymen Janseıit Túımebaev sóz bastap, Qasym-Jomart Toqaevtyń Qazaqstan Respýblıkasynyń Prezıdenti bolyp saılanýy elimizdiń jańa tarıhı kezeńiniń bastaýy bolǵanyn aıtyp, ulyqtaý rásiminde Memleket basshysy belgilep bergen damý baǵyttary Assambleıanyń da nazarynda bolýy kerektigin málimdedi.
– Memleket basshysy Qasym-Jomart Toqaev ulyqtaý rásimindegi sózinde jahandyq maqsattaryn ǵana emes, sondaı-aq olarǵa qol jetkizýdiń negizgi tásilderin de atap kórsetti. Bul bir formýlamen tujyrymdaldy: kúshti, ókiletti Prezıdent, yqpaldy, áreketke qabiletti Parlament, halyqqa esep beretin Úkimet. Alaıda júrgizilip jatqan ekonomıkalyq ózgeristerge sáıkes bolýy úshin saıası transformasııa prosesi belgilengen. Jáne de bul prosess bıliktiń halyq aldyndaǵy jaýapkershiligin arttyrý, azamattyq qoǵamdy damytý, bılik pen qoǵamnyń dıalogy, sondaı-aq pikirler plıýralızmi vektory boıynsha qurylady. Al Memleket basshysy atap kórsetken10 mindettiń qatarynda kóptegen mańyzdy másele bar, – dedi J.Túımebaev.
Keleli keńeske qatysýshylar Ulttyq qoǵamdyq senim keńesinde el arasynda jıi talqylanatyn qandaı máseleler kún tártibine qoıylýy kerektigi týraly pikirlerin ortaǵa saldy. QHA Tóraǵasynyń orynbasary Iý.Kelıgov bul jıynnyń syrtynda aıtylmaǵan áli qanshama másele baryn, eń bolmasa osynda sóz etilgen krıterııler boıynsha Assambleıanyń jumysyn jandandyrý qajettigin atap kórsetti.
Al «Jańǵyrý joly» jastar qozǵalysynyń tóraǵasy Maksım Spotkaı Ulttyq qoǵamdyq senim keńesi jastar máselesine de kóńil bóletinine senim bildirdi.
– Saılaý arqyly Qazaqstan halqy, ásirese jastar qazirgi tańda búkil álem qurmetteıtin táýelsiz elimizdiń qurylýyndaǵy Tuńǵysh Prezıdentimizdiń asa kórnekti rólin moıyndap otyr. Bul saılaýdyń nátıjesin Elbasyna kórsetilgen zor qurmetpen, onyń saıasatyna degen senim dep qabyldaýǵa tolyq negiz bar. Qasym-Jomart Toqaev qoǵamdaǵy túrli pikirlerdi jáne memlekettegi túıindi máselelerdi zerdeleý úshin Ulttyq qoǵamdyq senim keńesin qurýdy usyndy. Bul ishki saıası ahýaldyń jaqsarýyna, qoǵamnyń demokratııalanýyna jáne sabaqtastyqty, ádilettilik pen órleýdi iske asyrýǵa septigin tıgizedi, – dedi M.Spotkaı.
Jıyn sońynda jınalǵan qaýym Prezıdent alǵa qoıǵan maqsattaryna saı jumys istegende ǵana Assambleıanyń isi odan ári shıraı túsetinin aıtyp, oılaryn qorytyndylady.
Dınara О́MIRTAEVA,
EUÝ-dyń jýrnalıstıka fakýltetiniń stýdenti