Táýelsizdik alǵan jyldardan beri alǵash ret jańa Prezıdent saılanyp, Qazaqstan Respýblıkasyna adal qyzmet etý úshin ant qabyldandy. Buǵan deıingi saılaý aldynda Nur Otan partııasy atynan usynylǵan Qasym-Jomart Toqaevqa tolyqtaı qoldaý bildirdik. Búginde aıqyn ári basym daýys jınap jeńiske jetti. Inaýgýrasııa kezinde Qasym-Jomart Kemelulynyń usynysy men jospary, keleshekke bastaǵan basym baǵdarlary qanshalyqty ózekti, oryndy ekenin uǵyndyq. Saılanǵan alǵashqy kúnnen bastap, óziniń naqty sheshimder qabyldaý arqyly bas-aıaǵy bútin josparymen, aýqymdy daıyndyqpen kelgenin kórsetti. Kópshiliktiń erteńge degen senimi oıandy degen oıdamyn.
Prezıdent óz sózinde halyqty bılik pen qoǵam arasyndaǵy qatynas alańdatatynyn aıtty. Sondyqtan Ulttyq qoǵamdyq senim keńesin qurýdy usyndy. Keńeske jastardy qosa alǵanda, búkil qoǵamnyń ókilderi kiretinin aıtty. Bul asa mańyzdy bastama bolmaq. Halyqpen tikeleı baılanys ornata otyryp, san salaly qoǵamdyq máselelerdiń oń sheshimin birge qarastyrý mindeti tur. Bul qadam arqyly halyqtyń senimi uıalaıdy, turaqtylyq ornaıdy, birlesken istiń nátıjesi bolady.
Q.Toqaev Elbasy N.Nazarbaevtyń bastamalary aldaǵy ýaqytta da jalǵasyn tabatynyn jetkizdi. Búginge deıin el damýynyń tetigi sanalǵan qaı sala bolmasyn aıaqtan turyp, jemisti nátıjege qol jetkizdik. Sonyń ishinde eldiń mádenı-rýhanı baǵyttaǵy baǵdary baǵalanyp, baǵy jandy. Sonymen qatar búginde Qazaq eliniń álem aldyndaǵy bedeli men ustanymyn bıik tuǵyrdan túsirmeı, keleshek urpaqqa amanattaý, turaqty damý jolynan taımaý mindeti tur.
Nadejda GOROBES,
Qazaqstannyń eńbek sińirgen qaıratkeri, Abaı atyndaǵy qazaq Memlekettik akademııalyq Opera jáne balet teatry dırektorynyń orynbasary