«Jastar jylyn» qoldaý aıasynda ótken osy jarysta О́zbekstan, Mońǵolııa jáne Qazaqstannyń birqatar oqý oryndarynyń stýdentteri qatysyp, 10 salmaq dárejesi boıynsha túrli-tústi júldelerdi sarapqa saldy. Al básekelerdi tamashalaýǵa kelgen ardager boksshylardyń qatary mol boldy. Solardyń arasynan Olımpıada chempıony Ermahan Ybyraıymov, KSRO-nyń eki dúrkin chempıony Kárimjan Ábdirahmanov, kezinde Odaqtyq jarystarda oza shapqan Bolat Saǵyndyqov, elimizge eńbek sińirgen jattyqtyrýshylar Serik Ábdenálıev, Borıs Shvırashvılı, Jumabek О́mirzaqov, Hamıt Baraev, Edýard Gabdýlov, Bolat Núrpeıisov, Murat Sıqymbaev jáne Qazaqstannyń stýdentter quramasynyń bapkerleri Dastan Sádýaqasov pen Qaırat qajy Kármenovty kózimiz shaldy.
– Osy jarysty bizdiń Akademııa 19 márte uıymdastyryp otyr. Onyń deńgeıi jyldan-jylǵa artyp kele jatqanyna barsha jurt kýá. Búgingi tańda aıtýly oqý ornynyń qabyrǵasynan shyqqan jáne osy týrnırde sheberlikterin shyńdaǵan boksshylardyń deni qalyń kórermenge jaqsy tanys. Olardyń qatarynda Olımpııa oıyndary men álem chempıonattarynda atoı salǵan sańlaqtar da bar. Buıyrtsa, aldaǵy jyldary osy jarysta jeńimpaz atanǵandarǵa sport sheberi ataǵy beriletindeı dárejege kóterýdi kózdep otyrmyz, – deıdi Qazaqtyń Sport jáne týrızm akademııasyndaǵy boks jáne aýyr atletıka kafedrasynyń meńgerýishisi Taıyrjan Ysqaqov.
Jarystyń ózine keler bolsaq, jınalǵan jurt 81 kılo salmaqta saıysqa túsken halyqaralyq dárejedegi sport sheberi Aıat Marjyqbaevtyń ónerine erekshe rıza boldy. Osyǵan deıin jastar arasyndaǵy qurlyq birinshiligi men «Azııa balalary» týrnırinde júlde alǵan astanalyq jas óren osy dodada da asqan sheberlik tanytty. Bastapqy básekeleriniń barlyǵyn aıqyn basymdyqpen utqan Erik Marjyqbaevtyń shákirti fınalda «Bostan Boksıng» klýbynyń ókili Aldan Selmurzaevqa san soqtyrdy.
60 kılo salmaqtaǵy QazSTA stýdenti Ertýǵan Zeınýlınovtyń da myqtylyǵy esh kúmán týǵyzǵan joq. Stýdentterdiń álem chempıonaty men jastardyń Azııa birinshiliginde jeńis tuǵyryna kóterligen Almas Jyńǵylbaev pen Qaırat Kármenovtiń shákirti aqtyq aıqasta Nursultan Isahannan basym tústi. Jarys aıaqtalǵan bette eń úzdik boksshyǵa tıesili arnaıy syılyqty dál osy Ertýǵan ıelendi.
Al ózge salmaq dárejelerinde myna bylǵary qolǵap sheberleri jeńimpaz atandy: 49 kılo – Syrym Batyrbekov (QazSTA), 52 kılo – Elaman Bútinbaev (Nur-Sultan), 56 kılo – Almas Nurǵalı (Almaty), 64 kılo – Nurdos Tólebaı (QazUÝ), 69 kılo – Azamat Ibraımov (ShQO), 75 kılo – Rajabboı Atanazarov (О́zbekstan), 91 kılo – Rústem Ilııasov (QazSTA) jáne +91 kılo – Navrýzáli Begálıev (О́zbekstan).