Erlik eseppen jasalmaıdy

Aıta keterligi, polısııa tarı­hynda demalysta júrgen qyzmet­ker­le­riniń qylmyskerdiń jolyn kesip, ózderi mert bolǵan jaǵdaılar az emes. Mysaly, Aqtóbe jurtshylyǵy polısııa leıtenanty Amangeldi Qosjanovtyń osydan 20 jyl bu­ryn­ǵy erligin áli umyta qoıǵan joq. Kerisinshe, beıbit ómirde erlik kór­set­ken batyrdyń esimi jyl ótken saıyn jańǵyryp, ónegeli joly óskeleń urpaqqa úlgi bolýda.

Endi osy qandy oqıǵanyń mán-jaıyna toqtalsaq, Aqtóbedegi Turar Rysqulov kóshesiniń boıyndaǵy dúkenderdiń birine betperde kıip, qolyna dybys tunshyqtyrǵysh ornatylǵan qarý ustaǵan adam kirip kelip, satýshyny bopsalaı bastaıdy. Oıda-joqta qater tóngen satýshy janushyra shyń­ǵy­ryp, dúkenniń qosalqy bólmesine tyǵylyp úlgeredi.

Bul shý sol mańaıda jeke kóligin jóndep jatqan polısııa leıtenanty Amangeldi Qosjanovqa da jetip, antyna adal qyzmetker oqıǵa ornyna qaraı tura júgirgen. Endi ózi bas saýǵalamaq bolyp, syrtqa umtylǵan qylmysker leıtenantpen betpe-bet keldi. A.Qosjanov sol mańaıdaǵy alańsyz oınap júrgen balalar jazym bolmasyn degen oımen shalt qımyldaǵanda, óziniń qarýsyz ekenin de umytty. Al óziniń osy ústemdigin sezip, jantalasqan qaskóı tapanshasyn Amangeldige qaraı kezep, oılanbas­tan oq jaýdyrdy.

Qylmysker alysqa uzamaı, jedel jetken polısııa jasaǵynyń qolyna tústi. Biraq, eń ókinishtisi, Qosjanov aýrýhanaǵa dereý jetki­zil­genimen, onyń ómirin saqtap qalý múmkin bolmady. Qyrshyndaı jas ómirmen birge leıtenattyń asqaq armandary da osy jerden úzildi...

Búginde Aqtóbede A.Qosjanov atyndaǵy kóshe bar, onyń otbasyna memleket tarapynan barynsha kómek kórsetildi, al áriptesteri onyń erli­gin jas qyzmetkerlerge aıtýdan ja­lyq­qan emes.

Mundaı batyrlar polısııa qata­rynda kóptep sanalady jáne polı­sııanyń erlik isteri beıbit jaǵ­daı­lar­da da kórinis tabýda.  Aıtalyq 2017 jyldyń qarasha aıynda kezek­shilikke túsken Qyzylorda qala­lyq polısııa basqarmasynyń ýchas­kelik ınspektory Ramazan Alda­ber­genov 102 telefonyna túsken dabyl boıynsha órt shyqqan kópqabatty úılerdiń birine attanady. Polıseıler jetken ýaqytta úıdiń ekinshi qabatynan kómek su­ra­ǵan daýysty estıdi. Syrtqy esigi jabylyp qal­ǵan páterde bir aılyq sábıi bar qor­ǵansyz jas ana qa­lyp­ty. Sol sátte Ramazan oılanbastan qyzyl ja­lynmen arpalysa otyryp, otqa oranǵan páterde qalǵan jandardy aman-esen alyp shyqqan. 

Keıin ýchaskelik ınspektor: «Men tilsiz jaýdyń jalynyn kór­gen boıda adamdardy – ana men balany qut­qa­rýdy ǵana oıladym. Barlyǵy sanaýly sekýndtardyń ishinde boldy», dep eske alady.

Al mundaı oqıǵalar kún saıyn bolyp jatady. Sondyqtan da polısııanyń basty urany «Mindet», «Abyroı», «Erlik» degen sózdermen áspettelýi beker bolmasa kerek.