Kúlásh Esqazyqyzy - SSR densaýlyq saqtaý salasynyń úzdigi, Qazaqstan Respýblıkasynyń Ulttyq medısınalyq assosasııasynyń múshesi bolǵan, «Eńbek ereni», Ana men bala densaýlyǵyn qorǵaý salasy boıynsha «Altyn júrek» birinshi ulttyq premııasynyń ıegeri jáne taǵy da basqa kóptegen tósbelgiler men marapattardyń ıegeri. Bir sózben aıtqanda naǵyz adam ómiriniń qorǵaýshysy.
40 jyldan astam eńbek ótili bar Kúlásh Nádirovanyń eńbek jolyna alǵashqy sapary №1 qalalyq klınıkalyq aýrýhananyń tabaldyryǵynan bastalady. Bar joǵy 8 jyldyń ishinde ózin naǵyz maman retinde tanytyp dáriger –neanatolog qyzmetinen bólim meńgerýshi laýazymyna deıin ósip jumysyn adal atqarady. 90-shy jyldardyń basynda medısına salasynda naǵyz bilikti maman retinde Almaty oblysynyń Densaýlyq saqtaý basqarma basshysynyń orynbasary qyzmetin usynady. Árıne, ol kezderi zaman óte aýyr bolǵan edi. Kúlásh Esqazyqyzy qıyndyqqa moıymaı densaýlyq saqtaý salasyna aıanbaı qyzmet etedi. 2006 jyldan bastap óziniń ushqan uıasy balalar klınıkalyq aýrýhanasyna bas dáriger qyzmetine taǵaıyndalady. О́z isiniń naǵyz mamany, úlken júregi jáne adal qyzmeti úshin eli ony únemi elep-eskerip júrdi. QR birinshi ana men bala Ulttyq «Altyn júrek» dıplomy, Eýropa bınes qaýymdastyǵy sarapshylary keńesiniń «2010 jylǵy úzdik menedjer» dıplomy, «Úzdik tulǵalar» atty halyqaralyq ensıklopedııasynyń batyry medaly sekildi marapattary az emes. Ol basqarǵan jyldary 1 qalalyq balalar klınıkalyq aýrýhanasynda edáýir ózgerister bolyp, tipti «Áıel basqarǵan eń úzdik kásiporyn» dıplomy da berilgen. 2010 jyly Eýropalyq bıznes-assosasııalary bir aýyzdan Almaty qalasy 1-shi qalalyq balalar juqpaly aýrýlar aýrýhanasyn qarqyndy damyp kele jatqan kompanııa retinde jalpyeýropalyq reestr qataryna engizgen. Jańa ádister men tehnologııalardy engizý arqyly aýrýhanada Kúlásh apaıymyz qyzmetkerlerimen birige otyryp úlken jumystar atqardy. Balalar aýrýhanasynda stasıonarda jatý ýaqyty 5 kúnge deıin qysqaryp, 1 jastaǵy balalardyń ólimi 2 esege azaısa, al jańa týylǵan náresteler arasynda ólim-jitim 3 esege deıin qysqarǵan. Qarapaıym juqpaly aýrýlar aýrýhanasynyń, sovet úkimeti kezindegi eń aldyńǵy qatarly mamandandyrylǵan medısınalyq ortalyqqa aınalýynyń birden-bir sebepshisi de - Kúlásh Nádirova. Eńbek jolynyń bárin balalardyń densaýlyǵyna arnaǵan Kúlásh apaıymyz: «Men qandaı mamandyq tańdaý jaıyn tipten oılamadym. О́ıtkeni ákem kishkene kezimizde meni dáriger, sińilimdi muǵalim bolady dep anyqtap qoıǵan edi»,- deıdi.
Medısına ýnıversıtetinde oqyǵan stýdenttik jyldary ol ózinen bir kýrs joǵary oqıtyn bolashaq serigi Qýanyshbekpen tanysady. Medısına salasyna berile qyzmet etken Kúlásh joldasy Qýanyshbekpen birge úsh bala tárbıelep-ósirgen. Olar qazir tájirıbeli zańgerler men ǵylymı ataǵy bar dárigerlerge aınalǵan.
Kúlásh Esqazyqyzy qazirgi ýaqytta Almaty qalasy, №27 qalalyq emhanasynyń dáriger-sarapshysy.
Kúlásh apaı: «Dáriger – ekspert - bul jan-jaqty ári qyzyqty jumys. Jas mamandarǵa kóp jyldan beri jınaǵan tájirıbemdi úıretip kelemin. Pasıenttermen sóılesip medısınalyq qyzmettiń olqy tustaryn anyqtaımyn. Zaman talabyna oraı medısınalyq kómek kórsetýdiń sapasyn arttyrýǵa barynsha úlesimdi qosyp júrmin» -deıdi. Árıne, osyndaı bereri kóp naǵyz bilikti mamannyń shákirtteri de osal bolmasy anyq.
Baǵalaı bilgen kisilerge medısına qyzmetkerleriniń tuǵyry taımas bıik tulǵa. Jalpy, medısına qyzmetkeri bolý adamǵa jaryq syılaý degen sóz ispetti. Sondyqtan, tek isimen ǵana emes júregimen emdeı biletin Kúlásh apaıymyz sııaqty aq halatty abzal jandarymyz kóp bolsa eken dep tileımiz.