«Rýhanı jańǵyrý» baǵdarlamasy aıasynda uıymdastyrylǵan festıval Ulytaý aýdandyq mádenıet úıinde ótken «Edige taý – eski jurt eskertkishi» atty ǵylymı-tájirıbelik konferensııamen bastaldy. Jıynnan soń qonaqtar Edige taýyna baryp, qatparyna tarıh turǵan qasıetti mekenmen tanysty.
Tús aýa dástúrli jáne bard ánderi baıqaýynyń irikteý kezeńinde ónerpazdar baq synasty. Kesh túse jastar úshin «Altybaqan ánderi» merekesi uıymdastyrylyp, altybaqan tepken jastar shyrqaǵan qazaqtyń halyq ánderi Ulytaý aspanynda qalyqtady.
«Kókmaısa» etnofestıvaliniń ekinshi kúni qonaqtar teatrlandyrylǵan kórinisterdiń kýási boldy. Munan soń qoldanbaly óner boıynsha sheberlik synyptar, sadaq atý, qatyn kúres, aýdaryspaq, teńge alý, asaý úıretý syndy ulttyq saıystar uıymdastyryldy. Keshke qaraı án baıqaýynyń sheshýshi saıysyna joldama alǵan oryndaýshylar óner kórsetti. Saıys sońynda jeńimpazdar men júldegerler jınalǵan qaýym qurmetine gala-konsert qoıdy.
Festıvaldiń sońǵy kúninde qonaqtar men qatysýshylar qasıetti Ulytaý taýlaryna salt atpen saıahat jasap, tarıh tunǵan ólkeniń aýasymen tynystady. Sondaı-aq, bul kúni kókpar, qyz qýý, alaman báıge uıymdastyrylyp, festıvaldiń jabylý saltanaty ótti.
Eske salsaq, «Kókmaısa» etnofestıvali alǵash ret 2018 jyly Jezqazǵannan 160 shaqyrym jerdegi Kenenbaı kóliniń janynda ótken edi. Uıymdastyrýshylar «Kókmaısa» etnofestıvali Ulytaý aýdanynyń týrıstik áleýetin arttyrýǵa súbeli úles qosady dep senimmen aıtady. Rasynda da, syrttan kelgen meımandardyń rıza kóńil, ystyq yqylasty lebizderine qarap, bul rýhanı turǵydaǵy mańyzdy sharany sheteldik qonaqtardy qazaq halqynyń tarıhymen jáne mádenıetimen tanystyrýdyń utymdy jáne óte kórnekti múmkindigi dep aıtýǵa tolyq negiz bar.
Qaraǵandy oblysy