Qytaıtaný ınstıtýtynyń negizgi maqsaty – Qazaqstan Respýblıkasymen dıplomatııalyq qarym-qatynas ornatqan strategııalyq áriptes el – Qytaı Halyq Respýblıkasynyń tarıhyn, mádenıetin, salt-dástúrin, ekonomıkalyq-áleýmettik damý ereksheligin, álemdegi ornyn zerdelep, ǵylymı baıyptaý. Resmı Beıjińniń Shyǵys jáne Ońtústik Azııa, Taıvan, Batys Eýropa, Túrki, Islam dúnıesi, Ortalyq Azııa elderimen qarym-qatynasyn saraptaý. Sondaı-aq QHR-dyń óz ishindegi etnosaralyq, dinaralyq, ekonomıkalyq, áleýmettik, saıası máselelerdi, búgingi qalpy men betalysyn boljamdap, aqparat kózderi men jalpy oqyrmanǵa anyq etip jetkizý.
Instıtýttyń mádenı baǵdarda josparlaǵan jumystary da edáýir. Mysaly, Qytaı muraǵattaryndaǵy ejelgi túrki, qazaq taıpalary tarıxy men mádenıetine qatysty derekterdi izdeý, jınaý, júıeleý jáne basyp shyǵarý. Áıgili qytaı ǵalymdary jazǵan ejelgi túrki, baıyrǵy qazaq tarıxy men mádenıeti týraly zertteýlerdi, qytaı (xanzý) ultynyń túsinik-tanymyn, talǵam-parasatyn Qazaqstan jurtshylyǵyna keńinen tanystyrý. Qytaı ádebıeti úlgilerin qazaq tiline aýdarý. Eki jaqtyń mádenı-rýhanı, ǵylymı-zertteýshilik qarym-qatynasyna laıyqty jaǵdaı týǵyzý.
Atalǵan ınstıtýttyń basshysy bolyp belgili qytaıtanýshy, fılologııa ǵylymdarynyń doktory, aqyn, Dúnıejúzi sınologtar qoǵamynyń múshesi Dúken Másimhanuly taǵaıyndaldy. Ǵalymnyń osy aıadaǵy zertteý kitaptary, aýdarmalary, oqý quraldary, sózdikteri oqyrmanǵa, ǵylymı qaýymǵa málim.