Tarıhy 2013 jyldan tamyr tartatyn teatr óneriniń dýmany dástúrli túrde osymen jetinshi márte uıymdastyrylyp otyr. Festıvalde elimizdiń jáne taıaý sheteldiń aıtýly 15 teatr ujymy bas qosyp, bir apta boıy óz ónerlerin ortaǵa saldy. Olardyń beseýi elordalyq, atap aıtsaq: «Jastar» teatry M.Áýezov pen Q.Muhamedjanovtyń «Aıman-Sholpan» mýzykalyq komedııasyn (rejısseri – Nurqanat Jaqypbaı), M.Gorkıı atyndaǵy Memlekettik akademııalyq orys drama teatry M.Gorkııdiń «Otes» (rejısseri – Ionas Vaıtkýs), Q.Qýanyshbaev atyndaǵy Memlekettik akademııalyq mýzykalyq drama teatry Nızamıdiń «Láıli-Májnún» (rejısseri – Barzý Abdrazzakov) qoıylymdaryn dodaǵa qossa, talantty jas rejısser Farhad Moldaǵalıdyń «Nomad City Hall» komedııa teatrynda qoıǵan Ý.Shekspırdiń «Rıchard III» tragedııasy men Qazaqstannyń eńbek sińirgen qaıratkeri Nurken О́teýilovtiń jekemenshik teatry sahnasynda qoıylǵan «Jan» monospektakli de sarapshylar talqysy men jalpy teatrsúıer qaýym nazaryna usynyldy. Budan bólek, festıval baǵdarlamasyna engen N.Pogodın atyndaǵy Soltústik Qazaqstan drama teatry (Petropavl), Asanáli Áshimovtiń «Jańa ǵasyr» teatry (Almaty), J.Aımaýytov atyndaǵy Pavlodar oblystyq qazaq mýzykalyq drama teatry (Pavlodar), S.Seıfýllın atyndaǵy oblystyq qazaq drama teatry (Qaraǵandy), Shyǵys Qazaqstan oblysynyń drama teatrlary sheteldik qonaqtar – О́zbekstan memlekettik drama teatry (Tashkent qalasy), «Ý Mosta» Perm teatry (Reseı, Perm qalasy), Jańa kórkem teatry (Reseı, Chelıabi qalasy), «Pilies» teatry (Lıtva, Klaıpeda qalasy), B.Qydykeev atyndaǵy Qyrǵyz memlekettik jas kórermender teatry (Bishkek qalasy) ujymdarymen birge bas shahar teatrlary sahnasyn teńdeı bólisip, shyǵarmashylyq qarymyn ortaǵa saldy. О́ner ujymdarynyń izdenisine teatrtanýshy, teatr synshysy, dramatýrg, Ǵ.Músirepov atyndaǵy Qazaq memlekettik akademııalyq balalar men jasóspirimder teatrynyń kórkemdik jetekshisi Erkin Jýasbek, Q.Qýanyshbaev atyndaǵy Memlekettik akademııalyq qazaq mýzykalyq drama teatrynyń kórkemdik jetekshisi, teatr jáne kıno rejısseri, Qazaqstannyń halyq ártisi Talǵat Temenov, ónertaný doktory, teatr synshysy, GITIS-Reseı teatr óneri ınstıtýtynyń professory – Nına Shalımova, teatr synshysy, ónertaný kandıdaty, T.Júrgenov atyndaǵy qazaq ulttyq óner akademııasynyń dosenti Anar Erkebaı, Reseı halyq ártisi, «Altyn Vıtıaz» halyqaralyq kınoforýmynyń prezıdenti Nıkolaı Býrlıaev bastaǵan sarapshy mamandar tórelik etti.
– Halyqaralyq «SAMGAU» teatr festıvalin sońǵy jeti jyl kóleminde elorda esimimen egiz atalyp kele jatqan, búginde bas qalanyń brendine aınalyp úlgergen sahna dýmany, teatr áleminiń aıtýly oqıǵasy desek, artyq emes. Samǵaý sóziniń maǵynasy óte keń. Osy jyldar ishinde festıval óziniń basty mindeti – elorda mádenıetin damytý jáne qazaqstandyq teatr ónerine degen qyzyǵýshylyqty arttyrý, sheteldik seriktestermen rýhanı-shyǵarmashylyq yntymaqtastyqty nyǵaıtý, gýmanıtarlyq baılanystardy keńeıtý syndy aldyna qoıǵan maqsattaryn abyroımen eńserip keledi. Búginde «SAMGAU» – otandyq jáne álemdik teatr óneri mamandarynyń shyǵarmashylyq pikir almasý alańy ǵana emes, sahna salasy qyzmetkerleri men astanalyq óner janashyrlary úshin asyǵa kútetin súıikti óner merekesine de aınalyp úlgerdi. Jyl saıyn festıvaldiń qanatyn keńge jaıyp, geografııalyq aýqymyn ulǵaıtyp, kásibı hám kórkemdik bıikke umtylǵanyna kýá bolyp, qýanyp otyramyz. Bıylǵy festıvalden de sondaı jańalyq, jarqyn emosııalar kútemiz», – deıdi festıvaldiń negizin qalaýshylardyń biri, sarapshylar alqasynyń tóraǵasy, belgili teatr synshysy Erkin Jýasbek.
Festıval shymyldyǵy Qazaqstannyń eńbek sińirgen qaıratkeri rejısser Nurqanat Jaqypbaıdyń saraptaýynda kórermen nazaryna usynylǵan M.Áýezov pen Q.Muhamedjanovtyń «Aıman-Sholpan» komedııasymen ashyldy. Al sahna dýmanyn elordanyń eń jas teatry – «Nomad City Hall» komedııa teatry ujymy Ý.Shekspırdiń «Rıchard III» tragedııasymen túıindedi.
Aıta keteıik, «SAMGAU» halyqaralyq teatr óneri bas qala tórinde 2013 jyldan beri ótkizilip keledi. Osy kúnge deıin sharaǵa Qazaqstannyń aımaqtyq teatrlary – Pavlodar, Qaraǵandy, Soltústik Qazaqstan, Qostanaı, Mańǵystaý, Túrkistan, Jambyl, Shyǵys Qazaqstan, Batys Qazaqstan, Aqmola, Aqtóbe, Soltústik Qazaqstan oblystarynyń, sonymen qatar Aqtaý, Atyraý, Almaty, Jezqazǵan, Taldyqorǵan, Túrkistan, Oral, О́skemen, Shymkent, Semeı qalalarynyń shyǵarmashylyq ujymdary qatysqan. Sondaı-aq Ortalyq Azııa, Reseı, Lıtva, Túrkııa, Daǵystan, Grýzııa, Ýkraına jáne Serbııa elderiniń teatr ujymdary da festıvalde óz ónerlerin ortaǵa saldy.