El Prezıdentiniń bolashaqta atqarar isi, alǵa qoıyp otyrǵan maqsat-muratyn zeıin qoıyp, óte muqııat tyńdadyq. Qoǵamdaǵy basty-basty máselelerge meılinshe nazar aýdarǵandyǵy tyńdaǵan qaýymnyń shyn máninde rızashylyǵyn týdyrǵandyǵyna eshbir talas joq.
– Meniń maqsatym – qoǵamnyń birligin qamtamasyz etý jáne árbir azamattyń quqyǵyn qorǵaý. Qazaqstannyń ulttyq múddesin árqashan jáne barlyq jerde qorǵaıtyn bolamyn, – dedi Qasym-Jomart Toqaev.
Bul sóz elin súıgen, súıikti eline qyzmet etetin parasatty adamnyń sózi. El Prezıdenti aldaǵy ýaqytta atqarylýǵa tıisti negizgi on baǵytty qolmen qoıǵandaı etip belgilep berdi. Sol baǵyttaǵy sharýalardy dereý júzege asyrýǵa umtylý kerektigin de ekpin túsirip aıtyp ótti. Bul asqaraly mindetterdi sanamen salmaqtaı saralaǵanda eldiń kókeıinde júrgen kóp máselelerdi dóp basqandyǵy aıqyn.
О́z basyma aldaǵy ýaqytta Qoǵamdyq senim ulttyq keńesiniń qurylatyndyǵy qatty unap otyr. El ishindegi jańalyq jaıly pikirleskende aqsaqaldar da osy máselege razylyq tanytýda. Shyn máninde eldiń birligin, yntymaǵyn nyǵaıtýǵa aǵa býynnyń qosar úlesi az emes qoı jáne ol adamdar el ishindegi týyndaıtyn keıbir máselelerdi Prezıdentke aıta alatyn, jetkize alatyn tulǵalar bolýy kerek. Dálirek aıtqanda, ol qarapaıym halyq pen el Prezıdentiniń arasyndaǵy yntymaq pen birliktiń altyn kópiri bolmaq. Tamyz aıynda qurylatyn osy keńeske el ishindegi birlikke yqpal ete alatyn adamdar saılansa degen óz pikirimdi aıta ketkim keledi.
Shııap ÁLIEV,
Kókshetaý qalalyq Ardagerler keńesiniń tóraǵasy