Aqparattyq týr kezinde týrıstik fırmalardyń ókilderi mundaǵy demalys oryndaryndaǵy baǵa men sapa deńgeıin óz kózderimen kórip, jaǵdaımen jete tanysty. Munyń ózi bolashaqta Balqashqa kelýge nıet bildirgen klıentterge demalys aımaǵyn tańdaýdy usyný úshin kerek qadam bolatyn.
Osyndaı eki tarapqa da tıimdi is-áreketterdiń nátıjesinde iskerlik qarym-qatynastar ornatyldy. Mysaly, forýmnyń keıbir qonaqtary ishki týrızmdi birlesip damytý nıetimen ózara baılanys ornatý jóninde sheshim qabyldady. Al elordalyq týrfırmalardyń biri Balqash demalys aımaǵymen yntymaqtastyq týraly kelisimshartqa qol qoıdy.
– Biz Nur-Sultan-Balqash baǵytynda ishki týrızmdi damytý maqsatynda «Barkovskoe» demalys aımaǵymen kelisimge qol qoıdyq. Qaraǵandy oblysyna osy jerde turatyndaı etip týrlar uıymdastyramyz jáne ony astanamyz ben Aqmola oblysynyń turǵyndaryna usynbaqshymyz. Bizdiń klıentterimizge demalystaryn uıymdastyrýǵa kómektesemiz jáne Balqash kýrorttyq aımaǵyna týrıstik aǵyndy molaıtýǵa úlesimizdi qosamyz degen úmittemiz, – deıdi «MED&TOURISM KZ» JShS ókili Danııar Qaýsylov.
Demalys aımaǵynyń ıesi Marat Múrsálimovtyń aıtýynsha, kezdesý týrbızneske ǵana emes, memleketke de paıdaly bolmaq. Yntymaqtastyq – taraptardyń turaqtylyǵyn nyǵaıtady, ıaǵnı ishki týrızmdi damytýǵa, týrıstik nysandardy kóbeıtýge jáne sonyń arqasynda jańa jumys oryndaryn ashýǵa yqpalyn tıgizedi, degen pikirde kásipker.
Forýmǵa Reseıden kelip qatysqan túmendikter Saryarkanyń tilmen aıtyp jetkizgisiz sulýlyǵyn kóben kórýge jáne qazaqstandyq qonaqjaılylyqty sezinýge múmkindik týdyrǵany úshin uıymdastyrýshylarǵa rızashylyq bildirip, alǵys aıtty.
Qaraǵandy oblysy