Nur Otan partııasy oblystyq fılıaly Saıası keńesiniń keńeıtilgen otyrysynda Qyzylorda oblysynyń ákimi, Nur Otan partııasy oblystyq fılıalynyń tóraǵasy Q.Kósherbaev turǵyndardan kelip túsken suraqtardyń muqııat qaralýyn jáne oryndalýyn qatań baqylaýǵa alýdy tapsyrdy.
"Turǵyndardan kelip túsken aryz-shaǵymdardy jergilikti atqarýshy organdar tyńǵylyqty qarap, onyń oryndalýyn jáne máseleniń sheshilýin qatań baqylaýǵa alsyn. Aryz-shaǵymdardyń oryndalý barysy týraly toqsan saıyn taldaý jasap, qorytyndysyn baıandap otyryńyzdar", dedi Q.Kósherbaev.
Sondaı-aq, aımaq basshysy laýazymdy tulǵalardyń ótinishterdi qaraý máselesinde jaýapkershilik tanytýlaryn erekshe atap ótti.
"Syrǵytpa jaýaptar men sózbuıdalyqqa salǵan qyzmetkerler men laýazymdy tulǵalardyń tártiptik jaýapkershiligi, qajet bolsa partııadan shyǵarý jáne qyzmetten bosatý máselesine deıin qaralatynyn qatań eskertemin!", dedi oblys ákimi.
Qyzylorda oblysy