Qaladaǵy belgili mesenattar Ámirjan Nábıev, Vıacheslav Banshıkov jáne Qaıyrjan Mımıkenovtyń demeýshiligimen ashylǵan Open Space qaǵıdasy boıynsha birneshe aımaqqa bólingen jańa jastar ortalyǵynda IT station, 1000 ádebıetti kitaphanasy bar Reading platform, semınarlar, trenıngter ótetin Meeting room ornalasqan.
Ortalyqtyń ashylýyna qatysyp, quttyqtaý sózin arnaǵan Almaty ákimi Baýyrjan Baıbek jastar ıdeıalary men usynystaryna qoldaý kórsetý el Prezıdenti Qasym-Jomart Tokaevtyń basty maqsattarynyń biri ekenin atap ótti. Buryndary mundaı qalalyq kovorkıng-ortalyqtar Alataý jáne Naýryzbaı aýdandarynda ashylyp, jastar úshin sheberlik synyptary, túrli trenıngter, syrttan kelgen jastardyń jumysqa ornalasýyna qatysty keńester ótkizilip keledi. Jambyl atyndaǵy jasóspirimder kitaphanasy jastardyń zııatkerlik ortalyǵy bar. Burynǵy tramvaı deposynyń bazasynda jas almatylyqtar úshin Loft-ortalyqtyń ekinshi kezeńi «Depo Evolution Park» ashý josparlanǵan.
Almaty jastarǵa qoldaý kórsetýde tyń jobalarmen erekshelenip keledi. Elbasynyń Bes áleýmettik bastamasy boıynsha qalada 20 myń oryndy 38 jataqhana salý josparlanǵan bolsa, qazirdiń ózinde tórt jataqhana iske qosylǵan. Jaqyn arada taǵy bir jataqhana óz turǵyndaryn qabyldaıtyn bolady.
Eki jyl ishinde 200 jas otbasy «Almaty jastary» qalalyq baǵdarlamasy boıynsha páter aldy. Kásibı jáne tehnıkalyq bilimge erekshe nazar aýdarylýda. Búgingi kúni 30 myńnan astam jastar jumysshy jáne servıstik mamandyqtardy tegin alýda.
Búgin jańa kovorkıng-ortalyqta «Nur Otan» partııasy qalalyq fılıalynyń tóraǵasy Baýyrjan Baıbek birlestiktiń jańa múshelerine jańa partııa bıletterin tapsyrdy. Olardyń qatarynda qazaq tili klýbynyń basshysy Marına Faleeva, Qazaqstan men Paralımpııa oıyndarynyń birneshe dúrkin chempıony Azamat Orazbek, jas kompozıtor Ǵalamat Beıseqoja, Sıngapýrdaǵy «Medısına salasyndaǵy 100 startap-joba» júldegeri Alına Achılova, «L-Generation» jetekshisi Edýard Lı, telejúrgizýshi Dıana Skatova, «Arlan» teatrynyń akteri jáne pankratıon boıynsha el chempıony Shalqar Qudaıbergen bar.
ALMATY